Rôma 6
6
1Sambô azwè be bulya sè? Azwè be dwaṉa gw’ibe ko imèpiṉô buṉa? Alwaṉe yeṉo! 2Azwè yi re juwa pa gw’ibe, azwè be tô dwaṉa gw’ibe sè?
3Aṉwè pa mya nè, azwèdu y’aṽatizyô gôre Yesu‐Krist, azw’aṽatizyô gw’ijuwi sè? 4Sambô azw’aṽènyô na yè vo ibatizô gw’ijuwi sè, inè, ga nt’arôngunyô Krist avila gw’ijuwa v’ônjèlènjèlè wa Rerè, yeṉo kè azwè ga gangaṉe gw’em̃èṉo ezoṉa. 5Konde j’azw’atweṉi ta na yè v’ijuwi sè, azwè be dwaṉa ta kè na yè v’itôngwi sè, 6myagaga inè, ômi wazô ôlungu w’aṽanyô na yè gô krosi, k’ôkuṽa w’ibe jilizô, ko zw’alwaṉa nyèṉè asaka w’ibe; 7konde ayè yi re juwa pa, are tômbô pa avila gw’ibe. 8Ndô, j’azw’ayuwi ni Krist azwè bekelya nè, azwè be dwaṉa bo kè na yè, 9myagaga nè, Krist tôngunyô pa avila gw’ijuwa arô juwe nyèṉè; ijuwa si zele ni ngulu nyèṉè gôre yè. 10Konde gw’ayuwi yè, ayuwi gw’ibe nyongo mori; ndô gô dwaṉè bo, e dwaṉa bo gôr’Anyambyè. 11Yeṉo kè ṉwè, rangaṉ’ikuṽi yaṉi juwa pa gw’ibe, ndô bo gôr’Anyambyè gôre Yesu‐Krist.
12Sambô, ibe s’avangiṉa nyèṉè gw’ikuṽi yaṉi yi juwe njuwaga, ge ṉwè jogiṉô itôngiṉa sa sô. 13Avaṉi ṉam̃i yaṉi gw’ibe ga imyanga y’ibe; ndô yaṉ’ikuṽi yaṉi gôr’Anyambyè, g’aṉaga wi re bo avila gw’ijuwa, vaṉi kè Anyambyè ṉam̃i yaṉi ga imyanga y’ôgôre. 14Konde ibe si ze tô dwaṉe ni ngulu nyèṉè gôre ṉwè, konde aṉw’azele gw’ivanga, ndô gw’imèpiṉô.
15Sambô sè! Azwè ga lend’ibe, konde azw’azele gw’ivanga, ndô gw’imèpiṉô? Alwaṉe yeṉo!
16Aṉwè pa mya nè, j’aṉw’ap’ôma ikuṽi yaṉi g’asaka gô jogiṉô yè, gambèṉè aṉw’atweṉ’asaka w’ôma mè wi jogiṉô ṉwè, mbè w’ibe si kèndya gw’ijuwa, mbè w’ijogiṉô si kèndya g’ôgôre? 17Ndô akeṽa gôr’Anyambyè inè, aṉw’avegag’asaka w’ibe, ndô aṉw’are jogiṉô pa n’irèm̃a inènja mè si re ṉwè nènjô pa. 18Gw’avangyô ṉwè yangayanga avila gw’ibe, aṉw’atweṉ’asaka w’ôgôre. 19Mi kamba g’ôma g’ômwanja wi ndèliṉi y’izôṉe yaṉi. Ga nt’aveṉi ṉwè ṉam̃i yaṉi g’asaka gô dend’isèkè n’ibe, gô janj’ibe, yeṉo kè vèṉo vaṉi ṉam̃i yaṉi g’asaka gô dend’ôgôre, ko ṉwè mèpa. 20Konde, gw’avegagi ṉwè asaka w’ibe, aṉw’avegagi yangayanga g’ôzamba w’ôgôre. 21Sambô, ôba nde w’alèngyô ṉwè egômbe mèzoṉo gw’isam̃u mèyoṉo yi jeṉô ṉwè ntyoṉi egômbe ziṉo? Konde ntyay y’isam̃u mèyoṉo n’ijuwa. 22Ndô vèṉo, aṉwè pangô pa yanga arw’asaka w’Anyambyè, aṉw’are n’ipi saṉi gw’imèpa, na gô ntyay em̃èṉo za koṉako. 23Konde ipa s’ibe sô n’ijuwa; ndô ezom̃a zi pô n’Anyambyè mpagaga, n’em̃èṉo z’egômbe zôdu gôre Yesu‐Krist y’Ôvangiṉi wazô.
Currently Selected:
Rôma 6: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
