I Kôrinti 15
15
1Mi myeza ṉwè, awarera, Ntyangô Mbya y’agambiṉi myè ṉwè, yi re ṉwè bonga pa, gô yô aṉ’ware kum̃aṉa pe jola, 2na gô yô aṉw’are sungiṉô pa, j’aṉw’akôt’igamba ny’agambiṉi myè ṉwè ngwasi, kaô aṉw’are bekelya pa vo nyawè.
3My’anènji ṉwè gw’alônga igamba ny’awongyô myè, inè, Krist ayuwi g’ômwanja w’ibe sazô ga nt’ar’irèndo; 4na inè, aṽènyô, arôngunyô gô ntyugu yi ntyarô ga nt’ar’irèndo; 5na inè, awôm̃unyi gôre Kefas, avila vovo gôr’igôm̃i n’aṽaṉi. 6Avila vovo awôm̃unyi gôr’awarerè vyagaṉô ni nkam̃a ôtaṉè gw’egômbe mô; awenge gôre waô wi p’are bo, n’awèwo wi re dèwa p’antyôviṉô. 7Avila vovo awôm̃unyi gôre Yakobu, n’avila vovo gôre rôm̃i yôdu. 8Na gô num̃uṉa awôm̃unyi kè gôre myè g’ôma w’ajaṉô egômbe ziṽaga ro; 9konde myè ômwangômè gôre rôm̃i, mi zele n’inyanga kè nyi fweyô inè, erôm̃i, konde my’agombizi mandô y’Anyambyè. 10Ndô v’imèpiṉô s’Anyambyè my’are ga nt’are myè, n’imèpiṉô sè gôre myè si re pegege nyawènyawè; ndô my’ayanji vyagaṉô na waôdu; ndô aranga myè, ndô kaô imèpiṉô s’Anyambyè si re na myè. 11Sambô atwa myè mbya atwa waô mbya, yeṉo kambiṉa zwè, na yeṉo aṽekelyi ṉwè.
12Ndô ja Krist akambiṉô; inè, arôngunyô avila gw’ijuwa, gambèṉè awèwo gôre ṉwè wi bulya nè, e zel’itôngunyô sa mongi wi re juwa pa sèṉi? 13Ndô ja e zel’itôngunyô sa mongi wi re juwa pa, gambèṉè Krist e pa tôngwa du. 14Na ja Krist e pa tôngwa, gambèṉè ikambiṉi sazô si r’ôsam̃u wa nyawènyawè n’ibekelyi saṉi kè ôsam̃u wa nyawènyawè. 15Gambèṉè kè azw’adèngô iyeṉi yi nôka y’Anyambyè, gô re nè azw’arakilyi g’ômwanja w’Anyambyè, inè, arôngunyi Krist avila gw’ijuwa, ndô ja mongi wi re juwa pa wi pa tôngunyô, gambèṉè e pa tôngunye Krist. 16Konde ja mongi wi re juwa pa wi pa tôngunyô du, gambèṉè Krist e pa tôngwa. 17Na ja Krist e pa tôngwa, gambèṉè ibekelyi saṉi si r’ôsam̃u wa nyawènyawè, aṉwè p’are kè gw’ibe saṉi, 18gambèṉè kè waô wi re dèwa pa gôre Krist wi re pera pa. 19J’azw’adôṽiṉe Krist igum̃u kaô gw’em̃èṉo ziṉo dadyè, gambèṉè azw’are n’azingô vyagaṉô n’aṉaga waôdu.
20Ndô vèṉo Krist arôngwi avila gw’ijuwa, ayè n’ôlônd’ôlônga wa mongi wi re dèwa p’antyôviṉô. 21Konde ga nt’aṽyeṉ’ijuwa vo ôma, vo ôma kè aṽyeṉ’itôngwa sa mongi wi re juwa pa. 22Na ga nte juw’aṉaga waôdu ni Adam, yeṉo kè waôdu wi be dwaṉa bo gô ntiṉa yi Krist, 23ndô ôm’edu gô nkumbi yèmè, Krist n’ôlônd’ôlônga, avila vovo waô wi re gôre Krist, gw’egômbe z’ibyi sè. 24Vovo be bye ntyay, gô be pè iṉongo gôr’Anyambyè ni Rerè, ayè jiliza p’ipangiṉa sôdu n’anyanga môdu, n’ingulu sôdu. 25Konde ayè ko pangiṉa kwanga gô be fwelè ilôvalôvi yôdu g’ôdôlôngô w’intyôzô sè. 26Ôlôvalôvi ôṉum̃uṉa wi be jilizô wô ne ijuwa. 27Konde Anyambyè awel’isam̃u yôdu g’ôdôlôngô w’intyôzô sè. Ndô gô bulyè inè, yom̃a yôdu y’arugizô gôre yè, ko myô mbyambye inè, ayè y’arugizi yom̃a yôdu gôre yè are tômbô pa. 28Ndô ja yom̃a yôdu tugizô pa gôre yè, gambèṉè ômwaṉa ayèmè e be tugizô gôre yè y’arugizi yom̃a yôdu gôre yè, ko Anyambyè dwaṉa yôdu na gô yôdu.
29J’aranga yeṉo gambèṉè waô wi batizô g’ômwanja wa mongi wi re juwa pa wi be denda sè? Ja mongi wi re juwa pa w’arôngwa du, ntiṉa nde yi batizô waô g’ômwanji waô? 30Ni ntiṉa nde yi re zwè igwèry’edu gw’ererya? 31Awarera, ntiṉa yi re myè ko sôgwa g’ômwanji waṉi gôre Yesu‐Krist, ya Reri yazô, yi panga myè gô bulya inè, mi juwe ntyugw’edu. 32Ja my’anweṉi n’inyam̃a gw’Efèsi ga nt’are mpangiṉi y’aṉaga, ôba nde wi re na myè vovo? Ja mongi wi re juwa pa wi pa tôngwa, gambèṉè azwè ga nye ayonga, konde mèṉè azwè be juwa. 33Aremizôṉi: irangaṉô imbe yi fweviz’intyal’imbya. 34Winyaṉi gô ndwaṉi mbya, ga nt’are kwèkwè, ko ayanjaṉ’ibe; konde awèwo wi zele n’imya s’Anyambyè, mi bulya gô ntyoṉi yaṉi.
35Ndô ôma e be bulya inè: Mongi wi re juwa pa wi tôngunyô sèṉi? n’ôṉongo w’ôkuṽa nde wi be bya na waô? 36Aw’ôtem̃u, ezom̃a zi bèṉô wè, zi pa fwelya du kaô z’ajuwa. 37N’ezom̃a zi bènô wè, ô pa bèṉ’ôkuṽa wi be pôm̃a vovo, kaô intyw’irevô, vendetwa ny’imba, ntyo ny’ôlônd’ômwèṉè; 38avila vovo Anyambyè e pa nyô ôkuṽa ga nt’arondyè, na gw’intyw’edu e p’ôkuṽa wi re kwèkwè gô nyô.
39Izôṉe yôdu yi zele mbela mô; ndô r’ôzôṉe ômwèṉè w’aṉaga, n’ôzôṉe ômwèṉè w’inyam̃a, n’ôzôṉe ômwèṉè w’inyoṉi, n’ôzôṉe ômwèṉè w’intyuè. 40Ar’ikuṽa kè y’ôrôṽa, n’ikuṽa yi ntye yiṉo; ndô mèpiṉi y’ikuṽa y’ôrôṽa mbela ni yè, ni mèpiṉi y’ikuṽa yi ntye yiṉo mbela ni yè. 41Are mbambiṉi nyèṉè yi nkômbe, ni mbambiṉi nyèṉè y’ôgwèli, ni mbambini nyèṉè y’igègèṉi; n’igègèṉi yi bangwaṉa ṉi mbambiṉi.
42Yeṉo kè ar’itôngunyô sa mongi wi re juwa pa. Ôkuṽa wi bèṉô gw’iboṉa, wi tôngunyô gw’itw’awoṉa; 43wi bèṉô gw’ipèdyô, wi tôngunyô gw’ivenda; wi bèṉô gô ndèliṉi, wi tôngunyô gô ngulu; 44wi bèṉô ôkuṽa nt’ayanyô wô, wi tôngunyô ôkuṽa mpaṉi g’iṉiṉa. J’adwaṉ’ôkuṽa wi jaṉô njaṉôgô, gambèṉè ar’ôkuṽa kè mpaṉi g’iṉiṉa. 45Yeṉo are tèndô pa inè: Ôm’ôlônga Adam arweṉ’iṉiṉa nya bo. Adam num̃uṉa ayè iṉiṉa nyi p’em̃èṉo. 46Ndô ezom̃a zi r’egolaṉi g’iṉiṉa zi pa dônga, ndô alôngi n’ezom̃a z’ayanyô njaṉôgô; avila vovo ezom̃a zi r’egolaṉi g’iṉiṉa. 47Ôm’ôlônga avili gô ntye, ayè kè wi ntye; ôma w’aṽaṉi avili g’ôrôṽa. 48Ga nt’ar’ôma wi ntye, yeṉo re kè waô wi ntye; na ga nt’ar’ôma w’ôrôṽa, yeṉo re kè waô w’ôrôṽa. 49Na ga nt’are zwè dwaṉa pa n’ebagaṉô z’ôma wi ntye, azwè be dwaṉa kè n’ebagaṉô z’ôma w’ôrôṽa.
50Awarera, mi buly’igamba nyiṉo inè, ôzôṉe ni ntyiṉa y’ayolye niv’iṉongo ny’Anyambyè, ge iboṉa niv’itw’awoṉa.
51Vônaṉi, mi bulinya ṉwè isam̃u y’iyumbuṉô, inè, azwèdu azwè ze dèw’antyôviṉô, ndô azwèdu azwè be kalunyô, v’igamba ny’agwaṉa, 52v’ivyaka ny’intyo, g’ôrombo wi num̃uṉa. Ôrombo wi be tôngô, na mongi wi re juwa pa wi be tôngunyô gw’itw’awoṉa, n’azwè azwè be kalunyô. 53Konde ôkuṽa wiṉo wi ga wor’itw’awoṉa, n’ôkuṽa wiṉo w’ijuwa bor’itw’ayuwa.
54Ndô ôkuṽa wiṉo wi boṉa bora p’itw’awoṉa, n’ôkuṽa wiṉo w’ijuwa bora p’itw’ayuwa, vovo be dwaṉ’igamba rèti nyi re tèndô pa inè: Ijuwa si re mèṉô pa n’ikeṽa. 55Ijuwa, ikeṽi so si re gwe? Ijuwa, elogoṉi zo zi re gwe? 56Elogoṉi z’ijuwa n’ibe; ni ngulu y’ibe n’ivanga. 57Ndô akeṽa gôr’Anyambyè e pa zw’ikeṽa vo Reri yazô Yesu‐Krist!
58Yeṉo, awarera wi tondô myè, lwaṉaṉi jolajola, ko azugyazugyôni, njanjag’eṽilô za Rerè ni ngulu egômbe zôdu, konde aṉw’avôrô inè, ijanji saṉi si ze dwaṉe sa nyawè gôre Rerè.
Currently Selected:
I Kôrinti 15: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
