ƗMbombo ɨzya Bhasontwa 20

ɄPaulo abhala nantele hu Makedoniya na hu Yunaani

1Ʉvwalanganu wuula lwa wamaliha hu Efeeso, ʉPaulo ahabhabhʉngaanya abhooziwa bha huula. Ahabhajinjizya amooyo, ahalagana nabho, ahasogola, ahabhala hu mukowa ʉgwɨ Makedoniya. 2Ahashila mu mukowa ʉgwo, ahabhabhʉzyaga abhooziwa amazwi gaminji aga hubhajinjizye amooyo. Pamandɨ ahafiha mu nsi ɨya Bhayunaani.#20:2 nsi ɨya Bhayunaani Ɨli litaawa lyɨnjɨ ɨlyɨ mukowa ʉgwɨ Akaaya. 3Ʉhwo ahakhala ameezi gataatu. Hu habhaazyo ɨho ahahwilɨnganyaaga aje, abhale hu mukowa ʉgwɨ Siiliya hwi‑idala ɨlyɨ meeli. Leelo ahamanya huje, aBhayahuudi bhamo bhahunʼsɨbhɨɨlɨla humʼmombe shibhiibhi hu habhaazyo ha‑ashʉʉla. Ɨpo ahajenda lwɨ manama aweele, ahashilila hu Makedoniya. 4Hu habhaazyo ɨho, ʉPaulo ahashʉʉlɨle peeka nʉ Sopaatulo ʉmwana wa Piilo ʉwa hu Belooya, ʉAlisitaalʉko nʉ Sekundo abha hu Tesaloniike, ʉGaayo ʉwa hu Deelibe, ʉTiimoti ʉwa hu Lisitila, nʉ Tikiiko nʉ Tuloofimo abha hu Aasiya. 5Ɨbho bhonti bhahatitagaalila, bhahabhala hutigʉʉlɨle mwi‑ibooma ɨlyɨ Tolowa. 6Ahabhaazyo ahɨ shikulukulu ɨshɨ ntogito zya saga nsafu lwa hamaliha, atɨ tahasogola ʉhwu hwi‑ibooma ɨlyɨ Filiipi hwi‑idala ɨlyɨ meeli. Ɨpo tahashʉʉla mu nsʉmbi ɨnsiku zisaanu, tahafiha hu Tolowa. Ʉhwo hwa tahakhomaana na bhamwetu bha bhahatagaliiye, tahakhala ɨnsiku pʉnga (7).

ɄPaulo ahunʼzyʉsya ʉYeetiko

7Pi‑isiku ɨlya Pamulʉngʉ nalyabheela#20:7 Pamulʉngʉ nalyabheela Ɨnsimbo zimo ɨzyɨ mandɨ ɨzyɨ Shiyunaani ziyiga, pa Shiyeeluka. lwa lyafiha, tahabhʉngaana huje, tilye peeka ɨShalye ɨShifinjile. ɄPaulo ahanda abhalʉmbɨɨlɨle abhantu, ahajendeelela, ahafiha nʉsiku paahati, pɨpo ahanzaga asogole ɨndaabhɨ yaakwe. 8Mu mpanda ɨya hu mwanya mu nyumba ɨnjeleehanye ʉmwo tahabhʉngɨɨne, mwahali ni‑ilyoto haani, pɨpo mwahaahaga ɨhozyo zinyinji. 9Ʉnʼsahaala ʉmo, ʉyo itaawa lyakwe ahali yʉ Yeetiko, ahakhɨɨye pi‑idiliisha ɨlya hu mpanda. ɄPaulo lwa‑ahajendelelaga ayanje hu habhaazyo ahatali haani, ʉYeetiko ahanda asʉpɨɨle hashe hashe, ahagona ʉtulo. Lwa‑ali mu tulo haani, ahagwɨla hwʉnzɨ afume pi‑idiliisha lyɨ nyumba ɨnjeleehanye ɨya taatu. Abhantu lwa bhahumʼmʉʉsya, bhahamʼmwaga afwiye. 10Ɨshi ʉPaulo ahiiha pa nsi, ahasugamila pa nʼsahaala ʉla, ahamʼpagatila, ahabhabhʉʉzya abhantu ahaga, “Musahoogope, ʉnʉ mwʉmi lwene!” 11Ɨpo ʉPaulo ahazʉbha nantele hu mpanda ɨla, bhahalya ɨshalye, nantele bhahalya peeka ɨShalye ɨShifinjile. Ahajendeelela alʉmbɨɨlɨle hu habhaazyo ahatali afishe lwa hwasha, ɨpo ahasogola. 12Abhantu bhaala bhahasha haani, bhahanʼnoleezya ʉnʼsahaala ʉla hu khaaya, sha‑ali mwʉmi.

ɄPaulo ahubhalaga abhagoosi abhɨ shibhanza ɨsha hu Efeeso

13ɄPaulo ahamuuye ashʉʉle abhale mwi‑ibooma ɨlyɨ Aasosi. Ahanzaga huje, timʼmwaje ʉhwo, nka timʼmweje nɨ meeli. Ɨpo atɨ tahatagaalila abhale hwi‑ibooma ɨlyo nɨ meeli. 14Lwa watangaana naatɨ hu Aasosi huula, tahamʼmwega mu meeli, tahabhala peeka hwi‑ibooma ɨlyɨ Miteleene. 15Isiku ɨlya bhɨɨlɨ tahajendeelela ashʉʉle nɨ meeli, tahapalamila panshɨnjɨ yɨ nsi ɨyɨ Kiiyo ɨyo ɨli paahati yɨ nsʉmbi. Isiku ɨlya taatu tahafiha mu nsi ɨyɨ Saamo ɨyo ɨli paahati yɨ nsʉmbi.#20:15 Ɨnsimbo zimo ɨzyɨ mandɨ ɨzyɨ Shiyunaani zihwonjeezya amazwi ɨga, tahakhala hwi‑ibooma ɨlyɨ Tilogiliiyo. Isiku ɨlya wunɨ tahafiha mwi‑ibooma ɨlyɨ Mileeto. 16ɄPaulo ahamuuye ashʉʉle nɨ meeli sinta ashilile hwi‑ibooma ɨlyɨ Efeeso huje, agandi akhaabhe hu mukowa ʉgwɨ Aasiya. Ahali lubhilo, ahanzaga afishe hwi‑ibooma ɨlyɨ Yelusaleemu hu habhaazyo ahi‑isiku ɨlyɨ Pentekoositi sha lisɨɨle afishe.

17ɄPaulo hu habhaazyo lwa‑ali pa Mileeto, ahabhasonteelezya abhantu hubhakwizye abhagoosi abhɨ shibhanza ɨsha hwi‑ibooma ɨlyɨ Efeeso. 18Lwa bhaafiha, ahabhabhʉʉzya ahaga, “Amwɨ mumɨɨnye ɨnjendo zyanɨ hu habhaazyo honti ha nahakhalaga naamwɨ, afume isiku lya nahafishile ɨpa pa mukowa ʉgu ʉgwɨ Aasiya. 19Nahamʼmombelaga ʉMwɨnɨ ʉYeesu hu woloolo wonti, hu mansozi na hu malabha ɨgo gahanaajile hu nongwa yɨ nsɨɨbho ɨmbiibhi ɨzya Bhayahuudi bhamo. 20Mumɨɨnye huje, lwa nahabhamanyizyaga pa lubhʉngaano ʉlwa bhantu na mu nyumba zyenyu, nahahwifumiizye abhalʉmbɨɨlɨle lyolyonti ɨlyo lyɨnzaga hubhaavwe amwɨ. 21Nahabhasimishizyaga bhonti, aBhayahuudi na bha saga Bhayahuudi huje, ‘Mulaataje ɨmbiibhi zyenyu, munʼgalushile ʉNgʉlʉbhɨ, na humʼmwɨtɨshe ʉMwɨnɨ weetu ʉYeesu ʉKilisiti.’

22Ɨshi tejeelezyi! ɄMʼpepo ʉMʼfinjile andajiziizye anɨ huje, ɨmbale hwi‑ibooma ɨlyɨ Yelusaleemu, hwope saga ɨmɨɨnye ɨzyo zyahayihunaaga ʉhwo. 23Lyɨ‑ɨmɨɨnye lwene lya lyɨli, mu mabooma mwonti mwɨ‑ɨshila, ʉMʼpepo ʉMʼfinjile andolesiizye huje, ɨhoobhe na malabha vihungʉʉla. 24Leelo, anɨ saga ɨsaaga lwonti ʉwʉʉmi waanɨ. Igoosi haani huliinɨ lya lyɨli, ɨmale ɨmbombo ya nahapewiilwe nʉ Mwɨnɨ ʉYeesu, ɨmbombo ɨya hubhalʉmbɨɨlɨle abhantu ɨNongwa ɨNyinza ɨzyɨ mpyana ya Ngʉlʉbhɨ.

25Nahashilaga huliimwɨ abhalʉmbɨɨlɨle ɨnongwa ɨzyɨ wumwɨnɨ ʉwa Ngʉlʉbhɨ. Leelo ɨshi tejeelezyi! Ɨmɨɨnye huje, amwɨ mwenti saga mwahayihundola nantele dumu. 26Ɨshi ɨhubhasimishizya mwenti isiku ɨlyɨ leelo ɨli huje, nkashele ʉmuntu waafwa mwaliimwɨ sinta lwɨtɨho, ɨpo saga nɨɨnɨ, lwakwe. 27Nahahwifumiizye hubhalʉmbɨɨlɨle zyonti ɨzyo ʉNgʉlʉbhɨ zya‑ahasʉbhɨɨye hu kʉndwe waakwe. 28Muhwidiimaje mwɨmwɨ, na‑adiime yope ɨmpʉga yonti ɨya bhooziwa ɨyo ʉMʼpepo ʉMʼfinjile ya‑ahabhabhɨshɨɨye amwɨ mubhe bhenyeelezi. Mushenyaaje shinza ɨshibhanza sha Ngʉlʉbhɨ ɨsho ahashigombʉʉye hwi‑idanda lya Mwana waakwe. 29Ɨmɨɨnye huje, lwa nasogola, abhamanyizyi abhi‑ilenga bhahayɨnza huliimwɨ. Bhahayibha bhakhali nanshi ɨmbwalonde, saga bhahayihuyilolela ɨnkʉmbʉ ɨmpʉga ɨya bhooziwa. 30Nantele, hwope afume mwaliimwɨ mwɨmwɨ, bhahayifumila abhantu bha bhahayiyangaga ɨnongwa ɨzi‑ilenga huje, bhabhateezye abhooziwa, nka bhabhabhɨnjɨlɨzyaje abheene. 31Ɨshi lyoli, mubhe maaso na bhantu ɨbho! Izuhaji huje, hu maaha gataatu pasanya na nʉsiku saga nahalitaga hunʼsunde shila muntu, nantele hu mansozi.

32Ɨhunʼnaabha ʉNgʉlʉbhɨ huje, ʉmwene abhasʉngaje na huje, izwi ɨlyɨ mpyana yaakwe libhalongozyaje. Ɨlyo lya likhone ɨlya hubhajinjizye mu lwɨtɨho na hubhapeele ʉpyano ʉwo ʉNgʉlʉbhɨ wa‑abhabhɨshɨɨye amwɨ peeka na bhasangalusu abhamwenyu bhonti. 33Anɨ nka lumo saga nahasʉngwɨlwe ɨmpɨɨya zya muntu wowonti, awe ɨzahaabu yaakwe, awe ʉmwenda gwakwe. 34Amwɨ mumɨɨnye huje, nahabhombaga ɨmbombo hu nyoobhe zyanɨ ɨzi, huvyaje ɨvintu vya vyahanavwaga anɨ na bhamwetu alembe. 35Mu gonti ɨgo ga nahabhombile, nahabhalolesyaga huje, ɨhwanziwa abhombe ɨmbombo hu dandamazu wonti. Nantele, hwi‑idala ɨlyo, ɨhwanziwa huje, tibhapeelaje abhapɨɨna. Tizuhaje amazwi ga Mwɨnɨ ʉYeesu yʉʉyo ga‑ahajile, ‘Ɨbho bha bhafumya, bhahwambɨɨlɨla ɨnsayo ɨnyinji ashile ɨbho bha bhahwambɨɨlɨla.’ ”

36ɄPaulo lwa waamala ayanje amazwi ɨgo, ahasugamila pa nsi peeka na bhagoosi bhaala bhonti, bhahamʼpuuta ʉNgʉlʉbhɨ. 37Ɨpo bhonti bhahalila haani, bhahanʼnyaayila na‑alagane nawo. 38Ɨnongwa ɨzyo zya zyahabhabhɨɨshɨle huje, bhazugumile haani, zyahali mazwi ɨgo ga‑ahayanjile huje, “Saga mwahayihundola nantele dumu.” Ɨpo bhahanʼnoleezya, bhahamʼfisya pa meeli hwi‑ibooma ɨlyɨ Mileeto.

Currently Selected:

ƗMbombo ɨzya Bhasontwa 20: SBK

Highlight

Copy