Mateus 9
9
Jesus kura un omi ku ka ta yandaba
(Mar 2.3-12; Luk 5.18-26)
1Jesus mbarka na barku, i kamba pa utru banda, i ciga na si propi prasa. E tisil un omi ditadu na kanape ku duensi tok i ka pudi bulbuli kurpu. 2Jesus oja#At 14.9 pa se fe, i fala duenti: “Ten koraẑen, ña fiju; bu pekadu sta ja purdadu.”
3Utru pursoris di lei kumsa na fala na se pensamentu: “E omi i na lebsi Deus.” 4Jesus kunsi#Kap 12.25; 16.7-8; Mar 12.15; Luk 6.8; 9.47; 11.17; Jon 2.24-25; 6.61,64; Apok 2.23 se pensamentu, i punta: “Pabia di ke ku bo na pensa mal na bo kabesa? 5Kal ki mas lestu? Pa fala: ‘Bu pekadu i purdadu,’ o pa fala: ‘Lanta bu yanda’? 6Gosi bo na sibi kuma Fiju di omi ten puder na tera pa purda pekadu.” I rabida i fala duenti: “Lanta,#Jon 5.8-9; At 3.6-8; 9.34 bu toma bu kanape, bu bai pa kasa.” 7I lanta, i bai pa si kasa. 8Jinti ku rumaba la e oja ki kusa, e fika spantadu, e ngaba Deus manera ki da omis ki puder.
Jesus coma Mateus
(Mar 2.14-17; Luk 5.27-32)
9Jesus sai di la, i oja un omi comadu Mateus sintadu na si kau di kobra mpustu; i falal: “Bin no bai.” I lanta, i bai ku el.
10Oca Jesus staba na mesa na kasa di Mateus, i bin tambi manga di kobradur di mpustu ku utru jinti di mau nomi, e sinta na mesa juntu ku Jesus ku si disipulus. 11Fariseus oja ki kusa, e punta disipulus: “Pabia di ke ku bo Mestre na kume juntu ku kobraduris di mpustu ku jinti di mau nomi?” 12Jesus obi ki purgunta, i ruspundi: “Kilis ku san e ka pirsisa di mediku, ma son kilis ku sta duenti. 13Bo bai nsina ke ku signifika#Kap 12.7; Os 6.6 ki kusa ku Deus fala na Skritura: ‘Kusa ku N misti i miserikordia, i ka sakrifisiu.’ N ka bin coma jinti justu, ma N bin coma kilis ku ta fasi pekadu.”
Junjun
(Mar 2.18-22; Luk 5.33-39)
14Disipulus di Jon Batista bai pa Jesus, e puntal: “Pabia di ke ku anos ku fariseus no ta junjuŋa manga di bias, ma bu disipulus ka ta junjuŋa?” 15Jesus punta elis: “Nta jinti ku kumbidadu pa festa di kasamenti e pudi fika tristi nkuantu noivu sta ku elis? Ma tempu na ciga ke na tiradu#At 1.9; 13.1-3; 14.23 noivu; ki ora e ta bin junjuŋa. 16Ningin ka ta bota rumbu di fazenda nobu na kamisa beju, pabia remendu nobu ta rumpi ki parti di kamisa beju; ki kau ku rumpi i ta fika inda mas largu. 17Tambi ningin ka ta pui biñu nobu na saku di kuru#Jos 9.4 beju, pabia saku di kuru beju na bin rumpi; biñu ta darma, saku ta dana, ma biñu nobu ku ka fermenta inda i ta pudu na saku di kuru nobu; de manera tudu dus ka ta dana.”
Fiju di Jairu
(Mar 5.22-43; Luk 8.40-56)
18Oca Jesus na konta elis e kusa, i ciga un ŝef di kasa di juntamentu, i finka juju si dianti, i falal: “Ña fiju muri gosi gosi, ma N misti pa bu bai pui mon riba del pa i pudi bibu.” 19Jesus lanta, i bai ku el, ku si disipulus. 20Un minjer, ku sufri duranti dozi anu di un duensa ku ta fasil pirdi#Sir 15.25 sangi, i ciga tras di Jesus, i toka#Kap 14.36; At 5.15; 19.11-12 na ponta di si ropa, 21pabia i pensa asin: “Si N toka son na si ropa N ta san.” 22Jesus rabida tras, i ojal, i falal: “Ten koraẑen, ña fiju; bu fe#Mar 10.52; Luk 7.50; 17.19 kurau.” Na ki ora minjer san.
23Oca Jesus ciga na kasa di ki ŝef, i oja tokaduris di flauta ku manga di jinti ku na fasiba garandi baruju. 24I fala elis: “Bo sai, pabia bajuda ka muri, i na durmi nan.” E kumsa na fasil trosa. 25Oca ku jinti tiradu fora, Jesus yentra, i pega bajuda na mon; kila lanta janan.#1 Re 17.19-22; 2 Re 4.32-35; At 9.40; 20.10 26Noba de kusa bin laga#Kap 4.24 na ki tera.
Kura di dus segu ku un mudu
27Jesus sai di la. Dus segu fika si tras, e na grita: “Fiju di#Kap 12.23; 15.22; 20.30-31; 21.9,15; 22.41-45 Davi, ten pena di nos!” 28Oca Jesus na yentra na un kasa, ki dus segu bin pertu del. Jesus punta elis: “Bo fia kuma N pudi kura bos?” E falal: “Sin, Siñor.” 29Jesus toka elis na uju, i fala: “Pa i sedu suma#Kap 8.13 ku bo fia.” 30Ki ora uju#Is 32.3 di ki dus segu yabri. Jesus papia risu#Kap 8.4 ku elis, i fala: “Ka ningin sibi de kusa.” 31Ma e sai, e konta fama di Jesus pa tudu parti di ki tera. 32Oca e na saiba pa bai, utru jinti tisi pa Jesus un omi mudu ku tene spiritu mau. 33Jesus serka spiritu mau; omi ku mudu ba kumsa na#Is 35.6 papia. Jinti fika dimiradu tok e na fala: “Nunka i ka ojadu un kusa suma es na Israel.” 34Ma fariseus kumsa na fala: “I ta serka dimonius ku puder di ŝef#Kap 12.23-24; Mar 3.22 di dimonius.”
Kebraduris puku
35Jesus na yandaba#Kap 4.23 na tudu prasas ku tabankas, i nsina na se kasas di juntamentu, i konta Bon Noba di renu, i kura tudu duensa ku frakesa. 36I oja manga di jinti, i sinti garandi pena delis, pabia e na yandaba disorientadu, pirdidu, suma karnel#Kap 10.6; 15.24; Num 27.17; Jer 50.6; Zak 10.2; 13.7 ku ka tene bakiadur. 37I fala si disipulus: “Na bardadi kebur#Jon 4.35-36 i garandi, ma tarbajaduris puku. 38Bo pidi Siñor, ki Dunu di kebur, pa i manda#Luk 10.1-2; At 8.4; 13.1-3 tarbajaduris pa si kebur.”
© 1993-2020, Instituto de Tradução e Alfabetização