I Kôrinti 6
6
1Jog’ôma gôre ṉwè are ni ndaga n’ôm’ômwèṉè, ayè ko soza yô gôr’aṽe, n’aranga gôr’iyombwi? 2Aṉwè pa mya nè, iyombwi yi be jèkèlye ntye yiṉo. Na jogo ntye y’ajèkèlyô ne ṉwè, aṉw’aze n’inyanga nyi jèkèly’isam̃u imyangômè? 3Aṉwè pa mya nè, azwè be jèkèly’iyenjèl? Ko pôrô isam̃u y’em̃èṉo ziṉo? 4Sambô, j’aṉw’adwaṉa n’isam̃u y’em̃èṉo ziṉo gô jèkèlyô, aṉwè dôṽya waô wi pèdyô gô dwaṉ’iyèkèli gô mandô! 5Mi kamba gô ntyoṉi yaṉi: konde e zel’ôma gôre ṉwè are ko jolye teṉiz’impungu s’awareri yè. 6Ndô ’mwarerè e sozize ’mwareri yè, wi denda yeṉo kè gw’azô m’aṉag’aṽe! 7Vèṉo re ndaga yi ntyèmbo gôre ṉwè, vangaṉe gô dwaṉa n’izozo aṉwè n’aṉwè. Ntiṉa nde yi re ṉwè aronda gô dendô mbe? Ntiṉa nde yi re ṉwè aronda gô pitô vyagaṉô na gô dwaṉa n’izozo gôre ṉwè na ṉwè? 8Ndô aṉwèmè aṉwè dende mbe, avita, vangaṉ’awareri yaṉi! 9Aṉwè pa mya nè, aṽe w’ayolye nive du iṉongo ny’Anyambyè?
Aremizôṉi, vôvevôve, ni mongi wi saviṉ’ikaṉa, n’ibelaṉi, n’alèli, ni mongi wi bel’aṉôm̃e, n’ifwe, 10ni mongi w’agasô m’aṉiva, ni yonga, n’iroṽisi, n’igwèrisi w’ayolye nive du iṉongo ny’Anyambyè. 11N’awèwo gôre ṉwè w’avegagi mbela mèyoṉo. Ndô aṉw’are jôvuṉô pa, ndô aṉw’are mèpizô pa, ndô aṉw’are dwaṉizô p’agôre gw’ina nya Rerè Yesu‐Krist, ne Iṉiṉa ny’Anyambyè yazô.
12E zel’ezom̃’edu zi degô gôre myè, ndô arange yom̃a yôdu yi re n’isolo; e zel’ezom̃’edu zi degô gôre myè, ndô my’avangiṉô n’ezom̃’edu. 13Inya si re ntiṉa y’iwum̃u, n’iwum̃u ntiṉa y’inya; ndô Anyambyè e be jiliza yô ṽaṉi. Ôkuṽa wi zele ntiṉa y’ôṽelaṉô, ndô ntiṉa ya Rerè, na Rerè kè ntiṉa y’ôkuṽa. 14Anyambyè y’arôngunyi Rerè, e be tôngunya zwè kè ni ngulu yè. 15Aṉwè pa mya nè, ikuṽi yaṉi ne ṉam̃a yi Krist? Sambô mi ga wonge ṉam̃a yi Krist gô panga yô ṉam̃a y’evôvevôve? Alwaṉe yeṉo! 16Aṉwè pa mya nè, ayè yi re ta n’evôvevôve w’atweṉ’ôkuṽ’ômô? Konde e bulyô nè, waô aṽaṉi wi be dwaṉ’ôzôṉe ômô. 17Ndô ayè yi re ta na Rerè w’atweṉ’iṉiṉ’imô. 18Wangaṉ’ôṽelaṉô. Ifwem̃y’edu si fwem̃ô n’ôma, si re gw’igala ny’ôkuṽa; ndô ayè yi dèwa na wi ngaṉi, e fwem̃a g’ôkuṽi wèmè. 19Aṉwè pa mya nè, ikuṽi yaṉi ne nagô y’Iṉiṉ’Iṽya nyi re gô gare yaṉi, nyi re ṉwè dènga pa avila gôr’Anyambyè, n’aṉwè kè aṉwè pa niv’ikuṽi yaṉimè? 20Konde aṉw’agôlyô n’igôlw’ivôlô. Sambô, vendyaṉ’Anyambyè gw’ikuṽi yaṉi, na gw’iṉiṉi nyaṉi: Anyambyè e niva yô ṽaṉi.
Currently Selected:
I Kôrinti 6: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
