Rôma 16
16
1Mi tèndiṉa ṉwè g’ômwanja wi Febe, ’mwareri yazô ômwantô, ayanjiṉagi mandô yi re gô Kenkreas, 2inè, wongaṉi yè gôre Rerè, ga nt’are kwèkwè gôr’iyombwi, ko ṉwè nunguṉaṉi yè g’ôsam̃u edu wi re yè ko dwaṉa n’isolo gôre ṉwè, konde are dwaṉa p’ôṉunguṉi gôr’awenge, na gôre myè.
3Zanguṉaṉi myè Prisila n’Akilas, imbilô na myè gôre Yesu‐Krist, 4w’alimbiṉi wônjô yaô gô sungiṉ’em̃èṉo zam̃; wi re aranga myè dadyè mi pa waô akeṽa, ndô kè imandô s’aṉongo sôdu. 5Zanguṉaṉi kè mandô yi re gô nagô yaô. Zanguṉaṉi myè Epaynetos, yi tondô myè, ôlônd’ôlônga w’Azya gôre Krist. 6Zanguṉaṉi myè Marya, ayanjagi gôre ṉwè pôlô. 7Zanguṉaṉi myè Andrônikus ni Yunyas, wi re na myè ijaṉô n’ikôte na myè, wi re n’elum̃’eṽya gôre rôm̃i, wi re waô na myè waô w’alôngi gôre Krist. 8Zanguṉaṉi myè Amplyas, yi tondô myè gôre Rerè. 9Zanguṉaṉi myè Urbanos, ômbilô na zwè gôre Krist, ni Stakis, yi tondô myè. 10Zanguṉaṉi myè Apèlès, yi re sindiṉa pa gôre Krist. Zanguṉaṉi myè waô wi nagô y’Aristôbulos. 11Zanguṉaṉi myè Erôdyon, yi re na myè ijaṉô. Zanguṉaṉi myè waô wi nagô yi Narkisos, ntangô yi re gôre Krist. 12Zanguṉaṉi myè Trifena ni Trifosa, wi janj’eṽilô za Rerè. Zanguṉaṉi myè Pèrsida, ômwantô wi tondô, ayanjagi pôlô gôre Rerè. 13Zanguṉaṉi myè Rufus, yi re pinjô pa ne Rerè, ni ngi yè kè n’iyam̃ kè. 14Zanguṉaṉi myè Asinkritus, Flegon, Èrmès, Patrôbas, Èrmas, n’awarerè wi re na waô. 15Zanguṉaṉi myè Filôlôgos ni Yulya, Nerea n’ezombi zè, Ôlimpa, n’iyombwi yôdu yi re na waô. 16Zangwaṉaṉi n’isombaṉa sibya.
Imandô sôdu si Krist si sanguṉa ṉwè.
17Kokoloṉi, awarera, lingilyaṉi waô wi pang’ibangwaṉa ni jiṽe dungu, yi re yi ze swaswo n’inènja si re ṉwè nènga pa. Vangwaṉaṉi avila gôre waô. 18Konde aṉaga wi denda yeṉo wi pa janjiṉ’Ôvangiṉi wazô Krist, ndô wi janjiṉ’ambum̃u maômè; wi temiza k’irèm̃a y’aṉaga wi r’avôṉô fo n’agamb’ambya na m’ôṉèmbo. 19Ijogiṉô saṉi si re jagayaga pa gôr’aṉaga waôdu; yeṉo mi jeṉe mbya g’ômwanji waṉi; mi bela ṉwè gô dwaṉa kè n’imya gw’isam̃u imbya, ndô avôṉô fo gw’isam̃u imbe. 20N’Anyambyè y’am̃ènjè e be sunge nyigyanyigye Satan gw’intyôzô saṉi. Imèpiṉô sa Reri yazô Yesu‐Krist si ga lwaṉe na ṉwè.
21Timôte, ômbilô na myè, e sanguṉa ṉwè; ni Lusyus, ni Yazon, ni Sôsipatèr, wi re na myè ijaṉô, wi sanguṉa ṉwè. 22Myè Tèrsyus, y’atènd’ezangô ziṉo, mi sanguṉa ṉwè gôre Rerè. 23Gayos, ndeg’wam̃ na yi mandô yôdu, e sanguṉa ṉwè. Eraste, ôvenjavenji wi sika wi nkala, asanguṉa ṉwè, ni Kwartus, ya ’mwarerè kè.
24Imèpiṉô sa Reri yazô Yesu‐Krist si ga lwaṉe na ṉwèdu! Amèn!
25Gôre yè yi re ko joliza ṉwè ga nt’are Ntyangô yam̃ Mbya, n’ikambiṉa si Yesu‐Krist, ga nt’ar’itum̃inyô s’isam̃u y’iyumbuṉô y’avegagi jumbuṉô pa egômb’elônga, 26ndô vèṉo y’atum̃inyô, amyezô aṉongo môdu v’irèndo y’ivogisi, ga nt’ar’ôzômbyô w’Anyambyè ya koṉako, gô baga waô gw’ijogiṉô s’ibekelya, 27gôr’Anyambyè yi re dadyè n’imya, gôre yè ga lwaṉ’ivenda vo Yesu‐Krist gô koṉako! Amèn!
Currently Selected:
Rôma 16: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
