I Kôrinti 10
10
1Awarera, mi pa bela ṉwè gô dwaṉ’imya fo inè, ireri sazô sôdu s’avegagi g’ôdôlôngô w’evindi, sôdu kè s’avyagaṉi mbeṉe mbondi, 2sôdu kè s’aṽatizô gôre Môsès gw’evindi na gô mbeṉe, 3sôdu s’anyeṉ’inya mèmô s’iṉiṉa, 4na sôdu s’ayong’ijonga mèmô s’iṉiṉa, konde s’ayongi gw’idô ny’iṉiṉa ny’azôngagi waô, n’idô mènyoṉo ne Krist. 5Ndô ntangô gôre waô wi pa tondy’Anyambyè, konde w’ayilizyô gw’itôve.
6Yeṉo, isam̃u yiṉo y’arweṉi gô nènja zwè, ko zw’ayônguṉ’ibe ga nt’ayônguṉagi waô. 7Alwaṉaṉ’izaviṉi y’ikaṉa, g’awèwo gôre waô, ga nt’are tèndô pa inè: Aṉaga w’alwaṉi baru gô nya na gô jonga, agum̃aṉa gô seva. 8Azwè ga rig’alèwa na wi ngaṉi, ga nt’alèw’awèwo gôre waô, ko waô pôswa agôm̃i mi ntozèny s’aṉag’ambaṉi ni ntozèny s’aṉaga ntyarô ntyugu mô. 9Azw’alembe Rerè, ga nt’alemb’awèwo gôre waô, n’ayilizô waô n’im̃amba. 10Alagalagaṉi, ga nt’alagalag’awèwo gôre waô, n’ayilizô waô n’ôma wi jiliza. 11Isam̃u yiṉo y’arweṉi gôre waô gô nènja waô; y’arèndyô kè gô nènja zwè, azwè yi re byeṉô pa ne gômbe num̃uṉa. 12Yeṉo, ayè yi tanga nè, e kum̃aṉe jolajola e ga ṽandam̃iṉe, e vende pôswa.
13Aṉwè pa kôtô n’isorya sijèṉè kaô mèsoṉo si kôt’aṉaga, n’Anyambyè, are ko bekelyô, ayivire ṉwè soryô vyagaṉô ni nt’are ṉwè ko jolya; ndô e be dèngiṉa kè isorya igogunyô, ko ṉwè jolye sindiṉa.
14Yeṉo, aṉwè yi tondô myè, wangaṉ’isaviṉ’ikaṉa.
15Mi kamba ga gôr’aṉaga w’ikôtiza; yèkèlyaṉi aṉwèmè ga nte kambô myè. 16Imogi ny’ôzaviṉô nyi saviṉô zwè, nyô arange mbongiṉi yi bonga zwè ntyiṉa yi Krist? Mpèmba yi moguṉô zwè, yô arange mbongiṉi yi bonga zwè ôkuṽa wi Krist? 17Gô re nè mpèmba yi re mori, azw’awenge azwè pang’ôkuṽ’ômô; konde azwèdu azwè r’iwongisi yi mpèmba mèmô. 18Vônaṉ’Israèl ga nt’ar’ôzôṉe: waô wi ny’inyam̃a si jirô gw’intyagô, waô arang’iwongisi ta ni mbôra yi jirô intyagô? 19Sambô mi bulya sè? inè, eṽèrè zi re jirô pa gw’ikaṉa ezom̃a ge ôgaṉa ezom̃a? Nyawè. 20Mi bulya nè, yom̃a yi jirô yi jirô gôr’aṉiṉ’ambe aranga gôr’Anyambyè; ndô mi pa bela ṉwè gô diṽa n’aṉiṉ’ambe. 21Aṉw’ayolye jong’imogi nya Rerè, n’imogi ny’aṉiṉ’ambe ta; aṉw’ayolye nye tavulu ya Rerè, ni tavulu y’aṉiṉ’ambe ta. 22Azwè ga vange Rerè gô puva? Azw’are ngulu vyagaṉô na yè?
23Yom̃a yôdu yi pa degô, ndô aranga yôdu yi re n’isolo; yom̃a yôdu yi pa degô, ndô aranga yôdu yi nuginya. 24Ôm’edu awute mbyi yèmè, ndô mbya y’am̃ori. 25Nyaṉ’ezom̃’edu zi kôlô gw’igôliṉô, ko aṽambyaṉi ndaga gô ntiṉa y’ôrèm̃a; 26konde ntye ya Rerè n’ezom̃’edu zi re gô yô. 27J’ôma are e pa bekelya afweya ṉwè, ko ṉwè jivira gô kènda, nyaṉ’ezom̃’edu zi dôṽinyô ṉwè, gô ntiṉa y’ôrèm̃a. 28Ndô j’ôma abulinya ṉwè inè: Ezom̃a ziṉo zi re jirô pe ntyagô g’ôgaṉa! gambèṉè anyaṉi zô gô ntiṉa y’ôma mè w’anyeza ṉwè g’ômwanja wa zô na g’ômwanja w’ôrèm̃a. 29Mi kamba vèṉo aranga g’ômwanja w’ôrèm̃i waṉi, ndô w’ôm’ôm̃ori mèwoṉo. Ôyangayangi wam̃ wi be jèkèlyô n’ôm’ômwèṉè sè? 30Ja my’anya n’ip’akeṽa, ntiṉa nde yi kambô myè mbe g’ômwanja w’ezom̃a mè zi pô myè akeṽa?
31Sambô, j’aṉw’anya, ge jonga, ge dend’ezom̃y’edu ezèṉè, lendaṉi yôdu gô pendy’Anyambyè. 32Alwaṉaṉ’ibaku gôr’Iju, ge gôre Grèk, ge gô mandô y’Anyambyè, 33mbela mèmô ga nte tondya myè aṉaga waôdu gw’isam̃u yôdu, mbutaga, arange mbyi yam̃imè, ndô y’aṉag’awenge, inè, wi ga zungiṉô.
Currently Selected:
I Kôrinti 10: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
