I Kôrinti 2
2
1Na myè kè, awarera, gw’agèndi myè gôre ṉwè, mi pa kènda gô takilya ṉwè iyumbuṉô y’Anyambyè ni mèpe kamba ge n’imya. 2Konde mi pa kenja gô mya gôre ṉwè ôsam̃u ômwèṉè kaô Yesu‐Krist, ni Yesu‐Krist banyô pa gô krosi. 3My’avegagi na ṉwè kè gw’idèla, na gw’itya, na gw’itatam̃iṉa sipôlô; 4n’igambi nyam̃ n’ikambiṉi sam̃ si re pegeg’agamba m’imya mi kond’aṉaga, ndô gw’itum̃inya s’Iṉiṉa na si ngulu, 5ko ibekelyi saṉi dôṽyô aranga gw’imya s’aṉaga ndô gô ngulu y’Anyambyè.
6Ndô azwè kambiṉ’imya gôr’aṉaga wa rèti, arang’imya si ntye yiṉo, ge s’ivangiṉi yi ntye yiṉo, yi be twe nyawènyawè; 7azwè kambiṉ’imya s’Anyambyè, s’isam̃u yi ngaka na s’iyumbuṉô, s’aliwô dôṽyô n’Anyambyè ntye yiṉo vangôgô ro gw’ipendi sazô, 8imya si r’ivangiṉi yi ntye yiṉo si re mye sô, konde arwe nè w’amyeṉi sô, gavoṉo wi pa tô banye Rerè y’ivenda gô krosi. 9Ndô ga nt’are tèndô pa, inè, isam̃u yi r’antyo pa jeṉa, n’isam̃u yi r’arôy pa jogo, yi re yi pa tum̃inyô gw’irèm̃a y’aṉaga, n’isam̃u y’agekizô n’Anyambyè gôre waô wi tondè. 10Anyambyè arum̃inyi zwè yô n’Iṉiṉi nyè. Konde Iṉiṉa nyi kèlagèl’isam̃u yôdu, vangaṉ’isam̃u y’ôronga y’Anyambyè. 11Konde mande gôr’aṉaga e r’avôr’isam̃u y’aṉaga, kaô iṉiṉa ny’ôma nyi re gô gare ntye yè? Yeṉo kè e zel’ôma wi my’isam̃u y’Anyambyè, kaô Iṉiṉa ny’Anyambyè.
12Ndô azwè pa pô iṉiṉa nyi ntye yiṉo, ndô iṉiṉa mè nyi pila gôr’Anyambyè, ko zwè mya isam̃u y’avenyô zwè n’Anyambyè v’imèpiṉô sè. 13N’azwè kamba yô, aranga n’agamba mi nènjô n’imya s’aṉaga, ndô n’agamba mi nènjô n’Iṉiṉa, mbènguṉag’isam̃u y’Iṉiṉa n’agamba m’Iṉiṉa. 14Ndô ôma gô njaṉô yè awonge du isam̃u y’Iṉiṉa ny’Anyambyè, konde yi r’edosu gôre yè, n’ayè ayolye gô kôtiza yô, konde yi kôtizô kaô n’Iṉiṉa. 15Ndô ôma re mpangiṉi y’Iṉiṉa e jèkèly’isam̃u yôdu, n’ayèmè e pa jèkèlyô n’ôm’edu. 16Konde mande are mya p’ipikilya sa Rerè gô nènjè? Ndô azwè, azw’are n’ipikilya si Krist.
Currently Selected:
I Kôrinti 2: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
