SEPANYA 1
1
1 #
2 Raj. 22:1–23:30, 2 Taw. 34:1–35:27 I Sepanya inceʼemo ana i Kusi. Potutua anu mampomulika siʼa ane ndaimba waindeku inceʼemo: Kusi, Gedalia, Amasia pai Mokole Sikia. Seʼimo nuntu i mPue ri Sepanya sindara i Mokole Yosia ana i Amoni moparenta ri Yahuda.
Eo mpobotusi i mPue
1:2-18
2Ndatoʼo i mPue, “Yaku da mangaʼopisaka mpengaya-ngaya anu ri lino: 3pura-pura tolino pai pinatuwu, tesua tonci pai bau. Tau majaʼa da lebatusaka. Pura-pura tolino da kugero, bereʼe mau sambaʼa tau anu da kupatuwu. Yaku Pue anu mantoʼomo seʼi.
4Yaku da mangahuku bangani Yerusale pai samalele Yahuda, waʼa yabi mpanyomba ri Baali da kupapaya ungka njairia. Waʼa ntadu mpanyomba anu mamporiokoi i Baali da ndakalinganimo mpaliu. 5Yaku mancaewe mayali-yali isema ntano mepone ri wawo ata da mampanyomba eo, wuya pai betuʼe. Da Kupapaya woʼu waʼa ntau anu mampanyomba Yaku pai montandokoro da todo ri Yaku, paikanya montandokoro woʼu mamposabi Lamoa Miliko. 6Yaku da mangagero tau seʼe anu bareʼe rata ri Yaku bara merapi popanini-Ku pai anu mantalikusimo Yaku pai bareʼemo napokono malulu Yaku.”
7Eo i mPue maniri-nirimo, riʼeo setu i Pue Ala da molengko; inceʼe painaka ndikarodomo ri suara-A. I Pue ntongo mompapatoka da mangasampa waʼa ntau ewa panyomba anu da ndapanyombaka, inceʼe painaka Sira mampeboomo waʼa iwali Yahuda. 8“Ri eo mponyamba setu,” ndatoʼo i mPue, “Yaku da mangahuku waʼa ntau bangke, waʼa ana tuama mokole, pai pura-pura tau anu mangalulu engko ngkatuwu ntau mencua. 9Yaku da mangahuku pura-pura tau anu manyomba ewa panyomba ntau anu bareʼe naincani Yaku, pai anu mangangka seʼi mepepate, mangabangani banua mpuenya pai aga-aga anu ndapamuru.”
10“Ri eo setu,” ewanceʼe pantoʼo i mPue, “da ndadonge potumangi ri baa-baa bau. Oni mpokukuou da ndadonge ungka ri polipu dawoʼu, pai oni ngkaruanya anu maʼai da moliwowo ungka ri waʼa mpongkuntana. 11Pokukuoumo, pai potumangimo ri padongemi inceʼe, ee anu reʼe ri kota tondo aranya, maka pura-pura topobalu-balu pai waʼa ntau anu mampapoana doi matemo ndapepate!
12Sindara setu Yaku da mangantima obori, pai da mamparesa kota Yerusale. Da Kuhuku waʼa ntaunya anu momamalinga setu pai anu mampolesemo katuwunya ngkalionya, pai anu manawa-nawa, ka-Yakunya Pue bareʼe da mampowia ewanceʼe. 13Aga-aga ntau seʼe da ndarampa pai waʼa banca ntau seʼe da ndalesaki. Tau seʼe da mangawangu banua, paikanya bareʼe da napeari. Tau seʼe da mampomuyani bonde anggoro paikanya bareʼe da nainu anggoronya.”
14Eo mpobotusi i mPue mosumo, io maniri-nirimo, pai lawi ratamo maliga-liga. Eo setu buke pai pari ndaya, painaka waʼa ncurodado anu maʼai kakalikinya ntano da monggua-ngguari nakeni ngkapuli nawa-nawanya. 15Eo setu eo ngkarau ndaya, kasiupi pai kasusa, eo ngkanawu pai kagero, eo ngkawani pai kawengi, eo anu bunto-bunto pai magawu-gawu. 16Rantani soyo reme ndadonge oni ncurupeta pai pekiu mombetoto ungka ri waʼa mpomakoje anu maungku waʼa ngkota anu ndabente pai ndateka waʼa menaranya.
17Ndatoʼo i mPue, “Yaku da mamparata kapari anu sondo ri waʼa ntolino, painaka tau seʼe da moama-ama ewa tau buta. Tau seʼe masalaamo ri Yaku, pai seʼi-seʼi daa ntau seʼe da tebubu ewa ue, pai watangkoro ntau seʼe da morempo-rempo oso ri wawo ntana.”
18Ri eo anu ndapokaeka setu, i Pue da mangantuju karau ndaya-A, waʼa mbuyawa pai salaka ntau seʼe bareʼe nakoto mancorepaka tau seʼe. Sambawo lino da magonu nakeni apu ngkarau ndaya-A. Tingkarasaka da ndayali pura-pura inosa ungka ri lino seʼi.
Currently Selected:
SEPANYA 1: LAIPMF
Highlight
Share
Compare
Copy
Want to have your highlights saved across all your devices? Sign up or sign in
