Lukas 6:27-49

“N fala bos ku na obi: Bo ama bo inimigus; bo fasi ben pa kilis ku nfastia bos; bo pidi ben pa kilis ku na pidi mal pa bos; bo ora pa kilis ku na trata bos mal. Si algin dau na un ladu di rostu, paral ki utru ladu; kin ku tirau kasaku, ka bu tujil tambi kamisa. Pati tudu kil ku pidiu. Si algin toma kil ki di bo, ka bu torna pidil el mas. Bo fasi utru jinti suma ku bo misti pa e fasi bos. “Si bo ama son kilis ku ama bos, kal gardisimentu ku bo mersi? Tambi jinti di mau nomi ta ama kilis ku ama elis. Si bo fasi ben son pa kilis ku fasi bos ben, kal gardisimentu ku bo mersi? Tambi jinti di mau nomi e ta fasi asin. Si bo pista son kilis ku bo na pera pa e torna paga bos, kal gardisimentu ku bo mersi? Tambi jinti di mau nomi e ta pista se kumpañeris, pa kilas torna bin paga elis. Bo ama bo inimigus, bo fasi ben, bo pista; ka bo pera pagamentu; asin bo ta bin risibi garandi premiu; bo ta sedu fijus di Deus ku sta riba di tudu, pabia el i bon pa kilis ku ingratu i mau. Bo sinti pena di jinti, suma ku bo Pape ta ten pena. “Ka bo julga, bo ka ta julgadu. Ka bo kondena, bo ka ta kondenadu. Bo purda, bo ta purdadu. Bo da, bo ta dadu. E ta kambia bos na panu midida incidu, kalkadu, sakudidu, tok i na darma, pabia ku mesmu midida ku bo midi, el ku bo na torna mididu ku el.” Jesus da elis un komparason, i punta elis: “Un segu pudi gia utru segu? E ka na kai tudu dus na koba? Alunu ka ta mas si pursor, ma si i kaba nsinadu, i ta sedu suma si pursor. “Ke ku manda bu na jubi puera na uju di bu ermon, bu ka rapara padas di po ku sta na bu uju propi? Kuma ku bu pudi fala bu ermon: ‘Ermon, pera N tirau puera ku sta na bu uju’, bu ka oja padas di po ku sta na di bo? Finjidur! Tira purmeru ki po ku sta na bu uju; bu ta pudi oja diritu pa tira puera ku sta na uju di bu ermon. “I ka ten nin un po bon ku ta da fruta ku ka bali, nin un po ku ka bali ku ta da bon fruta, pabia kada po ta kunsidu pa si propi fruta. Bu ka ta kuji figu na pe di spiñu, nin uva na pe di spiñu pretu. Omi bon ta tira bon kusas na bon rikesa di si korson. Omi mau ta tira mau kusas di mal ku junta dentru di si korson. Boka ta fala di kil ku darma na si korson. “Ke ku manda bo na coman ‘Siñor, Siñor,’ ma bo ka ta fasi kil ku N ta fala bos? Tudu kil ku bin pa mi, i obi ña palabra, i fasi suma ku N fala, N na mostra bos kin ki parsi ku el. I parsi ku un omi ku kumpu kasa, i koba baleta fundu, i pui alisersu riba di pedra. Oca riu inci, korenti di yagu bati ku forsa na ki kasa, ma i ka pudi balansal, pabia i staba firmadu riba di pedra. Kil ku obi, ma i ka fasi suma ku N fala, i parsi ku un omi ku kumpu kasa na con, sin alisersu. Korenti di yagu bati ku forsa nel; i kai ki ora, i dana tudu!”