I Kôrinti 7
7
1G’ômwanja w’isam̃u y’arèndiṉi ṉwè myè, mi tanga nè, are mbya gôr’ôṉôm̃e gô dwaṉa agôz’ômwantô. 2Ndô gô fang’ôṽelaṉô, ôm’edu e ga lwaṉe n’ômwantô wèmè, n’ômwantô edu e ga lwaṉe n’ôṉôm̃u wèmè. 3Ôṉôm̃e e ga ve ômwantô wè nte nwaṉè yè, egolaṉi mèmô kè ômwantô gôr’ôṉôm̃u wè. 4Ômwantô e pa pangiṉ’ôkuṽi wèmè, ndô e pangiṉô n’ôṉôm̃u wè; yeṉo kè, ôṉôm̃e e pa pangiṉ’ôkuṽi wèmè, ndô e pangiṉô n’ômwantô wè. 5Aṉimyaṉaṉi, kaô du n’ômpangaṉô vo mw’ôlingô, gô p’ikuṽi yaṉi gw’ikambiṉa; avila vovo ko ṉwè tô dataṉa, Satan e vende sorya ṉwè g’ômwanja w’itwazindiṉi saṉi. 6Mi buly’igamba nyiṉo gô jivira ndô aranga n’ôzômbyô. 7Mi ko tond’aṉaga waôdu gô dwaṉa ga myè; ndô ôm’edu are dènga p’ezom̃i zè zi pô yè n’Anyambyè, ôm̃ori mpangiṉi mori, ôm̃ori kè mpangiṉi nyèṉè.
8Mi bulinya waô wi re wi pa jômba, n’itika, inè, are mbya inè, wi ga lwaṉe ga nt’are myè. 9Ndô ja w’ayolye sindiṉe, wi ga yômbe; konde re mbya gô jômba vyagaṉô na gô pya.
10Ndô gôre waô wi re jômba pa, mi sômbya, aranga myè, ndô Rerè, inè, ômwantô e ga rig’alubwa gôr’ôṉôm̃u wè 11(j’adubwa, e ga lwaṉe arô jômba, ntyo gô tô mèpaṉa n’ôṉôm̃u wè), n’ôṉôm̃e kè arômb’ômwantô wè.
12Am̃ori mi bulinya waô, arange Rerè, inè: Ja ’mwarerè are n’ômwantô are e pa bekelya, ndô ômwantô jivira gô dwaṉa na yè, gambèṉè e ga rig’arômbè; 13na j’ômwantô are n’ôṉôm̃e are e pa bekelya, k’ôṉôm̃e jivira gô dwaṉa na yè, gambèṉè ômwantô e ga rig’alubwa avila gôr’ôṉôm̃u wè. 14Konde ôṉôm̃e are e pa bekelya, e mèpizô n’ômwantô, n’ômwantô are e pa bekelya, e mèpizô n’ômwarerè; j’aranga yeṉo, awaṉi waṉi wi ze dwaṉe nkèrè, ndô vèṉô wi re nkèrè. 15J’ayè yi re e pa bekelya adubwa, gambèṉè e ga lubwe; ômwarerè ôṉôm̃e ge ômwantô e zele kôrô pa gw’isam̃u ôṉongo mèwoṉo. Ndô Anyambyè are fweya pa zwè gô dwaṉa gw’am̃ènjè. 16Konde ô mya sèṉi, aw’ômwantô, twa pa ô be sungiṉ’ôṉôm̃u wo? Ge ô mya sèṉi, aw’ôṉôm̃e, twa pa ô be sungiṉ’ômwantô wo.
17Kaô dadyè inè, ôm’edu e ga lwaṉe ga nt’are yè pangô pa ne Rerè, ga nt’are mbela yi re yè fweyô pa n’Anyambyè. Yeṉo e sômbya myè kè gw’imandô sôdu. 18Ar’ôma fweyô pa ayè kèrô pa? e ga rig’arômb’ikèra. Ar’ôma fweyô pa ayè ôzombè? E ga rig’arô kèrô. 19Ikèra arang’ezom̃a, n’ôzombè kè arang’ezom̃a; ndô ipenjavenj’isômbya s’Anyambyè sô n’ôsam̃uôsam̃uwe. 20Ôm’edu e ga lwaṉe gô ndwaṉi yi re yè fweyô pa. 21W’aweyô aw’ôsaka? ayeṉ’añandi g’ômwanja wa wô, na vangaṉe w’ajolye dwaṉa yangayanga, lenda yeṉo. 22Konde ayè yi re fweyô pa gôre Rerè ay’ôsaka, ayè mwô’ntye wa Rerè; egolaṉi mèmô kè, vangaṉe mwô’ntye are fweyô pa, atweṉ’ôsaka wi Krist. 23Aṉw’agôlyô n’igôlw’ivôlô; alwaṉaṉ’asaka w’aṉaga. 24Ôm’edu, awarera, e ga lwaṉe g’ôzô w’Anyambyè gô ndwaṉi y’aweyô yè.
25G’ômwanja w’azali mi ze n’ôzômbyô avila gôre Rerè; ndô mi sômbya nte pikilya myè; g’ôma are dènga p’imèpiṉô s’Anyambyè gô dwaṉ’ôma are ko bekelyô.
26Sambô mi tanga g’ômwanja wi gômbe ṽe yi bya inè, are mbya gôr’ôma gô dwaṉa yeṉo. 27Ô re kôrô pa gôr’ômwantô? awuta gô puruṉô. Ô zele kôrô pa gôr’ômwantô? riga wut’ômwantô. 28J’awè re jômba pa, ô pa fwem̃a; na j’izali nyi re nyi pa dèwa n’ôṉôm̃e ni mori ny’ajômba, izali mè nyi pa fwem̃a. Ndômongi siṉo wi be jeṉ’injuke g’ôzôṉe, yeṉo mi ko tonda gô diviṉa ṉwè.
29Awarera, mi bulya nè, egômbe z’atuṉi, inè, mongi wi re jômba p’antô wi ga lwaṉe ga wi zele n’antô; 30na waô wi deṉa, egolaṉi ga wi pa deṉa; na waô wi jeṉe mbya, egolaṉi ga wi pa jeṉe mbya; na waô wi kôla, egolaṉi ga wi pa niva; 31na waô wi bute yom̃a yi ntye yiṉo, egolaṉi ga wi pa buta yô, konde mpangiṉi yi ntye yiṉo yi pyagaṉe mpyagaṉaga. 32Ndô mi ko tonda inè, aṉwè ga lwaṉ’añandi fo. Ayè yi re e pa jômba e nak’isam̃u ya Rerè, ga nt’are yè ko tondye Rerè; 33n’ayè yi re jômba pa e nak’isam̃u yi ntye yiṉo, ga nt’are yè ko tondy’ômwantô wè. 34Are k’ibangwaṉa gôr’ômwantô wi re jômba pa, n’izali nyi re nyi pa dèwa n’ôṉôm̃e ni mori: ômwantô are e zele jômba pa e nak’isam̃u ya Rerè, ko yè dwaṉe nkèrè g’ôkuṽa na gw’iṉiṉa; n’ôm̃wantô are jômba pa e nak’isam̃u yi ntye yiṉo, ga nt’are yè ko tondy’ôṉôm̃u wè.
35Mi kamb’igamba nyiṉo gô nunguṉa ṉwè; aranga gô dirinya ṉwè isinga, ndô gô kèndya ṉwè gw’isam̃u yi simaṉa, ko ṉwè janjiṉe Rerè ôzokolyô fo.
36Ndô jog’ôm’atanga nè, e pa dendiṉ’ômwaṉi wè ômwantô ar’izali kwèkwè, jog’atweṉ’ômwantômwantwe, na j’adwaṉ’isolo gô jômbizè, e ga lende nte belè, e pa fwem̃a; wi ga yômbaṉe. 37Ndô ayè yi kum̃aṉe jolajola g’ôrèm̃i wè, ko aṽangatyô gô jômbiz’ômwaṉi wè, ndô are ni ngulu gô denda nte belè, are kenja pa kè n’ôrèm̃i wè, gô penjavenj’ômwaṉi wè ômwantô izali, e denda mbyambye. 38Yeṉo kè ayè yi jômbiz’ômwaṉi wè e denda mbyambye; n’ayè yi re e pa jômbiz’ômwaṉi wè ômwantô, e denda mbyambye vyagaṉô.
39Ômwantô are kôrô pa kè n’ivanga ôlingô wi r’ôṉôm̃u wè bo; ndô j’ôṉôm̃e ajuwa, gambèṉè atweṉi yangayanga gô jômb’ôṉôm̃y’edu wi belô yè; kaô dadyè gôre Rerè. 40Ndô j’adwaṉ’ayômba, are mbyambye vyagaṉô gw’ipikilyi sam̃. Mi tanga kè nè, my’are n’Iṉiṉa ny’Anyambyè.
Currently Selected:
I Kôrinti 7: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
