I Kôrinti 1
1
1Pol, fweyô pa gô dwaṉ’erôm̃i zi Yesu‐Krist vo ntondiṉi y’Anyambyè, na ’mwarerè Sostène, 2gô mandô y’Anyambyè yi re gô Kôrinti, gôre waô wi re mèpizô pa gôre Yesu‐Krist, fweyô pa gô dwaṉ’iyombwi, na gôre waôdu gô mbôry’edu wi dagiṉ’ina nya Reri yazô Yesu‐Krist, Reri yaô n’iyazô kè: 3imèpiṉô n’am̃ènjè mi ga vô ṉwè avila gôr’Anyambyè, ya Reri yazô n’avila gôr’Ôvangiṉi Yesu‐Krist.
4Mi p’Anyambyè yam̃ akeṽa egômbe zôdu g’ômwanji waṉi, g’ômwanja w’imèpiṉô s’Anyambyè si re pô pa ṉwè gôre Yesu‐Krist. 5Konde gôre yè aṉw’are pagizô pa g’ôsam̃u edu, gw’igamby’edu na gw’imya sôdu, 6ga nt’alwaṉizô agamba mi Krist gôre ṉwè, 7ko ṉwè avèṉ’imèpiṉô edu s’Anyambyè, mpengiṉag’ibôm̃unya sa Reri yazô Yesu‐Krist. 8E be joliza ṉwè kè kwanga gô ntyay, ko ṉwè dwaṉe ntyèmbo fo gô ntyugu ya Reri yazô Yesu‐Krist. 9Anyambyè ar’ôrèti, ayè yi re fweya pa ṉwè gô dwaṉa ta n’ômwaṉi wè Yesu‐Krist, y’Ôvangiṉi wazô.
10Awarera, mi kwena ṉwè nkolo gw’ina ny’Ôvangiṉi wazô Yesu‐Krist, inè, aṉwèdu gambaṉ’igamb’imô, ko alwaṉ’ibangwaṉa gôre ṉwè, ndô lwaṉaṉi jôngô pa ta n’ôrèm̃’ômô ni mpiviṉi mô. 11Konde my’are jogo pa g’ômwanji waṉi, awarera, ne mongi nagô yi Klôe, inè, anyôm̃aṉô mi re gôre ṉwè. 12Mi pivya nè, ôm’edu gôre ṉwè e bulya nè: mi sônge Pol! — na myè, mi sông’ Apôlos! — na myè, mi sônge Kefas! — na myè, mi sônge Krist! 13Krist are keraṉa pa? Pol aṽanyô gô krosi g’ômwanji waṉi, ge aṉw’aṽatizyô gw’ina nyi Pol? 14Mi p’akeṽa gôr’ Anyambyè inè, mi pa batiz’ôm’edu gôre ṉwè, kaô Krispus ni Gayos, 15ko awuly’ôma inè, aṉw’aṽatizyô gw’ini nyam̃. 16My’aṽatizi kè nagô yi Stefanas; tômbare pa mongi siṉo, mi pa mya nè, my’aṽatiz’ôm’ômwèṉè.
17Krist e pa tôm̃a myè gô batiza, ndô gô bunguṉe Ntyangô Mbya, aranga n’agamba m’imya, krosi yi Krist yi vende tw’ôsam̃u wa nyawènyawè. 18Konde igamba nyi krosi nyi r’edosu gôre waô wi pera, ndô gôre zwè yi sungiṉô nyô ne ngulu y’Anyambyè. 19Konde re tèndô pa inè: Mi be jiliz’imya s’aṉaga w’imya, avang’ikôtiza sa mongi wi kôtiz’ôsam̃u wa nyawènyawè. 20Ôma w’imya are gweṉi? ôrèndisi are gweṉi? ôlôṽisi w’impaga wi ntye yiṉo are gweṉi? Anyambyè e ze kalunya p’imya si ntye yiṉo edosu? 21Konde gô re nè, ntye yiṉo n’imya sa yô, yi pa my’Anyambyè gw’imya s’Anyambyè, Anyambyè aṽeli, v’edosu z’ikambiṉa, gô sungiṉa mongi wi bekelya. 22Iju wi bambye lemba ni Grèk wi but’imya: 23azwè, azwè kambiṉe Krist banyô pa gô krosi, gôr’Iju ibaku, na gôr’aṉongo edosu, 24ndô gôre waô wi re fweyô pa, Iju ni Grèk ta, Krist ne ngulu y’Anyambyè n’imya s’Anyambyè. 25Konde edosu z’Anyambyè zi re n’imya vyagaṉô n’aṉaga, ni ndèliṉi y’Anyambyè yi re ngulu vyagaṉô n’aṉaga.
26Vônareṉi mbeli yaṉi, awarera, inè, arang’awenge wi re n’imya ga nt’ar’ôzôṉe, arang’awenge wi r’avôlô, arang’awenge wi re n’elum̃i, wi re fweyô pa gôre ṉwè. 27Ndô Anyambyè avinj’isam̃u y’edosu yi ntye yiṉo gô jeṉiz’aṉaga w’imya ntyoṉi; Anyambyè avinj’isam̃u ilèli yi ntye yiṉo, gô jeṉiz’isam̃u iyoli ntyoṉi; 28n’Anyambyè avinj’isam̃u y’enyale yi ntye yiṉo, n’isam̃u yi pèdyô, n’isam̃u yi re yi zele gô jeliz’isam̃u yi re, 29k’ôm’edu azôgwa g’ôzô w’Anyambyè. 30Ndô vo yè aṉw’are gôre Yesu‐Krist, are twa pa gôre zwè imya vo ntondiṉi y’Anyambyè, n’ôgôre, n’imèpizô, n’ôlanduṉô, 31nt’are tèndô pa inè: Ayè yi sôgwa, e ga zôgwe gôre Rerè.
Currently Selected:
I Kôrinti 1: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
