I Kôrinti 11
11
1Vèryaṉi myè, ga nte pèrya myè Krist.
2Mi sum̃inya ṉwè konde aṉwè jônginya myè gw’isam̃u yôdu, avenjavenj’inènji sam̃ s’aveṉi myè ṉwè.
3Ndô mi bela ṉwè gô mya, inè, Krist n’ewônjô z’ôṉôm̃y’edu, n’ôṉôm̃e n’ewônjô z’ômwantô, n’Anyambyè n’ewônjô zi Krist. 4Ôṉôm̃y’edu e kambiṉa ge poga, ewônjô diviṉa pa, e pèdy’ôma wi pangiṉè. 5Ômwantô edu e kambiṉa ge poga, ewônjô zange, e pèdy’ôma wi pangiṉè; konde ar’egolaṉi g’ômwantô j’asèngiṉô. 6Konde j’ômwantô e pa diviṉô, gambèṉè itwe sè si ga reṉô. Ndô j’are ntyoṉi gôr’ômwantô gô teṉô itwe sè ge gô sèngiṉô, e ga liviṉô. 7Ôṉôm̃e e ze n’inyanga nyi diviṉ’ewônjô zè, konde ayè n’ebagaṉô n’ônjèlènjèlè w’Anyambyè, ndô ômwantô ayè n’ônjèlènjèlè w’ôṉôm̃e. 8Konde ôṉôm̃e e pa pila gôr’ômwantô, ndô ômwantô ay’avili gôr’ôṉôm̃e; 9n’ôṉôm̃e e pa pangô gô ntiṉa y’ômwantô, ndô ômwantô ay’ayangyô gô ntiṉa y’ôṉôm̃e. 10Yeṉo, ômwantô e ga lwaṉe n’elingilyô z’ipangiṉô gw’ewônjô zè, g’ômwanja w’iyenjèl. 11Ndô gôre Rerè, ômwantô are n’isolo n’ôṉôm̃e, n’ôṉôm̃e kè n’isolo n’ômwantô. 12Konde ga nt’avil’ômwantô gôr’ôṉôm̃e; yeṉo kè ôṉôm̃e e dwaṉa vo ômwantô, ndô yom̃a yôdu yi pila gôr’Anyambyè. 13Aṉwèmè yèkèlyaṉi, twa pa are kwèkwè gôr’ômwantô gô kambiṉ’Anyambyè ewônjô gw’igala? 14Irèm̃i yaṉi yi pa nènja ṉwè inè, j’ôṉôm̃e e dwaṉa n’itwe ida, are ntyoṉi gôre yè? 15Ndô j’ômwantô are n’itwe ida, gambèṉè ndaga mbya gôre yè, konde itwe si re yè pô pa g’ezom̃a zi diviṉè? 16Ndô j’ôma ajeṉô inè, e tonda gô dôṽ’impaga, azw’aze ni ntyale ôṉongo mè, ge imandô s’Anyambyè.
17Ndô gô kamba myè yeṉo, mi pa sum̃inya du inè, aṉwè dataṉa aranga gô mèpa, ndô gô fweve nfwevaga. 18Gw’alônga, gô dataṉa ṉwè gô mandô, mi jogo nè, ar’anyôm̃aṉô gôre ṉwè, n’ajivira myè nyô kè; 19konde ibangwaṉa si re ko dwaṉa gôre ṉwè, ko waô wi re dèngô p’aṽya myô gôre ṉwè. 20Sambô, gô dataṉa ṉwè ta, yeṉo aranga gô ny’inya sa Rerè; 21konde gô nya ṉwè ôm’edu e sunge bong’inyi sèmè, k’ôm̃ori dèka ni njaṉa, k’ôm̃ori bongô. 22Sambô aṉw’aze n’inagô si re ṉwè gô nya na gô jonga? Gô pèdya ṉwè mandô y’Anyambyè, ayeṉiza waô ntyoṉi wi re wi zele n’ezom̃a? Mi be bulinya ṉwè sè? Mi be sum̃inya ṉwè? Gô ndaga yiṉo my’azum̃inye ṉwè du.
23Konde my’awongi gôre Rerè nt’aṉènji myè ṉwè, inè, Rerè Yesu, ôgwèra mèwoṉo w’agôtizyô yè, awongi mpèmba; 24n’ayè pa p’akeṽa, amoguṉi yô, awulya inè: Wiṉo n’ôkuṽi wam̃ wi moguṉô g’ômwanji waṉi; lendaṉi yeṉo gô jônginya myè. 25Mbela mèmô kè, inya vya, awong’imogi, awulya inè: Imogi nyiṉo ne njeka nyoṉa gô ntyiṉi yam̃; lendaṉi yeṉo egômby’edu zi be jonga ṉwè nyô gô jônginya myè. 26Konde egômby’edu zi be nya ṉwè mpèmba yiṉo, ayong’imogi nyiṉo, aṉwè myez’ijuwa sa Rerè kwanga gô be byè.
27Yeṉo ayè yi be nye mpèmba yiṉo ge jong’imogi nya Rerè inyanga fo, e be dwaṉ’ôgara g’ômwanja w’ôkuṽa ni ntyiṉa ya Rerè. 28Sambô ôm’edu e ga gèlagèl’ôrèm̃i wè, vang’ayè nye mpèmba mèyoṉo, ayong’imogi mènyoṉo; 29konde ayè yi nya ayong’inyanga fo, ko ayeṉ’ôkuṽa wa Rerè, e nya ayong’ôgara g’ôkuṽi wèmè.
30Gô ntiṉa yiṉo awenge gôre ṉwè wi re dèla n’inkaṉi, n’awenge wi re juwa pa. 31Arwe nè azw’ajèkèly’ikuṽi yazômè, gavoṉo azw’arô jèkèlyô. 32Ndô gô jèkèlyô zwè, azwè sôny’ôgôm̃a ne Rerè inè, azw’avô ôgara ta ni ntye yiṉo. 33Yeṉo, awareri yam̃, gô dataṉa ṉwè gô ny’inya, wôndaṉaṉi. 34Jog’ôm’edu are ni njaṉa, e ga nye gô nagô yè, ko idataṉi saṉi s’ava ṉwè ôgara.
Mi be kenj’isam̃u im̃ori gô be bya myè.
Currently Selected:
I Kôrinti 11: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
