NAHU 3
3
1Marugimo kota seʼi anu buke mbamba pai pepepate;
buke pai aga-aga anu ndarampa bara ndapamuru.
2Pedongekamo pebote-bote inabasi pai ponduruku bola roda,
porutu mpolumba nyara pai porungka ngkareta.
3Makaliki popaungku ncurodado anu monyara,
penai anu kampiri-mpiri pai tawala anu mengkido-ngkido.
Tau anu mate bareʼe ndaincani imbanya,
morempo-rempo wata ngkoro ntau seʼe,
mampatorarambe waʼa ntau.
4Niniwe toposalara setu ntongo ndahuku.
Kadolidinya sintinaja kojo ndapotontoa mangkita.
Maria banca anu roo nabalimata,
pai nakanarasi pai pekanarasinya.
5Ndatoʼo i mPue Anu Makuasa,
“Ee Niniwe, siko da kujeani!
Rengkomu da kulambesi ri suara waʼa banca,
da naka nakita ntau anu nupomaea.
6Da kupowia siko ewa anu ndapokarika,
siko da kutasoka taʼi;
siko da kupapewali anu nalimbu-limbu ntau.
7Anu mangangkita siko
da metilawangi nepa natoʼo,
‘Niniwe mewalimo awu!
Isema anu da mamposimasusa siʼa?
Bereʼe anu da mawai palindo ri siʼa.’ ”
8Ee Niniwe, ara siko meruu ngkadagomu pai Tebe, indo ngkota Masiri? Tebe seʼe ri wingke ngkoronya kareʼenya, inceʼe anu mantatondoi ewa bente. Monco, Koro Nili inceʼemo bente mpoʼiwalinya. 9Tebe anu mamparenta Sudani pai Masiri, pai kakuasanya bereʼe ungkanya; Libia pai Puti inceʼe samporambanganya. 10Paikanya mau ewanceʼe, bangani ngkota Tebe ndatawani nepa ndakeni ri kareʼe mpantawani. Ri mbeʼi-mbeʼi porampu njaya njairia ndapawombo waʼa ananya rantani mate. Waʼa ntau bangkenya ndapungu pai rante nepa ndapotila-tilaka ri waʼa ntau anu mantawani.
11Ee Niniwe, siko neʼe da malimpu ua mayangu. Siko seʼe da mompari-mpari da naka lapa ungka ri pale waʼa iwalimu. 12Waʼa bentemu da ewa puʼu ngkaju ara anu montiwuli wuanya anu matasa. Ane ndatawembe, da marudu wuanya ri raya nganga ntau anu da rayanya mangkoni. 13Waʼa ncurodadomu da malente ewa weʼa, pai tanamu beliu-liu reʼe rosonya da mangaewa iwali. Apu da mangaʼombasi waʼa ncingkuagi baa-baamu. 14Tombumo ue da naka reʼe nuinu ri sindara siko nalimbu ncape iwali, pai pakarosomo waʼa bentemu! Da nulandamo loge mampowia waʼa batutela, pai patokamo waʼa bataʼaninya! 15Nunjaa ntano anu nuwianaka, bareʼe da reʼe yowenya, maka siko manoto kojo da pura wara bara mate ri pombetoto. Siko da paya ngkabongo da ewa bangani njamaa anu nakoni ntupako.
Siko mojenemo ewa tupako. 16Waʼa ntopobalu-balumu meruu imbanya pai betuʼe ri yangi! Paikanya seʼi-seʼi tau seʼe payamo, ewa tupako anu mabini paninya nepa moyoko paya. 17Waʼa ntau bangke pai tau ndalantimu ewa tupako santibura anu metatondo ri waʼa ntembo ri tempo ngkaranindinya. Paikanya butu mesindimo reme, ganggara poyoko ntau seʼe paya, bereʼe mau sambaʼa tau anu maincani ri mbeʼi palai ntau seʼe.
18Ee datu ntana Asuri! Waʼa petoro matemo, pai waʼa bupati tekayoremo rantani masae-sae. Palilimu tewuragano ri buyu mongkodo pai bereʼe mau sambaʼa tau anu da mangkeni mpewalili tau seʼe. 19Kawelamu bareʼe ndakoto mampakuli, pai waʼa mbelamu bareʼe ndakoto mampakaʼosa. Pura-pura tau anu mangadonge bambari ngkageromu da montopo pale nakeni ngkawongko ndayanya. Maka pura-pura tau maepemo pari ua kajaʼamu anu bereʼe ungkanya setu.
Currently Selected:
NAHU 3: LAIPMF
Highlight
Share
Compare
Copy
Want to have your highlights saved across all your devices? Sign up or sign in
