SEPANYA 2
2
Patiendo da majea ungka ri salaa
2:1-3
1Ee banca anu bareʼe maincani maea, ponawa-nawamo, 2ri kabareʼapanya komi mangau pai malele ewa sese! Kajeamo ri kabareʼepanya rata eo ngkaraundaya i mPue painaka komi napere ngkarau ndayaa anu mareka-reka setu. 3Ndipewalilimo ri Pue, ee komi anu lauka raya ri tana seʼi, pai pura-pura tau anu mepoʼinaya ri waʼa ncongkaa. Ndipowiamo silulu pai pepokono i mPue, pai ndipakalaukamo rayami ri suaraa. Tuarapa komi da lapa ungka ri popahuku ri eo i Pue da mantuju karau ndayaa.
Tadeasi ri banca anu mantolilimi Isaraeli
2:4-15
4 #
Yes. 14:29-31, Yer. 47:1-7, Yeh. 25:15-17, Yo. 3:4-8, Am. 1:6-8, Sak. 9:5-7 Ri kota Gasa bereʼe mau sambaʼa tau anu da ndasorepaka. Asikelo da njii bemoreʼe tau anu mampeari. Tau bangani Asido da narumpa ncambaʼa popaungku anu bareʼe ndasoro-soro ri ntongo ndeme pai waʼa ntau ri Ekero ndapokau mesuwu ungka ri kota ntau seʼe. 5Pulorumo komi, ee to Pelisiti, banca anu mampeari santuntu wiwintasi. Ndapakanotomo i mPue huku tilami. Sira da mangagero komi, pai bereʼe mau sambaʼa tau ungka ri oyomi anu da lapa. 6Daeramu anu mosu ri tasi da mewali pada ewo; waʼa ngkuani ntopongkambi pai waʼa bonco bimba da ndawangu njairia. 7Tau bangani Yahuda anu naleʼo lapa, da mampotundasi daera setu. Tau seʼe da mangangkambi pinatuwunya ri tana setu. Ane mawengi tau seʼe da njoʼu yore ri waʼa banua nto Asikelo. Maka i Pue, Pue Ala pue ntau seʼe da mangkariani muni tau seʼe pai da mampapewali gana-gana muni katuwunya.
8 #
Yes. 15:1–16:14, 25:10-12, Yer. 48:1–49:1-6, Yeh. 21:28-32, 25:1-11, Am. 1:13-15 Ndatoʼo i mPue Anu Makuasa, “Kudongemo waʼa banca Moabi pai Amoni mampetikodi pai mampasinggiri waʼa ntauku. Tau seʼe mompau-mpau mekiunde da mangarampa tana waʼa ntau-Ku. 9#Pal. 19:24 Ua ka-Yakunya anu tuwu, Pue Ala pue nto Isaraeli, Yaku da mangancaewe mayali-yali Moabi pai Amoni ewa Sodomo pai Gumora. Waʼa lemba setu da buke pai waʼa ntibubu bure pai awu anu bareʼe da pura nakantuwusi yopo ndui. Waʼa yabi ntauku anu lapa da mampamurui waʼa ntaunya, pai da mangarampa tana ntau seʼe.”
10Ewanceʼe waʼa ntau bangani Moabi pai Amoni da ndahuku ua pobangke-bangke pai pekiunde ntau seʼe, pai tau seʼe woʼu mampetikodimo waʼa ntau i mPue Anu Makuasa. 11I Pue da mampakaeka tau seʼe. Sira da mangagero waʼa lamoa ri wawo lino. Nepa mpengaya-ngaya banca da manyomba ri Pue, sambaʼa-sambaʼa seʼe ri tananya ngkalionya.
12 #
Yes. 18:1-7
Ewanceʼe seʼe waʼa nto Sudani da ndahuku mate i mPue.
13 #
Yes. 10:5-34, 14:24-27, Nah. 1:1–3:19 Roo setu i Pue mampake kuasa-A mangagero Asuri. Kota Niniwe da ndapapewali tana soa pai pada bone anu mance-mancegi. 14Njairiamo da poyuku-yuku waʼa mpinatuwu pai waʼa mpengaya-ngaya pinatuwu anu masii. Waʼa ntonci poa da mosea ri waka ngkota setu pai da mekiu-kiu ungka ri tuke. Tonci paa-paa da mokao-kao ungka ri tungka mbombo. Kaju cemara anu ndapake ri pawangu kota setu da pura ndayali. 15Incetumo anu da tepewali ri kota anu madoro-doro setu pai anu mangaepe kadago ngkatuwunya ewa sambaʼa kota anu maʼai ngkabangkenya ri wawo lino. Ara maʼai ngkanjiinya daera setu, bareʼemo reʼe tau anu mampeari jamo waʼa mpinatuwu yopo anu mosea njairia! Pura-pura tau anu melempo ri kota setu da jingki pai da maeka rayanya.
Currently Selected:
SEPANYA 2: LAIPMF
Highlight
Share
Compare
Copy
Want to have your highlights saved across all your devices? Sign up or sign in
