I Kôrinti 14
14
1Gombizaṉ’itonda. Yônguṉaṉ’isam̃u yi pô n’Iṉiṉa, ndô pôsô gô poga.
2Konde ayè yi kamb’iṉèm̃è s’aṉongw’am̃ori e pa kamba gôr’aṉaga, ndô gôr’Anyambyè, konde e zel’ôma wi kôtiza, ndô gw’Iṉiṉa e kamb’isam̃u y’iyumbuṉô. 3Ayè yi poga e kamba gôr’aṉaga isam̃u yi nuginya, na yi tevuṉa, na y’ôzindyô. 4Ayè yi kamb’iṉèm̃è y’aṉongw’am̃ori e nuginy’ôkuṽi wèmè; ayè yi poga e nuginye mandô.
5Mi bel’aṉwè du ga gamb’iṉèm̃è y’aṉongw’am̃ori, ndô pôsô nè, vogaṉi. Ayè yi poga ar’ômpôlô vyagaṉô na yè yi kamb’iṉèm̃è y’aṉongw’am̃ori, kaô abènguṉa, ko mandô dèng’iṉuginya. 6Ndô vèṉo, awarera, ja my’abya gôre ṉwè nkambag’iṉèm̃è y’aṉongw’am̃ori, mi ko dwaṉ’isolo nde gôre ṉwè, ja mi pa kamba na ṉwè gô myez’isam̃u y’iyumbuṉô, ge y’imya, ge y’ipoga, ge y’inènja?
7Ga nt’are yom̃a yi re yi zele n’ômwèy w’em̃èṉo, ndô yi kamba ga nt’ar’ôrombo ge ñombi, ja yi pa tev’ibangwaṉa s’anyôy, ko myô sè ezom̃a zi re tôngô pa na zi re bôlô pa, twa p’ôrombo ntyo ñombi? 8Na j’ôrombo e pa kamba zange, mande be kekiza gw’igoṽi? 9Yeṉo kè aṉwè, j’aṉw’agamba n’iṉèm̃è yaṉi agamba mi re ko kôtizô, mande be mya are ṉwè kamba pa? Konde aṉwè be kamba gô nyawènyawè.
10Vang’adwaṉ’aṉongo m’inkambiṉi am̃enge yeṉo gô ntye, e zele nkambiṉi yi re mpiviṉi fo; 11sambô ja my’amya mpiviṉi yi nkambiṉi, gambèṉè mi be dwaṉa gôre yè yi kamba g’ôma w’iṉongw’inyèṉè kè. 12Yeṉo kè ṉwè, gô re nè, aṉwè jônguṉa pôlô isam̃u yi pôn’Iṉiṉa, wutaṉ’isam̃u yi nuginye mandô, ko ṉwè dènga yô imyenge.
13Sambô ayè yi kamb’iṉèm̃è y’aṉongw’am̃ori e ga gwen’Anyambyè nkolo gô dwaṉa ni ngulu yi bènguṉa kè. 14Konde ja my’akambiṉ’Anyambyè n’iṉèm̃è yi re y’amyô, iṉiṉi nyam̃ nyi kambiṉa, ndô ikôtizi sam̃ si pa nunguṉa du. 15Sambô ga lendô sèṉi? Mi be kambiṉ’Anyambyè n’iṉiṉi nyam̃, mi be kambiṉ’Anyambyè kè n’ikôtizi sam̃; mi be jemba n’iṉiṉi nyam̃, ndô mi be jemba kè n’ikôtizi sam̃. 16J’aranga yeṉo, j’aw’asaviṉa n’iṉiṉa, gambèṉè ayè yi re e pa my’inkambiṉi, e be bulya Amèn sè, gô be po akeṽa, gô re nè, e pa mya nt’akambo? 17Awè rèti ô p’akeṽa mbyambye, ndô ôm̃ori e pa nuginyô. 18Mi p’Anyambyè akeṽa inè, mi kamb’inkambiṉi vyagaṉô n’aṉwèdu; 19ndô gô mandô mi ko tonda gô buly’agamb’ataṉè n’ikôtizi sam̃, ko myè nuginy’am̃ori kè, vyagaṉô n’igôm̃i ny’intozèny s’agamba gô nkambiṉi yi re y’amyô.
20Awarera, alwaṉaṉ’awaṉa gw’ikôtiza; ndô lwaṉaṉ’awaṉa gw’ibe, na gw’ikôtiza lwaṉaṉ’aṉôm̃aṉôm̃yè. 21Are tèndô pa gw’ivanga inè: Mi be kamba n’aṉaga wiṉo iṉèm̃è: Mi be kaba n’aṉaga wiṉo iṉèm̃è y’aṉaga w’aṉongw’am̃èṉè n’iṉumbu y’aṉongw’am̃èṉè, vangaṉe yeṉo wi ze pôganyô myè, bulye Rerè. 22Yeṉo, inkambiṉi si r’elingilyô, aranga gôre mongi wi re bekelya pa, ndô gôre waô wi re wi pa jivira; ndô ipoga si r’elingilyô, aranga gôre mongi wi re w’ayivire, ndô gôre waô wi jivira. 23Sambô jogo mandô yôdu y’adataṉa gô mbôra mô, ko waôdu kamb’inkambiṉi, j’aby’aṉaga wi re wi pa nènga, ge aṉaga wi re wi pa jivira w’ajingiṉa, w’awulya inè, aṉwè taṉa? 24Ndô ja waôdu w’apoga, na j’aby’ôma are e pa jivira, ge ôma are e pa nènga, e be suryô ne waôdu, ayèkèlyô ne waôdu, 25isam̃u y’iyumbuṉô y’ôrèm̃i wè yi be myezô, ko yè pôsunyô ôzô wè gô ntye azaviṉ’Anyambyè, arakilya nè, Anyambyè are rèti gô gare yaṉi.
26Sambô, awarera, ga lendô sèṉi? Gô dataṉa ṉwè, aṉwè bya wiṉo n’ôwembô, wiṉo n’inènja, wiṉo n’itum̃inya, wiṉo ni nkambiṉi, wiṉo n’ibènguṉa, isam̃u yôdu yi ga lendô gô nuginya. 27J’ôm’akambe nkambiṉi yi re y’amyô, yi ga gambô n’aṉag’aṽaṉi ntyo ararô, aranga vyagaṉô na vovo, ôm’edu gw’egômbe zè, k’ôm̃ori bènguṉa; 28ndô j’ezel’ôma wi re ko bènguṉa, wiṉo e ga lwaṉe dodo gô mandô, ko yè kamba n’ôkuṽi wèmè, n’Anyambyè kè. 29Ndô ivogisi yi ga gamb’imbaṉi ntyo ararô, ko mongi mori jèkèlya; 30ndô j’ôm’ômwèṉè are baru are n’igamba ny’imyeza, gambèṉè ôlônga e ga lônge dwaṉe dodo. 31Konde aṉwèdu aṉwè ko jolye poga ôm̃ori ôm̃ori, ko aṉaga waôdu nènjô, ko waôdu tevuṉô. 32Aṉiṉa m’ivogisi mi pangiṉô n’ivogisi; 33konde Anyambyè arang’Anyambyè y’imbèlèkè, ndô y’am̃ènjè.
Ga nt’are gw’imandô s’iyombwi sôdu, 34antô wi ga lwaṉe dodo gw’imandô, konde wi ze pô p’inyanga gô kamba gô sô; ndô wi ga lwaṉe gw’ipangiṉô, ga nte bulya kè ivanga. 35Ndô ja w’abela gô nèng’ôsam̃u edu, wi ga ṽamby’aṉôm̃e saômè gw’inagô saô; konde re ntyoṉi gôr’ômwantô gô kamba gô mandô. 36Igamba ny’Anyambyè ny’avili gôre ṉwè? mbè ny’aṽyeṉi dadyè gôre ṉwè?
37J’ôm’edu apikilya nè, ayè ôvogisi, ge inè, e nènjô n’Iṉiṉa, e ga mye mbyambye inè, isam̃u yi tèndiṉa myè ṉwè, yô n’isômbya sa Rerè. 38Ndô j’ôm’edu amye, e ga lwaṉ’amya.
39Yeṉo, awarera, yônguṉaṉi gô poga, ko alegaṉi gô kamb’inkambiṉi. 40Ndô isam̃u yôdu yi ga lendô nt’are kwèkwè n’ôtogo fo.
Currently Selected:
I Kôrinti 14: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
