ABhaluumi 1

ɄPaulo ahubhalamuha aBhaluumi

1Ɨkalaata ɨnɨ ɨfumile huliinɨ anɨ nɨPaulo, wɨ‑ɨndi mʼmomvi wa Yeesu ʉKilisiti.#1:1 ɄKilisiti hwa huje ʉmuntu ʉyo ʉNgʉlʉbhɨ anʼsaluuye abhe Mʼfyʉli. Bhaazya izwi Kilisiti hu Ngalulanyo ɨyɨ Mazwi aMajenu hu malishilo wɨ shitaabu ɨshi. ɄNgʉlʉbhɨ ahankwiziizye na hunsalule ɨmbe nʼsontwa huje ɨndʉmbɨɨlɨle ɨNongwa ɨNyinza afume hwa mwene.#Bhaazya ɨMbombo ɨzya Bhasontwa 9:15. 2ƗNongwa ɨNyinza ɨzyo, zya zyɨzyo ʉNgʉlʉbhɨ ahalapile afume ɨmandɨ, hwi‑idala ɨlya bhakuwi bhaakwe ɨbho bhahasimbile mu Nsimbo ɨMfinjile. 3ƗNongwa ɨNyinza ɨzyo ziyanga hu nongwa ya Mwana waakwe. Ɨshimʼbɨlɨ, ahapapwilwe afume mu shikholo ɨsha mwɨnɨ ʉDaudi.#1:3 ʉDaudi Bhaazya izwi Daudi hu Ngalulanyo ɨyɨ Mazwi aMajenu hu malishilo wɨ shitaabu ɨshi. 4Ʉyo ya yʉʉyo ʉNgʉlʉbhɨ ahanʼzyʉsyɨzye afume hwa bhafwe hwi‑ikhone lya Mʼpepo ʉMʼfinjile.#1:4 Mʼpepo ʉMʼfinjile Bhaazya izwi Mʼpepo ʉMʼfinjile hu Ngalulanyo ɨyɨ Mazwi aMajenu hu malishilo wɨ shitaabu ɨshi. Hwi‑idala ɨlyo, anʼsaluuye abhe Mwana wa Ngʉlʉbhɨ#1:4 Mwana wa Ngʉlʉbhɨ Bhaazya izwi Mwana wa Ngʉlʉbhɨ hu Ngalulanyo ɨyɨ Mazwi aMajenu hu malishilo wɨ shitaabu ɨshi. wa‑ali ni‑ikhone lyonti. Ʉyo yʉ Mwɨnɨ weetu ʉYeesu ʉKilisiti. 5Ashilile hwa mwene, ʉNgʉlʉbhɨ ahandolela ɨmpyana, huje ɨmbe nʼsontwa. Ahabhombile ɨsho huje ɨmbakwizye abhantu bhonti bha saga Bhayahuudi, bhamʼmwɨtɨshe na hunʼtinishe ʉMwɨnɨ ʉYeesu huje ʉmwene amwamihwe. 6Namwɨ muli mu mpʉga ɨyo ɨya bhantu ɨbho ʉNgʉlʉbhɨ abhakwiziizye abhe bhantu bha Yeesu ʉKilisiti.

7Ɨhubhasimbila amwɨ mubhooziwa mubhamwetu, mwenti mwa muli mwi‑ibooma ɨlyɨ Luumi. ɄNgʉlʉbhɨ abhagɨɨne tee, abhasaluuye huje mubhe bhafinjile bhaakwe.

Ɨmpyana nʉ tengaanu afume hwa Ngʉlʉbhɨ, ʉDaada weetu, na hwa Mwɨnɨ ʉYeesu ʉKilisiti, vibhanje peeka naamwɨ.

ɄPaulo asʉngwa hubhayaatile abhooziwa abha hwi‑ibooma ɨlyɨ Luumi

8Nasʉʉti, ɨhunʼsalifya ʉNgʉlʉbhɨ waanɨ hwi‑idala ɨlya Yeesu ʉKilisiti hu nongwa yeenyu amwɨ mwenti, pɨpo ɨnongwa ɨzyɨ lwɨtɨho lwenyu zimanyiha mu nsi zyonti. 9ɄNgʉlʉbhɨ ʉyo ɨhumʼmombela hu mwoyo gwanɨ gwonti, hwi‑idala ɨlya hubhalʉmbɨɨlɨle abhantu abhanjɨ ɨNongwa ɨNyinza ɨzya Mwana waakwe, amɨɨnye ɨsho ɨhubhapuutila amwɨ hu habhaazyo honti. 10Ɨhunʼnaabha ʉNgʉlʉbhɨ huje nkashele wasʉngwa, ɨshi ampeele ahabhaazyo aha hwɨnze huliimwɨ hubhayaatile. 11Ɨyanga ɨsho pɨpo ɨnyonywa tee hubhayaatile huje ɨmbapeele ɨnsayo ɨzya Mʼpepo ʉMʼfinjile, huje mukhamantanaje mu mooyo geenyu. 12Ɨnjanjile amazwi ɨgo huje, amwɨ naanɨ tijinjizanye tɨɨtɨ hu tɨɨtɨ ɨsho tihumʼmwɨtɨha ʉYeesu.

13Amwɨ mubhooziwa mubhamwetu, ɨhwanza mumanye huje, nahali ɨnamuuye ahwɨnze hubhayaatile amwɨ hahinji. Leelo, ɨnzijiliilwe afishe hu habhaazyo ɨha. Ɨhwanza ɨnɨnze ɨndʉmbɨɨlɨle ɨNongwa ɨNyinza huliimwɨ huje abhantu bhamʼmwɨtɨshe ʉMwɨnɨ ʉYeesu, nanshi ɨsho nahabhombile hwa bhantu abhanjɨ bha saga Bhayahuudi. 14ɄNgʉlʉbhɨ andajiziizye huje ɨmbe ɨlʉmbɨɨlɨla ɨNongwa ɨNyinza hwa bhantu bhonti, hwa Bhayunaani na hwa saga Bhayunaani,#1:14 Bhayunaani na hwa saga Bhayunaani Ɨnjango ɨya Bhayunaani na miiho gaabho, vyonti ɨvyo vyahamanyiihana mu nsi ɨnyinji hu habhaazyo ɨho yahasimbwilwe ɨkalaata ɨnɨ. Abhantu ɨbho bhahamɨɨnye ayanje ɨnjango ɨyo bhahali bhahubhasyonshela abhantu bhonti ɨbho saga bhahamɨɨnye ayanje ɨShiyunaani na‑abhombe gaala ga gakholana na miiho ɨgo. hwa bhamanyiihanyi na hwa bha saga bhamanyiihanyi. 15Ɨsho, sha shɨɨsho ɨnyonywa tee ɨnɨnze ɨndʉmbɨɨlɨle ɨNongwa ɨNyinza huliimwɨ, amwɨ mubhantu bha hwi‑ibooma ɨlyɨ Luumi.

Ikhone ɨlyɨ Nongwa ɨNyinza

16ƗNongwa ɨNyinza ɨzyo likhone lya Ngʉlʉbhɨ ɨlya hubhafyʉle abhantu bhonti ɨbho bhahumʼmwɨtɨha ʉYeesu, ahwande hwa Bhayahuudi afishe hwa bhantu bha saga Bhayahuudi. Afumilane nɨ‑ɨlyo anɨ saga ɨlola ɨnsoni nka hashe huzilʉmbɨɨlɨle. 17ƗNongwa ɨNyinza ɨzyo zilolesya pa pazelu ɨsho ʉNgʉlʉbhɨ ahubhabhaazizya abhantu ʉgolosu. Abhantu bhabhaaziwa ʉgolosu hwi‑idala ɨlyɨ lwɨtɨho lwene, nanshi ɨNsimbo ɨMfinjile ziyiga, “Ʉmuntu ʉyo abhaaziwa abhe nʼgolosu hwi‑idala ɨlyɨ lwɨtɨho, ʉyo ahayibha nʉ wʉʉmi.”#Bhaazya Habakuki 2:4.   #1:17 Ʉmuntu ʉyo abhaaziwa abhe nʼgolosu hwi‑idala ɨlyɨ lwɨtɨho, ʉyo ahayibha nʉ wʉʉmi Mu njango ɨyɨ Shiyunaani ɨsimbwilwe huje, Ʉmuntu ʉnʼgolosu ahayibha nʉ wʉʉmi hu lwɨtɨho.

ɄNgʉlʉbhɨ ahubhafunda abhantu hu nongwa yɨ mbiibhi zyabho

18ɄNgʉlʉbhɨ alolesya pa pazelu ilyoyo lyakwe afume hu mwanya huje, ahayihubhalonga abhantu bhonti ɨbho bhahunʼkhaana hwi‑idala ɨlya‑abhombe ɨmbiibhi. Abhantu ɨbho afumilane nɨ njendo zyabho ɨmbiibhi bhakhaana ɨlyoli yaakwe. 19Leelo saga huje saga bhamɨɨnye hohonti hu nongwa ya Ngʉlʉbhɨ, ndaali. Gonti ɨgo gabhajiiye amanyiihane hu nongwa ya Ngʉlʉbhɨ gali pa pazelu hwa bheene, pɨpo ʉNgʉlʉbhɨ yʉʉyo agamanyisiizye hwa bhantu. 20Ɨpo pa wandilo ʉNgʉlʉbhɨ ahapelile ɨvintu vyonti. Afume hu habhaazyo ɨho, abhantu bhabhajiiye amanye ɨsho ʉNgʉlʉbhɨ sha‑ali, hwope nkashele saga bhahunʼnola. Ɨvintu ɨvyo ahapelile vilolesya huje ʉNgʉlʉbhɨ ali ni‑ikhone lyonti. Nantele ʉmwene yʉ Ngʉlʉbhɨ mwene, nʉʉmo ʉwɨnjɨ. Sha shɨɨsho abhantu saga bhabhajiiye ayanje huje saga bhamʼmɨɨnye ʉNgʉlʉbhɨ. 21Poshe nkashele bhamʼmɨɨnye ʉNgʉlʉbhɨ sha‑ali, leelo saga bhahumʼmwamiha awe hunʼsalifye nanshi ɨsho akhondɨɨye. Lyoli, abheene bhali nɨ nsɨɨbho ɨmbiibhi, nantele ɨnjeele zyabho zyahavwalangɨɨne na‑abhe nɨ hiisi. 22Abheene bhahwibaada huje bhali nʉ tengamazu, fwandi bhapezu. 23Bhaleha humʼpuute ʉNgʉlʉbhɨ ʉyo saga afwa, bhahuvipuuta ɨvifwani ɨvya bhangʉlʉbhɨ abhi‑ilenga ɨvyo vilɨngaana nanshi abhantu, awe ɨvyʉma, awe ɨnyonyi, awe ɨvipelwa vya vikwesushila. Ɨvyo vyonti vifwani vyɨ vipelwa ɨvyo vifwa.

24Hu nongwa ɨyo, ʉNgʉlʉbhɨ abhaleshile bhabhe bhalondolezya ɨnsʉngwo zyabho ɨmbiibhi na‑abhombelane bhɨɨbho hu bhɨɨbho ɨnongwa ɨzyɨ nsoni hwi‑idala ɨlyɨ mabɨlɨ gaabho. 25Bhaleshile ahwɨtɨshe ɨlyoli ya Ngʉlʉbhɨ, bhalondolezya ilenga. Bhabha bhahuvipuuta ɨvipelwa na huvibhombele, leelo bhaleha abhombe ɨgo hwa Ngʉlʉbhɨ, ʉMʼpeli ʉyo akhondɨɨye amwamihwe wiila! Aameni.

26Ɨpo ʉNgʉlʉbhɨ ahabhaleha bhabhombaje ɨnongwa zyabho ɨmbiibhi ɨzyɨ nsoni nanshi ɨsho bhahwanza. Hwope abhashɨ bhahaleha agonane na bhalume bhaabho, leelo bhahabha bhagonana bhɨɨbho hu bhɨɨbho. 27Shɨɨsho abhalume bhope bhahaleha abhombele amabɨlɨ gaabho nanshi ɨsho bhahapeliilwe, hwa huje ʉnʼnume nʉ nʼshɨ. Lyoli bhahali bhasʉngwana bheene hu bheene. Bhahali bhabhomba ɨnongwa ɨzyɨ nsoni ɨzya‑agonane bheene hu bheene. Afumilane nɨ‑ɨlyo, bhahabha bhahwisaluliiye bhɨɨbho ʉlufundo ʉlwo lubhakhondɨɨye hu njendo zyabho ɨmbiibhi.

28Ɨshi, nanshi ɨsho abhantu ɨbho bhahakhaanile humʼmanye ʉNgʉlʉbhɨ, ʉNgʉlʉbhɨ wope ahabhaleha bhabhanje bhalondolezya ɨnsɨɨbho zyabho ɨmbiibhi. Ɨpo bhahabha bhabhomba ɨnongwa ɨzyo saga zikhondɨɨye abhombwe. 29Bhahabha bhamemile ʉbhiibhi ʉwaaji nʉ waaji, bhahabha bhabhomba ɨmbiibhi ɨzyɨ waaji nʉ waaji, nantele bhahabha nʉ wiimi ʉwɨ vintu vyonti. Abhantu ɨbho bhali nɨ jɨɨla, bhahwanza ibho, ilenga, ʉlumanyi nʉ goji. Nantele bhasyebhulo, 30nantele bhi‑ilenga, bhahumʼviitilwa ʉNgʉlʉbhɨ, saga bhasaaga ɨnongwa ɨzya bhamwabho, nantele bhali bhantu bhɨ mashento na hwibaade. Hu habhaazyo honti bhahwanza idala ijenu ɨlya‑abhombe ɨmbiibhi. Saga bhahubhatiniha abhapaafi bhaabho, 31bhantu bhapezu, saga bhabhomba alɨngaane na malagano gaabho, saga bhali nʉ kʉndwa awe ɨnkʉmbʉ. 32Abhantu ɨbho bhamɨɨnye shinza huje ʉmuntu nkashele abhomba ɨmbombo ɨmbiibhi nanshi ɨzyo, akhondɨɨye ayaziwe nʉ Ngʉlʉbhɨ. Hwope ɨsho saga bhasaajila ɨgo! Bhajendeelela abhombe ɨmbiibhi, nantele bhahubhaseshela abhantu ɨbho bhabhomba ɨmbombo ɨmbiibhi nanshi ɨzyo.

Currently Selected:

ABhaluumi 1: SBK

Highlight

Copy