I Kôrinti 3
3
1Mi pa jolye kamba na ṉwè, awarera, g’aṉaga wi re mpangiṉi y’Iṉiṉa, ndô g’aṉaga wi re gô mpangiṉi y’ôzôṉe, g’awaṉa gôre Krist. 2My’ayonji ṉwè ambèṉingô, arang’inyinyiè, konde aṉwè pa jolya sô; na kwanga vèṉo, konde aṉwè p’are mpangiṉi y’ôzôṉe. 3Yeṉo, gô dwaṉe ñandi n’anyôm̃aṉô gôre ṉwè, aṉwè zele mpangiṉi n’ôzôṉe, alwaṉa ga nt’ar’aṉaga? 4Gô buly’ôm̃ori nè: Mi sônge Pol! n’ôm̃ori nè: Mi sông’Apôlos! aṉw’arang’aṉaga? 5Apôlos mande? ni Pol kè mande? Inyôngô s’avangi ṉwè bekelya, ga nt’are Rerè pa p’ôm’edu. 6My’aṽèṉi, Apôlos arèvizi, ndô Anyambyè ayè pôm̃iza; 7yeṉo ayè yi bèṉa arang’ezom̃a, ge ayè yi tèviza, ndô Anyambyè ayè pôm̃iza. 8Ayè yi bèṉa n’ayè yi tèviza wi re mbela mô, n’ôm’edu e be bong’ipi sèmè, ga nt’ar’ijanji sè. 9Konde azwè iyanjisi ta n’Anyambyè. Aṉwè ntyaga y’Anyambyè, aṉwè nagô y’Anyambyè.
10Ga nt’ar’imèpiṉô si re myè pô pa n’Anyambyè, my’agekiz’izanga g’ôṉôgisi w’imya, n’ôm̃ori e nôga vovo. Ndô ôm’edu e ga ṽandam̃iṉe nôgiṉi yi nôgô yè vovo. 11Konde ôm’ayolye dôṽy’izang’inyèṉè, kaô nyiṉo nyi re dôṽyô pa, nyô ne Yesu‐Krist. 12Ndô j’ôm’edu aṉôga gw’izanga nyiṉo sika ya teṉateṉa na ya pupu, adô mi njôni, rere, am̃aṉi, kum̃u y’am̃aṉi, eṽilô z’ôm’edu zi be tum̃inyô; 13konde zi be myezô ni ntyugu, konde ntyugu mè yi be bôm̃unya n’ôgôṉi, n’ôgôṉi wi be kèṉiz’eṽilô z’ôm’edu nt’are zô. 14J’eṽilô z’aṉôgyô n’ôm’edu gw’izanga mè z’atigaṉa, gambèṉè e be bong’ipi sè. 15J’eṽilô z’ôm’edu z’apezô, gambèṉè e be perô n’ipi sè; ayèmè e be sungiṉô, ndô mpaṉi g’ôma pyagaṉa g’ôgôṉi.
16Aṉwè pa mya nè, aṉwè ne nagô y’Anyambyè, na inè, Iṉiṉa ny’Anyambyè nyi dwaṉa gô gare ntye yaṉi? 17J’ôm’edu ajilize nagô y’Anyambyè, Anyambyè be jilizè kè; konde nagô y’Anyambyè yi re nkèrè, na yeṉo re ṉwè kè.
18Ôm’edu aremiz’ôkuṽi wèmè. J’ôm’edu gôre ṉwè apikilya nè, are n’imya ga nt’are sô gô ntye yiṉo, e ga galw’edosu, ko yè dwaṉa n’imya. 19Konde imya si ntye yiṉo si r’edosu g’ôzô w’Anyambyè. Konde re tèndô pa, inè: E kôt’aṉaga w’imya gw’avôṉô maômè. 20Na inè: Rerè avôrô ipikilya s’aṉaga w’imya, avôrô inè, si re nyawènyawè.
21Yeṉo ôm’edu e ga rig’azôgwa n’aṉaga; konde isam̃u yôdu iyaṉi, 22Pol, ge Apôlos, ge Kefas, ge ntye yiṉo, ge em̃èṉo, ge ijuwa, ge isam̃u ya tè, ge isam̃u yi bya. 23Isam̃u yôdu iyaṉi; n’aṉwè yi Krist, ni Krist y’Anyambyè.
Currently Selected:
I Kôrinti 3: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
