I Kôrinti 12
12
1G’ômwanja w’isam̃u yi pô n’Iṉiṉa, awarera, mi pa bela ṉwè gô dwaṉ’imya fo. 2Aṉw’avôrô nè, gw’avegagi ṉwè aṉaga wi ntye, aṉw’arwanyô gw’ikaṉa s’am̃am̃u, nkôṽy’edu y’agèndyô ṉwè. 3Yeṉo mi myeza ṉwè inè, e zel’ôma, j’akamba n’Iṉiṉa ny’Anyambyè, e bulya nè, Yesu are savô pa! e zele kè ôma are ko bulya nè, Yesu ne Ôvangiṉi! kaô n’Iṉiṉ’Iṽya.
4Isam̃u yi pô yi bangwaṉa, ndô Iṉiṉa nyi r’imô; 5ar’aṉongo mi njanjiṉi kè, ndô Rerè mô; 6ar’aṉongo mi ṽilô yi janjô, ndô Anyambyè mô, yi janj’isam̃u yôdu gôr’aṉaga waôdu.
7Ndô itum̃inya s’Iṉiṉa gôr’ôm’edu si pô gô nuginya. 8Konde gôr’ôm̃ori are pô p’igamba ny’imya n’Iṉiṉa mè; na gôr’ôm̃ori igamba ny’ikôtiza, ga nt’ar’Iṉiṉa mèmô; 9na gôr’ôm̃ori ibekelya, n’Iṉiṉa mèmô; na gôr’ôm̃ori ngulu yi jinga, n’Iṉiṉa mèmô; 10na gôr’ôm̃ori ngulu yi pange lemba; na gôr’ôm̃ori ipoga; na gôr’ôm̃ori ikèlagèl’aṉiṉa; na gôr’ôm̃ori gô kamb’iṉèm̃è s’aṉongw’am̃ori; na gôr’ôm̃ori ibènguṉa s’inkambiṉi. 11Ndô isam̃u yiṉo yôdu yi janjô n’Iṉiṉ’im̃ori dadyè, nkeriṉag’ôm’edu ôsam̃u wèmè nte tonda nyô.
12Konde ga nt’ar’ôkuṽa ômô ndô ṉam̃a yenge, na ga nt’are ṉam̃a yôdu y’ôkuṽa, vangaṉe y’adwaṉa yenge, yô n’ôkuṽ’ôm̃ori dadyè, yeṉo re kè gôre Krist. 13Konde azwè du azw’aṽatizô gw’Iṉiṉ’im̃ori gô pangô ôkuṽ’ôm̃ori dadyè, Iju ni Grèk, asaka n’awôntye, n’azw’ayonjô n’Iṉiṉ’im̃ori dadyè.
14Yeṉo ôkuṽa arang’eṉam̃’em̃ori dadyè, ndô wi re pangô pa ni ṉam̃a yenge. 15J’ôgôlô w’abulya nè: Gô re nè, my’arang’ôgo, gambèṉè mi zele g’ôkuṽa, — sambô wi zele g’ôkuṽa? 16Na j’ôrôy w’abulya nè: Gô re nè, my’arang’intyo, gambèṉè mi zele g’ôkuṽa, — sambô wi zele g’ôkuṽa? 17Arwe nè ôkuṽa wôdu n’intyo, gavoṉo ijogo sô ko pila gweṉi? Arwe nè wôdu n’ijogo, gavoṉo inuṉa sô ko pila gweṉi? 18Ndô vèṉo Anyambyè are kenja p’eṉam̃y’edu g’ôkuṽa ga nt’arondi yè. 19Arwe nè ṉam̃a yôdu n’em̃ori dadyè, gavoṉo ôkuṽa wi re gweṉi? 20Ndô vèṉo ṉam̃a yi re yenge, ndô ôkuṽ’ôm̃ori dadyè. 21Intyo ny’ayolye buliny’ôgo inè: Mi zele n’isolo na wè; ge ewônjô buliny’agôlô inè: Mi zele n’isolo na wè. 22Ndô rèti, ṉam̃a mè y’ôkuṽa yi jeṉô dèladèla kwè yi re n’isolo; 23ni ṉam̃a yi jeṉô zwè inyanga fo g’ôkuṽa, yiṉo yô kômbiṉa zwè n’ôlubô vyagaṉô. Yeṉo ṉam̃i yazô yi r’ôlubô fo, yi dèng’ôlubô vyagaṉô, 24ndô ṉam̃a yi dubô yi zele n’isolo nyi dubô. Anyambyè are kenja p’ôkuṽa gô p’ôlubô vyagaṉô g’eṉam̃a mè zi re pèṉa pa, 25ko alwaṉ’ibangwaṉa g’ôkuṽa, ndô inè, ṉam̃a yôdu yi ga lwaṉe mbela mô. 26Na j’eṉam̃’em̃ori z’ajeṉe nkaza, gambèṉè ṉam̃a yôdu y’ajeṉe nkaza ta na zô; j’eṉam̃’em̃ori z’adubô, gambèṉè ṉam̃a yôdu y’ajeṉe mbya ta na zô.
27Aṉwè n’ôkuṽa wi Krist, n’aṉwè ṉam̃i yè, ôm’edu gô mbôri yè. 28N’Anyambyè are dôṽya pa gô mandô, gw’alônga rôm̃i, avila vovo ivogisi, avila vovo iṉènji, avila vovo waô wi re ko pange lemba, avila vovo waô wi re ni ngulu yi jinga, na yi nunguṉa, na yi pangiṉa, na yi kamb’iṉèm̃è s’aṉongw’am̃ori. 29Waôdu rôm̃i? Waôdu ivogisi? Waôdu iṉènji? Waôdu wi pange lemba? 30Waôdu wi re ni ngulu yi jinga? Waôdu wi kamb’iṉèm̃è s’aṉongw’am̃ori? Waôdu wi bènguṉa?
31Wutaṉi pôlô isam̃u imbyamè yi pô. Ndô mi be teva ṉwè mpoṉo yi re mbya vyagaṉô pôlô.
Currently Selected:
I Kôrinti 12: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
