Kumsada 49

Jakó anunsia aserka di si fijus

1Dipus, Jakó coma si fijus, i fala elis: “Bo ciga pertu; N na konta bos ke ku na sedu ku bos na dias ku na bin.

2Fijus di Jakó, bo junta, bo sukuta;

bo obi ke ku Israel, bo pape, na fala.

3“Ruben, abo i ña purmeru fiju,#Kap 29.32; Lei 33.6

ña forsa, kumsada di ña puder,

mas di ki tudu na orgulyu,

mas di ki tudu na puder;

4diskontroladu suma yagu,

bu ka na sedu kil mas importanti,

pabia bu subi na kama di bu pape,#Kap 35.22; Lei 27.20

bu kontamina kama di si kumadri.

5“Simeon ku Levi e sedu ermons.#Kap 29.33-34; 34.25-31

Se spadas sedu material di violensia.

6N ka na toma parti na se palabras sukundidu;

ña korson ka na junta#Sal 1.1; 26.4-5,9; 28.3 na se runion,

pabia na se raiba e mata omis;

e pui turus fika manku, son pa se mau brinkadera.

7Pa maldison sta riba di se raiba,

pabia i seduba forti;

i fasi elis pa e sedu duru dimas.

Ami N na pajiga elis na tera di Israel,

N na dividi elis na metadi

di fijus di Jakó.

8“Judá,#Lei 33.7; Ŝef 1.1-2; 20.18; 1 Kron 5.2 bu ermons na ngabau;

bu mon na sta riba di garganti

di bu inimigus;

fijus di bu pape na mpina bu dianti.

9Judá, bu sedu un fiju di lion.#Apok 5.5

Bu bai montia, bu mata,

bu riba, ña fiju.

Suma lion i kurva, i dita;

suma lion beju,

kin ku na osa dispertal?

10Bingala di rei#Sal 60.7; Is 9.6-7 ka na sai na Judá,

nin i ka na falta algin na si jorson

ku na rena,

te ora ku Siló bin,

ku tudu nasons na obdisi.

11I na mara si buru, ku fiju di buru

na pe di uva mas bonitu.

I na laba si ropa na biñu,

si kapa na sangi di uvas.

12Si uju na sedu burmeju di biñu,

si dintis branku di liti.

13“Zebulon#Lei 33.18-19; Ŝef 4.6,10; 5.14; 1 Kron 12.33,40; Is 9.1; Mat 4.14-16 na mora lungu di mar;

si tera na sedu purtu di barkus;

si frontera na bai te na Sidon.

14“Isakar#Ŝef 5.15; 10.1; 1 Kron 12.32 sedu un buru forti

ku dita na metadi di dus kargu.

15I oja kuma kau di diskansu

seduba bon,

kuma tera seduba sabi dimas;

i rianta si ombra pa paña kargu;

i sirbi suma katibu na tarbaju.

16“Dan#Lei 33.22; Ŝef 13.2,25; 18; 1 Kron 12.35 na julga si jinti

suma un di jorsons di Israel.

17Dan na sedu serpenti

lungu di kamiñu,

kobra pertu di kau di pasa,

ku na murdi pe di kabalu;

logu kil ku monta nel

i na kai pa tras.

18“SIÑOR, N na pera bu salbason.

19“Gad#Num 32; Lei 33.20-21; 1 Kron 5.11-22 na atakadu pa tropas,

ma el i na ataka elis pa tras.

20“Tera di Aser#Lei 33.24-25 na da kumida riku;

i na da kusas sabi pa gustu di rei.

21“Naftali#Lei 33.23; Ŝef 4.6,10; 5.18; Is 9.1-2 sedu un gazela

ku ten liberdadi,

ku ta padi fijus bonitu#49.21 Ku ta padi fijus bonitu o “ku ta papia palabras bonitu.”

22“José#Lei 33.13-17 i un arvori

ku ta da fruta ciu,

lungu di fonti di yagu;

si ramu na pasa riba di mura.

23Inimigus atakal risu ku mansasa,

e manda fleŝas, e pirsigil,

24ma si mansasa#Jo 29.20; Sal 18.32,34 fika firmi;

si mon fika disimbaransadu

pabia di mon di Deus forti di Jakó,

ku sedu Gia ku Roca forti di Israel,

25pabia di Deus di bu pape ku na judau,

pabia di kil ku ten tudu puder

ku na bensuau

ku bensons#Lei 28.2-13 di seu ku sta riba,

ku bensons di fundura ku sta bas,

tambi ku bensons di manga di fiju.

26Bensons di bu pape i mas ciu

di ki bensons di ña papes,

mas di ki rikesas

di montis di antigu.

Ki bensons e na sta riba di kabesa di José,

riba di testa di kil

ku separadu#Sal 105.17-22 di si ermons.

27“Benjamin#Lei 33.12; Ŝef 3.15; 20; 21; 1 Sam 9.1; Fil 3.5 i lubu brabu;

parmaña i ta kume kil ki paña;

di tardi i ta rapati kil ki montia.”

28Esis i ki dozi jorson di Israel. Es i palabra ku se pape fala elis oca ki bensua elis. I da kada kin si propi benson.

Mortu di Jakó

29Dipus, i da elis ordi, i fala: “Ami N na muri, N na lebadu pa ña papes.#Kap 23.19; 25.8-10; 35.29; 47.30; 50.13; At 7.16 Bo nteran ku elis na koba ku sta na terenu ku seduba di Efron, eteu, 30ki koba na terenu di Makpela, pertu di Manre na tera di Kanaan, ku Abraon kumpra, tudu ku ki terenu, na mon di Efron, eteu, pa kau di nteru. 31La ke ntera Abraon ku Sara si minjer; e ntera la tambi Isak ku Rebeka si minjer. I la propi ku N ntera Leia. 32Terenu ku koba ku sta nel i kumpradu na mon di fijus di Et.” 33Oca ku Jakó kaba da ordis pa si fijus, i rukuji si pes na kama, i da si folgu di kabantada, i lebadu pa si papes.

Currently Selected:

Kumsada 49: povB

Highlight

Copy

Compare