NAHU 2
2
Kasua Niniwe
2:1–3:19
1Ee Niniwe, pedongekamo!
Anu da mangagero siko ratamo!
Jagaimo waĘĽa bente mpoĘĽiwalimu!
Jagai jaya!
Pompatikali da moĘĽiwali.
(2Monco kojo, i Pue da mampapewalili peawa Isaraeli, da naka ewa iĘĽowi muni, ri kabareĘĽepanya napamurui waĘĽa iwalinya.)
3Kanta iwali mawaa taĘĽanya,
pai rengkonya ewa daa.
Iwali tikalimo da mancamburaragi
Ewa potaĘĽa apu, parewa ngkaretanya kampiri-mpiri.
Pura-pura nyaranya mewunce-wunce.
4Ri jaya, waĘĽa ngkareta setu mosipuari palainya.
Ri tana lapa tau seĘĽe mosilumba,
ndakita ewa obori anu mareka-reka
magasi polumbanya ewa kila moginunggi.
5WaĘĽa ntadulako ncurodado ndapeboo ri suara;
tau seĘĽe patorarambe ri tempo mponcamburaragi.
Ganggara tau seĘĽe madadu tembo ngkota,
maliga-liga napatunda parewa mporuasi bente.
6Pura-pura dampo mpesua ue puramo ndaloka,
painaka guagamo samalele langkanae!
7I Mokole weĘĽa ndaleĘĽo mancoko,
waĘĽa ntoporiokonya mongguari mokukuou,
tau seĘĽe meĘĽode-ode ewa tonci banggebodo,
pai montopo-ntopo dadanya ua kasusa ndayanya.
8WaĘĽa nto Niniwe jianja molonco,
waĘĽa ue anu mabuntasi ua wusunya marua.
Reʼe oni mpeboo mantoʼo, “Peʼonto, peʼonto!”
paikanya bereĘĽe anu mampokono mewalili.
9Ndipamurumo waĘĽa mbuyawa pai salaka!
Maka aga-aga anu ri raya ngkota seĘĽi maria gaga!
10Niniwe mageromo, njiimo pai bemo tuwu pinamuya.
Teloo raya ua kaeka ndaya.
Malentemo wuku pai kandende-ndende.
Mesiramo lio ntau pura-pura.
11Ri mbeĘĽimo kota setu seĘĽi-seĘĽi?
Kota anu ewa wayau ngkanjau ncinga?
KareĘĽe pampakoni waĘĽa anak ncinga,
da kanjoĘĽu ncinga laki pai singa tina,
kareĘĽe ananya anu madago?
12IĘĽowi njairia pancoko ncinga sinokonya,
napangasempati tila anu tina pai ananya.
SiĘĽa mangabuketi wayaunya
pai waĘĽa lopa ncanga ncinokonya.
13“Yaku seʼi iwalimu,” pantoʼo i mPue Anu Makuasa. “Waʼa ngkaretamu da kupanowa rantani pura. Surodadomu da mate ri pombetoto, pai Yaku da mangantima mpengaya-ngaya anu roo nupamuru ungka ri tau ntaninya. Perapi waʼa ntau anu nupokau bareʼemo da ndadonge.”
Currently Selected:
NAHU 2: LAIPMF
Highlight
Share
Compare
Copy
Want to have your highlights saved across all your devices? Sign up or sign in
