SEPANYA 3
3
Yerusale ndahuku pai ndasorepaka
3:1-13
1Pulorumo siko Yerusale, kota anu baleparu anu meewa ri Pue pai anu mamparini waʼa ntaunya ngkalionya! 2Marugimo kota anu bareʼe mampokono patiendo i mPue, pai bareʼe woʼu mampedongeka waʼa mpeseko-A, anu bareʼe mantambusaka katuwunya ri Pue, pai bareʼe merapi petulungi ri Sira.
3Waʼa ntau bangke ri raya ngkota setu jamo ewa singa mengara-ngara, waʼa ntopobotusi jamo ewa serigala anu maoro; tau seʼe maʼai ngkanyanya painaka sako sambenci wukunya bemoreʼe anu nadika bangkereme. 4Waʼa nabinya bareʼe motetala mpodago pai bareʼe ndasarumaka; waʼa ntadu mpanyomba mampakakarika nunjaa anu ndapatani tila i mPue pai mantoro baliko waʼa mpadika i mPue Ala da naka mampaporasi tau seʼe ngkalionya. 5Paikanya i Pue ntongo njaupa ri kota setu; Sira bareʼe bali-bali mawianaka anu monco anu bereʼe da kasalanya. Sampowuro-sampowuro manoto Sira mawai yoa ri waʼa ntau-A. Paikanya tau anu bareʼe mangaincani yoa ri kota setu ntongo mowia anu majaʼa bereʼe ea matanya.
6Ndatoʼo i mPue, “Yaku da mampapayamo sondo banca; waʼa ngkotanya kugero, pai waʼa bente sangkani pai waʼa menaranya kupapewali awu. Waʼa ngkota ntau seʼe mewali njii bemoreʼe tau mampeari pai waʼa jayanya njii. 7Kunawa-nawa, ‘Seʼi-seʼi manoto waʼa ntau-Ku da mantubunaka Yaku pai da mampedongekamo peseko-Ku. Manoto da naendo ntau seʼe.’ Paikanya katongawanya, tau seʼe jakako teranga-rangani pampowianya jaʼa.
8Paikanya ndijagamo! Ndipopeamo eonya Yaku da mekakore ewa sambaʼa tau anu mogilu. Maka roomo Kubotusi da mangampasambaka mpengaya-ngaya banca pai waʼa ngkamokole, da kumampapapereka tau seʼe karau ndaya-Ku. Samalele lino da pura nakoni apu ngkarau ndaya-Ku.
9Paikanya ri purinya Yaku da mangabalisaka raya waʼa banca setu, painaka tau seʼe da mekakai ri Yaku, pai banyamo ri waʼa lamoa ntaninya. Waʼa banca setu da mepoʼinaya ri Yaku. 10Sako ungka ri Sudani anu lawa-lawa setu, waʼa ntauku anu tewuraga setu da rata pai da mampanyombaka panyombanya ri Yaku. 11Ri tempo setu ee waʼa ntauku, neʼemo ndipomaea kakominya maewamo Yaku. Yaku da mangairi isema tau anu mobangke-bangke pai mekiunde pai komi bareʼemo da meewa ri Yaku ri pongkuntana-Ku anu magali. 12Ndatiria da Kupapeari sambaʼa banca anu lauka raya, anu mancarumaka pompelae-Ku. Tau seʼe maya maroo-roo njairia. 13#Pepat. 14:5 Waʼa nto Isaraeli anu yabinya, bareʼemo da mowia jaʼa ri sema ntano; tau seʼe bareʼemo da mombamba pai bareʼemo da metengosi. Tau seʼe da gana-gana pai uono katuwu ntau seʼe, pai bereʼe tau da ndapokaeka.”
Ngayu wongkondaya
3:14-20
14Ee Isaraeli, ndipeboomo pai ndipongayumo!
Ee Yerusale ndipodoro-doromo ri kawongko ndayami!
15Maka i Pue meʼontomo mangahuku komi;
Sira mangarumbamo waʼa iwalimi.
Komi nakariani mokole Isaraeli, Puemu ngkaliomu.
Seʼi-seʼi neʼemo maeka komi.
16Da rata temponya nepa da natoʼo waʼa ntau,
“Ee Yerusale neʼemo maeka pai teloo rayamu.
17Komi ndakariani i mPue Ala puemu anu maroso.
Komi menangi podo ua kuasaa.
Mawongko pai madonde raya i mPue ua komi,
ua katowe ndaya-A ndawaika komi katuwu dawoʼu.
18Ua komi, Sira mongayu mawongko raya
ewa tau anu ntongo mposusa.”
Ndatoʼo i mPue,
“Karugi anu da mampakapari komi Kupalisimo
Katedikanakamu roomo Kupalisi.
19Da rata temponya anu mamparini siko da Kugero,
tau anu dingge da Kusorepaka;
pura-pura tau ndatawani da Kuponinika mewalili.
Kakapuru raya ntau seʼe da Kuwalisaka mewali katetubunaka;
ri mbeʼi ntano ri sambawo lino
tau seʼe da ndabangkei pai da ndaunde.
20Da rata temponya,
waʼa ntaumu anu jianja da Kuponinika mewalili.
Komi da Kupakatetoʼo ri sambawo lino,
pai kagana-gana ngkatuwumu da ndapapewalili muni.”
I Pue anu mantoʼomo seʼi.
Currently Selected:
SEPANYA 3: LAIPMF
Highlight
Share
Compare
Copy
Want to have your highlights saved across all your devices? Sign up or sign in
