Rôma 10
10
1Awarera, ibela s’ôrèm̃i wam̃, n’ikambiṉi sam̃ gôr’Anyambyè g’ômwanja w’Israèl, sô nè, wi ga zungiṉô. 2Mi takilya g’ômwanji waô inè, wi re ni mpyô gôr’Anyambyè, ndô aranga ga nt’ar’imya: 3wi pa my’ôgôre w’Anyambyè, awuta gô dwaṉiz’ôgôre waômè, wi pa tugiz’ikuṽi yaô g’ôgôre w’Anyambyè; 4konde Krist n’isuka s’ivanga gô dwaṉiz’ôgôre gôre waôdu wi bekelya.
5Konde Môsès e myeza g’ômwanja w’ôgôre wi pila gw’ivanga inè: Ôma wi dend’isam̃u yiṉo ayanja yô e be dwaṉa bo vo yô. 6Ndô vônaṉi ga nte kamb’ôgôre wi pila gw’ivanga nè: Awulya g’ôrèm̃i wo, inè: Mande be panda g’ôrôṽa? inè, gô sônye Krist; 7ge, mande be sumiṉa g’ôronga? inè, gô pandye Krist avila gw’ijuwa. 8Sambô wi bulya sè? Igamba nyi re pyèrè na wè, na g’ôgwaṉi wo, na g’ôrèm̃i wo. Nyô n’igamba ny’ibekelya nyi kambiṉô zwè. 9J’aw’amèma n’ôgwaṉi wo inè, Yesu n’Ôvangiṉi, na j’aw’abekelya g’ôrèm̃i wo inè, Anyambyè arôngunyi yè avila gw’ijuwa, gambèṉè ô be sungiṉô. 10Konde azwè be siṽa g’ôgôre j’azw’abekelya n’ôrèm̃a; azwè be siṽa kè gw’isungiṉô j’azw’amèma n’ôgwaṉa, 11ga nte buly’irèndo inè: Ôm’edu e bekelyè, e ze jeṉizô ntyoṉi. 12Konde e zel’ibangwaṉa ntyo mw’Iju na mwô’Grèk, konde waôdu wi re n’ôvangiṉi mèmô, are kè n’ambya gôre waôdu wi dagiṉè. 13Konde ôm’edu e dagiṉ’ina nyi Yeôva, e be sungiṉô.
14Sambô wi be dagiṉè sèṉi gôre waô wi pa bekelyè? Ge wi be bekelyè sèṉi gôre waô wi pa jogo g’ômwanji wè? Ge wi be jogo sèṉi g’ômwanji wè, ja e zel’ôma wi kambiṉa waô. 15Ndô wi be kambiṉa sèṉi, ja w’arôm̃ô? ga nt’are tèndô pa, inè: Mèpiṉi nde yi r’intyôzô sa mongi wi myez’am̃ènjè na sa mongi wi bunguṉ’intyangô imbya!
16Ndô waôdu wi pa jogiṉô Ntyangô Mbya. Yeṉo Yezaya e bulya inè: Rera, mande are bekelya p’agambi mazô?
17Yeṉo ibekelya si pila gô jogo, n’ijogo si pila gw’igamba nyi Krist.
18Ndô mi bulya inè: Israèl wi pa jogo? Èñ, inyôy nyaô ny’akèndi gô ntye yôdu, n’agambi maô kwanga gw’intyay si ntye.
19Ndô mi bulya inè: Israèl wi pa mya? Môsès e dônge bulya nè: Mi be jeṉiza ṉwè ñandi n’ezom̃a zi re arang’iṉongo, mi be bendya ṉwè gôr’iṉongo ny’ikôtiza fo. 20Ni Yezaya kè are nkagandè vyagaṉô, kwanga gô bulya inè: My’alèngyô ne waô wi re wi pa buta myè, my’arum̃inyô gôre waô wi re wi pa bambya g’ômwanji wam̃. 21Ndô g’ômwanja w’Israèl e bulya nè: My’alaviṉ’ago mam̃ ôwenja wôdu gôr’iṉongo ny’ipava na ny’idôṽ’impaga.
Currently Selected:
Rôma 10: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
