Isaias 39
39
Rei di Babilonia manda ŝefis pa Jerusalen
(2 Re 20.12-19)
1Na ki tempu, rei di Babilonia, Merodak-Baladan,#39.1 Merodak-Baladan o Berodak Baladan (2 Re 20.12) fiju di Baladan, manda kartas ku pursenti pa Ezekias, pabia i obiba kuma kila sta duenti ma i staba ja minjor. 2Ezekias kontenti ku jinti ku mandadu, i mostra elis si armazen di rikesa — prata ku uru, kusas ku ta cera sabi ku minjor purfumus, si armazen#2 Kron 32.5 di material di gera, ku tudu rikesas ki teneba. I ka sobra nada, nin na si kasa, nin na tudu si renu, ku Ezekias ka mostra elis.
3Anunsiadur Isaias bai pa rei Ezekias, i puntal: “Nunde ku ki omis sai? Ke ke falau?” Ezekias ruspundil: “E bin pa mi di un tera lunju, ku sedu Babilonia.”
4Isaias puntal: “Ke ke oja na bu kasa?” Ezekias ruspundil: “E oja tudu kusas ku N tene na ña kasa; nada ka sobra na ña armazens ku N ka mostra elis.”
5Isaias fala Ezekias: “Obi palabra di SIÑOR ku ten tudu puder: 6I na ciga dias ku tudu kusas ku bu tene na bu kasa, ku tudu ku bu papes rakada na armazen, te aos, e na lebadu#Jer 20.5 pa Babilonia. SIÑOR fala kuma nada ka na fika. 7Utru di bu fijus, ku abo propi bu na bin padi, e na lebadu pa sedu funsionarius#2 Re 24.12; Dan 1.1-5 na palasiu di rei di Babilonia.”
8Ezekias fala Isaias: “E palabra di SIÑOR#1 Sam 3.18 ku bu fala i bon.” I fala asin pabia i ntindi kuma, i na ten pas ku suguransa na tudu si tempu.
Currently Selected:
Isaias 39: povB
Highlight
Copy
Compare
Share
Want to have your highlights saved across all your devices? Sign up or sign in
© 1993-2020, Instituto de Tradução e Alfabetização
