SAKARIA 1
1
I Pue mampeboo waʼa ntau-A da mewalili ri Sira
1:1-6
1 #
Es. 4:24–5:1, 6:14 Ri wuya kaʼuayu ri taʼu karadua poparenta i Datu Dariusi ri Parasia ndaparata i mPue nuntu seʼi ri yaku, Nabi Sakaria ana i Berekia makumpu i Ido. 2Ndasongka i mPue yaku da mangantoʼoka waʼa ntau-A ewaseʼi, “Ri tempo anu ndaliunakamo, Yaku, Pue Anu Makuasa, maʼai karau ndayaku riwaʼa ntau piamomi. 3Paikanya seʼi-seʼi kutoʼoka komi: Ndipewalilimo ri Yaku, maka Yaku woʼu da mewalili ri komi. 4Neʼe ewa poʼengko waʼa ntau piamomi. I pua waʼa nabi mamparata nuntu-Ku ri tau seʼe da naka tau seʼe neʼemo mowia anu majaʼa pai salaa. Paikanya bareʼe naaya ntau seʼe pai bareʼe napokono ntau seʼe mepoʼinaya ri Yaku. 5Mbeʼimo waʼa ntau piamomi pai waʼa nabi setu seʼi-seʼi? Tau seʼe bareʼemo reʼe. 6Mampoliu waʼa nabi watua-Ku setu, kuparata waʼa ncongka pai waʼa mpatiendo-Ku ri waʼa ntau piamomi. Paikanya bareʼe napedongeka ntau seʼe, inceʼe painaka sangaya-ngaya nakoyo ntau seʼe silinya. Nepa moncosoi tau seʼe pai mangaʼaku muni ka-Yakunya Pue Anu Makuasa, mangahukumo tau seʼe silulu pai kasala ntau seʼe, pai singkono pai Kupampakanoto.”
Bara tesangkuja nyara anu nakita nabi ri pepatongawa
1:7-17
7Ri ruampuyu aopo eo mbuya Sebati bara wuya kasampuyu pai sambaʼa, ri taʼu karadua poparenta i Datu Dariusi, ndaparata i mPue nuntu-A ri yaku. Mampojaya sangaya pepatongawa ri ntongo mbengi, 8#Pepat. 6:2, 4 kukita malaʼeka i mPue mampelamba sambaʼa nyara mawaa. Meʼonto sira ri sambaʼa rato ri oyo waʼa mpuʼu ngkaju mire. Ndapotataliku, njau bara tesangkuja nyara ntaninya mekakore, reʼe anu mawaa, anu abu-abu pai anu mabuya. 9Meoasi yaku ri sira kutoʼo, “Pue, nunjaa posokinya pura-pura nyara seʼi?”
Mesono sira ndatoʼo, “Nepa kutujuka siko posokinya. 10Tau seʼe ndapokau i mPue da mamparesa lino.”
11Pura-pura nyara setu mompetumbu ri malaʼeka setu natoʼo, “Kami maleleangimo sambawo lino, tongawa lino uono pai lindo.”
12Nepa mompau malaʼeka setu natoʼo, “I Pue Anu Makuasa, pitu mpuyu ntaʼu kasaenya Komi mangkarausi Yerusale pai waʼa ngkota Yahuda. Sangkuja ngkasae woʼu da karau ndaya-Mi pai da ndipangkitanaka salaa ntau seʼe?”
13Ndasono i mPue pompau malaʼeka setu pai waʼa mpau anu mampalindo, 14nepa malaʼeka setu mampokau yaku mamparata nunjaa anu ndatoʼo i mPue Anu Makuasa, “Maʼai kapuru ndaya-Ku pai kapari ndaya-Ku kono kota Yerusale, kota-Ku anu magali. 15Paikanya maʼai karau ndayaku ri waʼa ngkota anu maepe lindo pai uono. Maka ri tempo Yaku maomo karau ndayaku ri waʼa ntauku, waʼa banca setu woʼu marangani kapari waʼa ntau-Ku. 16Seʼi-seʼi Yaku mewalili ri Yerusale da mampatongawaka tau seʼe kapuru ndayaku ri kota setu. Banua-Ku da ndawali wangu pai kota Yerusale da ndabaresi muni.”
17Malaʼeka setu mampokau woʼu yaku da mamparata nuntu anu ewaseʼi katetoʼonya, “I Pue Anu Makuasa mojanji kono waʼa ngkotanya da madolidi muni, pai sangkanipa Sira da mampelae Yerusale pai mangaʼaku ka-Siranya tumpunya.”
Waʼa ntondu anu nakita ri pepatongawa
1:18-21
18Ri pepatongawa anu ntaninya, kukita tondu japi aopo. 19Meoasi yaku ri malaʼeka anu mompau pai yaku setu, kutoʼo, “Nunjaa posokinya waʼa ntondu setu?”
Mesono sira natoʼo, “Waʼa ntondu sinjoʼu inceʼemo lambangi waʼa ngkamokole anu maroso anu mawuraga waʼa ntau bangani Yahuda, Isaraeli pai Yerusale.”
20Nepa ndapapakitaka i mPue ri yaku, aopo tukabesi anu mangkeni palu. 21Meoasi yaku kutoʼo, “Nunjaa tinako ndaya ngkamaʼi ntau seʼe?”
Masono sira ndatoʼo, “Da mampakaeka pai da mangadungka waʼa banca anu mangageromo Yahuda pai mawuragamo waʼa ntaunya.”
Currently Selected:
SAKARIA 1: LAIPMF
Highlight
Share
Compare
Copy
Want to have your highlights saved across all your devices? Sign up or sign in
