ƗMbombo ɨzya Bhasontwa 18

ɄPaulo mwi‑ibooma ɨlyɨ Kolinto

1Ɨgo lwa gaashila, ʉPaulo ahasogola hwi‑ibooma ɨlyɨ Aseene, ahabhala hwi‑ibooma ɨlyɨ Kolinto. 2Ahakhomaana nʉ Nʼnyahuudi ʉmo, ʉyo itaawa lyakwe ahali yʉ Akila, ʉyo ahapapwilwe hu mukowa ʉgwɨ Ponto. ɄAkila peeka nʉ nʼshɨ waakwe ʉPulisiila bhahafumile hwi‑ibooma ɨlyɨ Luumi mu nsi ɨyɨ Itaaliya. Bhahafumile ʉhwo hu habhaazyo hashe lwene lwa haashila, pɨpo ʉmwɨnɨ ʉKilawudiyo#18:2 ɄKilawudiyo ahali mwɨnɨ nʼgoosi wa Bhaluumi. ahalajiziizye huje, aBhayahuudi bhonti bhasogole hu Luumi. Ɨshi ʉPaulo ahabhala hunʼnamushe ʉAkila nʉ nʼshɨ waakwe. 3Abheene bhahabhombaga ɨmbombo ɨya‑asone ɨnkwembe nanshi ʉmwene. Hu nongwa ɨyo, ahanda akhale nabho na‑abhombe ɨmbombo ɨla nabho. 4Shila lisiku ɨlyɨ Sabaato, ʉPaulo ahatʉʉhaga mu nyumba ɨya‑apuutile na‑amanyiilile, ahajehanaga na Bhayahuudi na bha saga Bhayahuudi huje, bhope bhamʼmwɨtɨshe ʉYeesu.

5Hu habhaazyo hɨnɨɨho ʉSiila nʉ Tiimoti bhahafiha afume hu mukowa ʉgwɨ Makedoniya. Ɨpo ʉPaulo ahanda amanyizye izwi lya Ngʉlʉbhɨ hu habhaazyo haakwe honti hwa Bhayahuudi abhamwabho. Ahalʉmbɨlɨlaga na hubhabhʉʉzye huje, ʉYeesu yʉ Mʼfyʉli. 6Leelo, aBhayahuudi bhahanʼkhaana na hunʼnije ʉPaulo. Ɨpo ahakunyunta inkondi mu menda gaakwe,#18:6 Ahakunyunta inkondi mu menda gaakwe hwa huje yʉ Ngʉlʉbhɨ yʉʉyo wa‑abhakhɨɨne. ɄPaulo ahabhombile ɨsho alolesye huje, ʉNgʉlʉbhɨ abhalolile aBhayahuudi ɨbho nanshi saga bhantu bhaakwe. ahabhabhʉʉzya ahaga, “Nkashele ʉNgʉlʉbhɨ ahubhafunda, lwenyu mwɨmwɨ! Saga alɨɨho ʉwa humbune anɨ hwi‑izwi ɨlyo. Afume sanyʉʉnʉ, ɨmbala hwa bhantu bha saga Bhayahuudi hubhalʉmbɨɨlɨle.”

7Ɨpo ʉPaulo ahafuma mu nyumba ɨya‑apuutile na‑amanyiilile, ahabhala, ahatʉʉha mu nyumba ya muntu ʉmo wa saga Nʼnyahuudi leelo wa‑ahunʼtiniha ʉNgʉlʉbhɨ. Itaawa lyakwe ahali yʉ Tiito Yuusito. Ɨnyumba ɨyo yahapalamɨɨne nɨ nyumba ɨya‑apuutile na‑amanyiilile. Mwʉmwo ʉPaulo ahajendeelela alʉmbɨɨlɨle ɨNongwa ɨNyinza ɨzya Mwɨnɨ ʉYeesu. 8Ʉnʼnongozi ʉwɨ nyumba ɨla ɨya‑apuutile na‑amanyiilile, ʉyo itaawa lyakwe ahali yʉ Kilisipo, ahamʼmwɨtɨha ʉMwɨnɨ ʉYeesu, peeka na bhantu bhonti abha mu khaaya yaakwe. ABhakolinto abhinji lwa bhahʉmvwaga amazwi ga Paulo, bhope bhahagɨtɨhaga na hwozewe.

9Isiku limo nʉsiku, ʉMwɨnɨ ʉYeesu ahamʼmʉʉzya ʉPaulo mu ndoleshelo ahaga, “Ʉgandi ahwogope, ʉjendelelaje alʉmbɨɨlɨle, ʉgandi apʉʉme, 10pɨpo anɨ ɨndi peeka naawe. Nʉʉmo ʉmuntu wa‑agajezya aje, ahuvwalazye, pɨpo mwi‑ibooma ɨli ɨmbasaluuye abhantu abhinji bhabhe bhasundwe bhaanɨ.” 11Ɨpo ʉPaulo ahakhala ʉmwaha gweka na meezi nʼtanda hu Kolinto, ahabhamanyizyaga abhantu izwi lya Ngʉlʉbhɨ.

12Ɨshi ʉGaliiyo lwa wabha nʼgoosi wɨ mukowa ʉgwɨ Akaaya, aBhayahuudi bhahajeehana hu mwoyo gweka hunʼkhate ʉPaulo. Bhahanʼtwala hunʼtaake pitagaalila lya Galiiyo. 13Bhahanʼtaaka ʉPaulo bhahaga, “Ʉmuntu ʉnʉ ahubhamanyizya abhantu huje, bhamʼpuutaje ʉNgʉlʉbhɨ hwi‑idala lya saga lilɨngaana nɨ ndajizyo.”

14ɄPaulo lwa‑ahwanza ayanje, ʉGaliiyo ahabhabhʉʉzya aBhayahuudi ahaga, “Ʉmvwaji amwɨ muBhayahuudi! Nkashele lyoli muhunʼtaaka ʉmuntu ʉnʉ hu nongwa yɨ nanzi, awe yɨ mbiibhi, nɨnzaga hubhʉmvwe. 15Leelo, pɨpo mudaliihana hu nongwa yɨ mazwi, amataawa nɨ ndajizyo zyenyu, muzimale mwɨmwɨ. Anɨ ndaali huje, ɨmbe nʼnonzi wɨ nongwa ɨzyo.” 16Ɨpo ʉGaliiyo ahabhalajizya abhalwi bhaakwe huje, bhabhadaje. Bhope abhalwi bhahabhadaga aBhayahuudi ɨbho mwi‑ikoloti. 17Ɨpo ɨmpʉga yonti yahanʼkhata ʉSositeene,#18:17 Bhaazya 1 aBhakolinto 1:1. Pamo ʉSositeene yʉ muntu weeka nʉ‑ʉnʉ wa bhahunʼtaha ɨpa. ʉnʼnongozi ʉwɨ nyumba ɨya‑apuutile na‑amanyiilile, bhahanda hunʼkhome pitagaalila li‑ikoloti. Leelo ʉGaliiyo saga ahasaagaga zyonti zya bhahabhombaga.

ɄPaulo aweela hwi‑ibooma ɨlyɨ Antiyokiya

18ɄPaulo ahajendeelela akhale hu Kolinto ɨnsiku zinyinji. Pamandɨ, ahabhalaga abhooziwa abhamwabho, ahabhala peeka nʉ Pulisiila nʉ Akila mwi‑ibooma ɨlyɨ Kenkeleeya. Ʉhwo ʉPaulo ahasyengula isisi hwi‑itwe#18:18 ahasyengula isisi hwi‑itwe Hu habhaazyo aBhayahuudi ha bhahafinjile nʉ Ngʉlʉbhɨ hu nongwa zimo, bhahasyengulaga isisi hwi‑itwe abhonesye huje bhamalile ʉlufingo. hu nongwa ya‑aje, amalɨzɨɨzye ʉlufingo lwakwe. Ɨpo ʉPaulo, ʉAkila nʉ Pulisiila bhahatʉʉha mu meeli abhale hu mukowa ʉgwɨ Siiliya. 19Lwa bhaafiha hwi‑ibooma ɨlyɨ Efeeso, ʉPaulo ahanʼneha ʉPulisiila nʉ Akila huje, bhakhale ʉhwo. Ʉmwene ahatʉʉha mu nyumba ɨya‑apuutile na‑amanyiilile, ahabhalʉmbɨɨlɨla aBhayahuudi abhamwabho. 20Ɨpo bhahanʼnaabha ʉPaulo huje, ayonjeezye ɨnsiku ɨzya‑akhale humwabho, leelo ʉmwene ahakhaana. 21Ahabhalaga, ahabhabhʉʉzya ahaga, “Nkashele ʉNgʉlʉbhɨ asʉngwɨlwe, nahayiweela nantele huliimwɨ.” Ɨpo ahasogola pa Efeeso nɨ meeli.

22ɄPaulo lwa waafiha mwi‑ibooma ɨlyɨ Kayisaliiya, ahayileha ɨmeeli. Ɨpo ahabhala hu Yelusaleemu hubhalamushe abhooziwa, nantele ahabhala hwi‑ibooma ɨlyɨ Antiyokiya. 23Lwa waakhala hu habhaazyo hashe, ahasogola, ahaweela hu mukowa ʉgwɨ Galatiya nʉ gwɨ Filigiya, ahabhajinjizyaga amooyo abhooziwa bhonti.

ɄApoolo alʉmbɨɨlɨla hu Efeeso

24Hu habhaazyo ɨho, ʉNʼnyahuudi ʉmo ʉyo itaawa lyakwe ahali yʉ Apoolo, wa‑ahapapwilwe mwi‑ibooma ɨlyɨ Alekizandiliya, ahabhala hu Efeeso. Ahali mʼmanyiihanyi wa‑ayanje, nantele ahazimɨɨnye haani ɨNsimbo ɨMfinjile. 25Ʉmuntu ʉyo ahamanyiziiwe Idala lya Mwɨnɨ ʉYeesu. Wope ahabhamanyizyaga abhantu ɨNongwa ɨNyinza ɨzya Yeesu hu lyoli, pɨpo ʉmwoyo gwakwe gwahapulupuutaga. Hwope ɨsho ahamɨɨnye lwʉ lwozyo lwa Yoohani lwene. 26Ahatʉʉha mu nyumba ɨya‑apuutile na‑amanyiilile, ahanda amanyizye ɨNongwa ɨNyinza ɨzya Yeesu hu dandamazu. ɄPulisiila nʉ Akila lwa bhʉmvwa ɨmanyizyo zya Apoolo, bhahamʼmwega, bhahabhala nawo humwabho, bhahamʼmanyizya idala ɨlyo lya Ngʉlʉbhɨ, nka‑alimanye shinza haani.

27Pamandɨ ʉApoolo ahanzaga abhale mu mukowa ʉgwɨ Akaaya, abhooziwa abhamwabho bhahanʼjinjizya ʉmwoyo. Bhahabhasimbila ɨkalaata abhooziwa abhamwabho abha hu Akaaya huje, bhamʼmwambɨɨlɨle shinza. Lwa waafiha huula, ahabhaavwa haani abhooziwa hu mpyana ya Ngʉlʉbhɨ. 28Ahabhamenaga aBhayahuudi abhamwabho hu dandamazu pa lubhʉngaano lwa bhantu, hwi‑idala ɨlya hubhasimishizye nɨ Nsimbo ɨMfinjile huje, ʉYeesu yʉ Mʼfyʉli.

Currently Selected:

ƗMbombo ɨzya Bhasontwa 18: SBK

Highlight

Copy