ƗMbombo ɨzya Bhasontwa 19

ɄPaulo alʉmbɨɨlɨla hwi‑ibooma ɨlyɨ Efeeso

1Hu habhaazyo ɨho ʉApoolo lwa‑ali hu mukowa ʉgwɨ Akaaya, hwi‑ibooma ɨlyɨ Kolinto, ʉPaulo ahashʉʉla mu mukowa ʉgwɨ Aasiya, ahafiha hwi‑ibooma ɨlyɨ Efeeso. Hu habhaazyo lwa‑ali hu Efeeso, ahakhomaana na bhooziwa bhamo, 2ahabhabhʉzɨɨlɨzya ahaga, “Lwa mwamʼmwɨtɨha ʉYeesu, bhʉlɨ, mwahambɨlɨɨye ʉMʼpepo ʉMʼfinjile?” Bhahamʼmwamula bhahaga, “Ndaali, hwope na hwʉmvwe huje, alɨɨho, saga tʉmvwɨzye lwonti.” 3Ahabhabhʉzɨɨlɨzya nantele ahaga, “Ɨshi, mwahoziiwe hu lwozyo bhʉlɨ?” Bhahamʼmwamula bhahaga, “Tahoziiwe hu lwozyo ʉYoohani lwa‑ahalʉmbɨlɨlaga.”

4ɄPaulo ahabhabhʉʉzya ahaga, “ɄYoohani ahabhozyaga abhantu abhonesye huje, bhalaatile hu mbiibhi zyabho. Ahabhabhʉzyaga huje, bhamʼmwɨtɨhaje ʉyo wa‑ahwɨnza hwisinda lyakwe. Ʉyo yʉ Yeesu.” 5Abhantu bhaala lwa bhʉmvwa ɨnongwa ɨzyo, bhope bhahoozewa hwi‑itaawa lya Mwɨnɨ ʉYeesu. 6ɄPaulo lwa wabhabhɨɨshɨla ɨnyoobhe zyakwe, ʉMʼpepo ʉMʼfinjile ahabhiishila, bhahanda ayanje hu njango ɨnjenu, na hwande akuwe. 7Abhantu ɨbho bhahali bhalume ishʉmi na bhabhɨɨlɨ ɨshi.

8Hu habhaazyo ahɨ meezi gataatu, ʉPaulo ahatʉʉhaga mu nyumba ɨya‑apuutile na‑amanyiilile. Ʉmwo ahayangaga na bhantu hu dandamazu, ahajehanaga nabho huje, bhɨɨtɨshe ɨnongwa ɨzyɨ wumwɨnɨ ʉwa Ngʉlʉbhɨ. 9Leelo, bhamo bhahabha na mooyo amakhome, bhahakhaana ahumʼmwɨtɨshe, bhahanda alije Idala lya Mwɨnɨ ʉYeesu pitagaalila lyɨ lubhʉngaano. Ɨpo ʉPaulo ahabhaleha, ahabheega abhooziwa, ahanda hubhamanyizye ɨnsiku zyonti mu nsukuulu ya yahali ya muntu ʉyo bhahagaga Tilaano. 10ɄPaulo ahajendeelela abhombe ɨsho hu maaha gabhɨɨlɨ. Ɨpo bhonti bha bhahakhalaga mu mukowa ʉgwɨ Aasiya, aBhayahuudi peeka na bha saga Bhayahuudi, bhahʉmvwa ɨNongwa ɨNyinza ɨzya Mwɨnɨ ʉYeesu.

Abhaana bha Sikewa bhajezya ahwefwe ipepo

11Hu habhaazyo ɨho, ʉNgʉlʉbhɨ ahabhombaga amayele amagoosi ashilile hwa Paulo. 12Abhantu bhaheegaga ʉtwenda awe amenda agɨ mbombo ɨgo ʉPaulo ahakwataga, bhahatwalaga hwa bhabhinu, bhope bhahaponaga ʉbhinu waabho, nantele amapepo gahabheepaga.

13-14Pahali na Bhayahuudi bhamo bha bhahajendaga ʉhwu nʉ‑ʉhwo, ahwefwe amapepo mwa bhantu. Bhamo mwɨ‑ɨbho bhahali bhaana pʉnga (7) abhɨ shilume bha muntu wa bhahagaga Sikewa, ʉnʼsayi ʉnʼgoosi ʉmo wa Bhayahuudi. Isiku limo bhahajela abhombele itaawa lya Mwɨnɨ ʉYeesu hugadaje amapepo, bhahaga, “Hwi‑itaawa lya Yeesu ʉyo ʉPaulo ahunʼnʉmbɨɨlɨla, tihubhadaga huje, fumi hwa muntu ʉnʉ.” 15Leelo ipepo limo lyahabhaamula lyahaga, “ɄYeesu ɨmʼmɨɨnye, wope ʉPaulo ɨmʼmɨɨnye, leelo amwɨ mwɨ bheenu?” 16Ɨpo ʉmuntu ʉla wa‑ahali ni‑ipepo, ahabhatomoshela bhonti, ahabhamena hwi‑ikhone. Ahabhakhoma haani, ahabhavwalazya mu mabɨlɨ, bhope bhahafuma mu nyumba sha bhali shibwida, bhahashɨmbɨla.

17Ɨnongwa ɨzyo zyahamanyiha haani hwa Bhayahuudi na bha saga Bhayahuudi bhonti bha bhahakhalaga hu Efeeso. Bhonti bhahakhatwa nʉ wooga, bhahamʼmwamihaga ʉMwɨnɨ ʉYeesu. 18Abhantu abhinji bha bhahamʼmwɨtɨɨshe ʉYeesu, bhahalaata pitagaalila lya bhantu ɨmbiibhi zyabho ɨzyo bhahabhombile. 19Abhinji mwɨ‑ɨbho bhahabhombaga ʉlozi. Bhahaleeta ɨvitaabu vyabho ɨvyo vyahabhavwaga amanyile abhombe ʉlozi, bhahavipemba mu mwoto pitagaalila lya bhantu bhonti. Lwa bhabhaazya ɨvitaabu viila, bhahavyaga vifisya ɨmpɨɨya ɨnyinji haani, ɨelufu amashʉmi gasaanu (50,000) hu mpɨɨya yaabho.#19:19 mpɨɨya yaabho Ɨmpɨɨya yeeka yahalɨngaanaga nʉ mʼposheelo ʉgwa humʼposheezye ʉmuntu hwi‑isiku lyeka. 20Hu nongwa ɨyo, ɨNongwa ɨNyinza ɨzya Mwɨnɨ ʉYeesu zyahonjelelaga anyampaane mwa bhantu na hwonjeelele abhe ni‑ikhone tee.

Ʉvwalanganu ʉgoosi hwi‑ibooma ɨlyɨ Efeeso

21Lwa gaashila ɨgo gonti, ʉPaulo ahasɨɨbha huje, abhale hwi‑ibooma ɨlyɨ Yelusaleemu ashilile hu mabooma aga hu mukowa ʉgwɨ Makedoniya nʉ gwɨ Akaaya. Ahayanga ahaga, “Hu habhaazyo lwa nahayifiha hu Yelusaleemu, ɨhwanziwa afishe na hwi‑ibooma ɨlyɨ Luumi.” 22Ɨpo ahabhasonteelezya abhantu bhabhɨɨlɨ mwa bhaala bha bhahamʼmwavwaga, ʉTiimoti nʉ Elaasito, huje bhanʼtagaalile abhale hu Makedoniya. Ʉmwene ʉPaulo ahasagala hu mukowa ʉgwɨ Aasiya hu habhaazyo hashe.

23Hu habhaazyo ɨho, pa Efeeso pahafumila ʉvwalanganu ʉgoosi haani, hu nongwa yi‑Idala lya Mwɨnɨ ʉYeesu. 24Ɨshi mwi‑ibooma ɨlyo mwahali nʉ muntu ʉmo wa‑ahasyanaga ɨholanyo hu majela agɨ mpɨɨya ɨnyinji. Itaawa lyakwe ahali yʉ Demetiliiyo. Ahasyanaga ʉtukholanyo twa tukholɨɨne nɨ nyumba ɨmfinjile ɨya ngʉlʉbhɨ waabho ʉwɨ shishɨ ʉAliteemi. Ɨmbombo ɨyo yahabhapeelaga abhasyani bhaakwe ɨmpɨɨya zinyinji ɨzya pa mwanya. 25ɄDemetiliiyo ahabhabhʉngaanya abhasyani bhaakwe, peeka na bhabhomba mbombo abhamwabho bha bhahabhombaga ɨmbombo ɨyo. Ahabhabhʉʉzya ahaga, “Mubhalume amwɨ, mumɨɨnye shinza huje, tihuzyaga ɨmpɨɨya ɨnyinji afumilane nɨ mbombo ɨnɨ. 26Ɨshi leelo, muhwʉmvwa na‑alole ɨsho ʉPaulo sha‑ahubhakʉndɨɨlɨzya na hubhagalulanye abhantu abhinji pa Efeeso ɨpa, nantele na bhantu abhinji abhɨ mbali zyonti ɨzya hu Aasiya. Ahubhakʉndɨɨlɨzya abhantu huje, ‘Mwɨtɨshe aje, ɨholanyo zya zigombwa na bhantu, saga bhangʉlʉbhɨ bhɨ lyoli.’ 27Ɨshi, ɨhwogopa huje ɨmbombo yeetu ɨnɨ bhanza huyisyonshele haani. Saga ɨsho lwene, lyoli nɨ nyumba ɨmfinjile ɨya ngʉlʉbhɨ weetu ʉnʼgoosi ʉAliteemi yope bhanza huyisyonshele. Ʉngʉlʉbhɨ ʉnʼgoosi ʉAliteemi, ʉyo tihumʼpuuta mu mukowa ʉgu gwonti ʉgwɨ Aasiya na mu nsi ɨzyɨnjɨ zyonti, ɨnshɨnshɨ yaakwe yahayimaliha lwonti.”

28Abhasyani abhamwabho lwa bhʉmvwa ɨnongwa ɨzyo, bhahaviitwa haani. Bhahabwagaga ibwago bhahagaga, “ɄAliteemi ʉwa hu Efeeso yʉ nʼgoosi!” 29Ibooma lyonti ɨlya hu Efeeso lyahabha nʉ vwalanganu. Bhahabhakhata abhantu bhabhɨɨlɨ abha hu Makedoniya, ʉGaayo nʉ Alisitaalʉko. Ɨbho bhahashʉʉlaga peeka nʉ Paulo. Bhahabhala nabho pa lubhʉngaano. 30ɄPaulo ahanzaga huje, abhale pa lubhʉngaano lwa bhantu bhaala, leelo abhooziwa bhahanʼkhaana. 31Hwope bhamo mu bhalongozi abha hu mukowa ʉgwɨ Aasiya bha bhahali bhamanyani bhaakwe, bhope bhahasonteelezya ɨnongwa ɨzya hunʼsunde huje, agandi abhale pa lubhʉngaano paala.

32Lwʉnʉʉlwo abhantu bha bhahabhʉngɨɨne paala, bhahazyanguuhana haani. Bhahabwagaga ibwago haani, bhamo bhahayangaga ɨli, bhamo liila. Abhinji saga bhahazimɨɨnye zya zibhabhʉngɨɨnye peeka. 33ABhayahuudi bhahamʼmwɨmɨɨlɨsya ʉmuntu ʉyo bhahagaga Alekizanda pitagaalila lya bhantu bhaala. Abhantu abhanjɨ mu lubhʉngaano luula bhahanʼkwepela ɨzya‑ayanje. Wope ahavwenzya ʉnʼkhono hu mwanya huje bhapʉʉme myɨ, pɨpo ahanzaga ahwiyʉʉmɨle. 34Leelo, ɨmpʉga ɨla lwa yaamanya huje Nʼnyahuudi, bhonti peeka bhahabwaga ibwago hu masaala gabhɨɨlɨ, bhayiga, “ɄAliteemi ʉwa hu Efeeso yʉ nʼgoosi!”

35Hu malishilo, ʉnʼsimbi ʉnʼgoosi ʉwi‑ibooma liila ahabhapʉmɨɨlɨzya abhantu bhaala ahaga, “Mubhantu amwɨ mubha pa Efeeso, nʉʉmo wa saga amɨɨnye huje, ibooma ɨli lyɨlyo lihwenya ɨnyumba ɨmfinjile ɨya ngʉlʉbhɨ ʉnʼgoosi ʉAliteemi, peeka nɨ holanyo yaakwe ɨyo yahalagɨɨye afume hu mwanya. 36Nʉʉmo ʉmuntu wa‑abhajiiye huzikhaane ɨnongwa ɨzi! Ɨshi, amwɨ muhwanziwa apʉʉme myɨ, musahabhombe lyolyonti sinta asɨɨbhe nasʉʉti. 37Mubhaleetile ɨpa abhantu ɨbha, leelo saga bhiibhile ahantu nahamo mu nyumba ɨmfinjile ɨya ngʉlʉbhɨ weetu, nantele hwope saga bhanʼnijile ʉngʉlʉbhɨ weetu ʉwɨ shishɨ. 38Nkashele ʉDemetiliiyo na bhasyani abhamwabho bhali nɨ nongwa zimo hwa bhantu ɨbha, bhahwanziwa hubhataake pilongolela lya bhitongwa abhɨ ndajizyo. Abheene bhamɨɨnye abhombe shɨ‑ɨhwanziwa. 39Nkashele muli nɨ nongwa ɨyɨnjɨ, muyitwale pitagaalila lyɨ lubhʉngaano ʉlwi‑ibooma lwa luhwanziwa nɨ ndajizyo zyetu. 40Ɨshi nanshi sha tibhombile ɨleelo, zigataazya ataakiwe nʉ longozi ʉwɨ Shiluumi huje, tasonzya ʉvwalanganu ʉgoosi. Nkashele bhatitaake, saga tili ni‑izwi ɨlya hwamule hu vwalanganu ʉwu.” 41Ʉnʼsimbi lwa waamala ayanje ɨsho, ahabhabhʉʉzya abhantu huje, bhabhalaje humwabho. Bhope bhahasogola.

Currently Selected:

ƗMbombo ɨzya Bhasontwa 19: SBK

Highlight

Copy