I Kôrinti 9
9
1My’azele yangayanga? My’arang’erôm̃i? Mi pa jeṉe Yesu y’Ôvangiṉi wazô? Aṉw’arang’eṽilô zam̃ gôre Rerè? 2Ja my’azel’erôm̃i gôr’am̃ori, my’ar’erôm̃i rèti gôre ṉwè; konde elingilyô zam̃ z’erôm̃i ne ṉwè gôre Rerè. 3Nyiṉo n’igamba nyi kaṉa myè n’ôkuṽi wam̃ gôre waô wi sogiza myè. 4Azw’azele n’inyanga nyi nya na nyi jonga? 5Azw’azele n’inyanga nyi kangaṉa ôm’edu n’ômwantô wè ayè kè ’mwarerè, ga nte kangaṉa rôm̃i mori, n’awôngwè wa Rerè, ni Kefas? 6Ge myè ni Barnabas azw’azele n’inyanga nyi dwaṉ’ayanja? 7Mande kènda gô dwaṉe sozè ni yom̃i yèmè? Mande bèṉe ntyaga y’igoli, ko any’ilônda ya yô? Mande nyezô ôlemba wi nyam̃a, ko ayong’ambèṉingô m’ôlemba mè? 8Isam̃u yiṉo yi bulyô myè yi dwaṉa kaô dadyè gô mpangiṉi y’aṉaga? Ivanga nyi pa bulya yeṉo kè? 9Konde are tèndô pa gw’ivanga nyi Môsès, inè: Agôr’ôgwaṉa wi nyare ge jara yô ôrèsi gô tèva wô. Anyambyè e nak’inyare? 10ge, gô kambè yeṉo aranga pôsô g’ômwanji wazô? Eñ, y’arèndyô g’ômwanji wazô, inè, ayè yi janja gô tumbe ntye, e ga yanje n’igum̃u, n’ayè yi jar’ilônda gô tèva yô, e ga rève n’igum̃u nyi dèng’ilônda mè. 11J’azw’aṽèṉi gôre ṉwè isam̃u y’iṉiṉa, gambèṉè ar’ôsam̃u ômpôlô j’azw’ateṉ’isam̃u yaṉi y’ôkuṽa? 12J’am̃ori w’ayeṉi mbya gô dwaṉa n’inyanga nyiṉo gôre ṉwè, azwè ayeṉe mbya gô nyô vyagaṉô? Ndô azwè pa bong’inyanga nyiṉo; ndô azwè sindiṉ’isam̃u yôdu ko zwè alwaṉ’ibaku gô Ntyangô Mbya yi Krist.
13Aṉwè pa mya nè, waô wi janje ṽilô y’ôrunda wi nyezô ne yom̃a yi nagô y’Anyambyè, na waô wi janja gô mbôra yi jirô intyagô wi ker’inya si mbôra yi jirô intyagô? 14Yeṉo, Rera azômbyi nè, waô wi kambiṉe Ntyangô Mbya wi ga rôlizô ne Ntyangô Mbya.
15Ndô anyanga miṉo mi pa bonga mô, ge, gô tènda myè isam̃u yiṉo, aranga nè, ga lendô yeṉo gôre myè; konde mi ko tonda gô juwa vyagaṉô na gôr’ôm’edu gô pang’isôgwi sam̃ ôsam̃u wa nyawènyawè. 16Ja my’akambiṉe Ntyangô Mbya, yiṉo arange ntiṉa yi re myè gô sôgwa, konde my’abangatyô, n’azile gôre myè ja my’agambiṉe Ntyangô Mbya! 17Ja my’adend’eṽilô ziṉo n’ôrèm̃a, gambèṉè my’are ko dèng’ipa; ndô ja my’adenda zô ôrèm̃a fo, gambèṉè my’apenyô eṽilô zi nyôngô. 18Sambô ipi sam̃ ande? Sô nè, gô kambiṉa myè Ntyangô Mbya, mi kambiṉa yô ipa fo, ko my’aret’inyangi nyam̃ gô Ntyangô Mbya.
19Konde, vangaṉe my’are yangayanga gôr’aṉaga waôdu, my’arugiz’ôkuṽi wam̃ gôre waôdu, gô dèng’awenge vyagaṉô. 20Gôr’Iju, my’avegagi ga mw’Iju, gô dèng’Iju; gôre waô wi re gw’ivanga, my’avegagi g’ôma re gw’ivanga (vangaṉe myèmè mi zele gw’ivanga), gô dènga waô wi re gw’ivanga; 21gôre waô wi r’ivanga fo, my’avegagi g’ôma r’ivanga fo (vangaṉe myèmè mi re pegege ivanga fo gôr’Anyambyè, ndô gw’ivanga nyi Krist), gô dènga waô wi r’ivanga fo. 22Gôre waô wi re dèla, my’avegagi g’ôm’ôlèli, gô dèng’aṉag’alèli. My’are twa p’ezom̃’edu gôre waôdu, ko mi sungiṉ’aṉaga ni mpoṉo edu. 23Mi dend’isam̃u yôdu gô ntiṉa yi Ntyangô Mbya, ko mi dwaṉ’ôwongisi gô yô.
24Aṉwè pa mya nè, waô wi pale mangô g’ôlembyaṉô wi pale mangô waôdu, ndô ôm̃ori dadyè ayè dèng’ipa? Valaṉi mangô mè yi be niviza ṉwè. 25N’ôm’edu e dembyaṉ’ôlembyaṉô e nim̃iṉ’ôkuṽa gw’isam̃u yôdu, na wi denda yeṉo gô bonge kôrôṽa yi boṉa; ndô azwè, gô bonge kôrôṽa yi re y’ayolye boṉe. 26Yeṉo, mi pale mangô, aranga g’ôma are e pa mye ntiṉa; yeṉo nwa myè, aranga g’ôma e bôl’ômpunga. 27Ndô mi bangaty’ôkuṽi wam̃, arugiza wô, vendetwa inè, myè kambiṉa p’am̃ori, ko mi dwaṉa myè awongô.
Currently Selected:
I Kôrinti 9: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
