HABAKU 1
1
Patada ri Habaku
1:1
1Ewaseʼi nuntu anu ndapatongawa i mPue ri Nabi Habaku.
I Habaku meʼode ua kabareʼenya reʼe kayoa
1:2-4
2Boo Pue, sangkuja ngkasae woʼu yaku sangaya-ngaya da meboo merapi pompelae? Ipia da ndipampedongeka pai mancorepaka kami ungka ri pamparini? 3Wenu painaka ndipapaliuka yaku mangkita waʼa jaʼa anu ewancetu karianya? Ara Komi ndikoto mangkita waʼa mpelewa anu ewancetu karianya? Ri mbeʼi-mbeʼi reʼe kagero pai pejeani, pombeluku pai posisala. 4Padika ndapesaru-saru pai yoa bereʼe ndapampatoa. Tau anu majaʼa inceʼe anu menangi ri tau anu mayoa, pai yoa ndatoro baliko.
Sononya ungka ri Pue
1:5-11
5 #
Pwn. 13:41
Ungka lairia ndatoʼo i mPue ri waʼa ntau-A, “Patomatamo waʼa banca anu sampotenginya, nepa da jingki pai tesaluntengku komi. Maka ri tempo tuwupa komi da reʼe sangaya anu kuwianaka, anu bareʼe da ndipoaya monco ane podo ndalaolitaka komi. 6#2 Raj. 24:2 Banca Babeli anu masigari pai masii setu da kupapewali banca anu makuasa. Tau seʼe mobarisi mesuwu ungka ri tananya nepa maliliwungi sambawo lino da mampapeʼuru waʼa banca ntaninya. 7Ri mbeʼi-mbeʼi tau seʼe mangaekasi tau; ri pobangke-bangke ntau seʼe bareʼe naaya pura-pura padika, banya mantoʼo anu silulu pai pepokono ntau seʼe.
8Nyaranya meruu kagasinya pai harimau bulatu, pai meruu ngkagasi pai serigala anu ntongo ngkaoro. Surodado anu monyara rata ungka ri waʼa ntana anu lawa; karata ntau seʼe ewa kongka mancangke sinokonya.
9Surodadonya mopaungku mawianaka pejeani, pura-pura tau kandende-ndende mangkita karata ntau seʼe. Tau anu natawani ntau seʼe bareʼe ndaincani imbanya. 10Tau seʼe mampasinggiri waʼa mokole pai mampopogeleka waʼa mpegawai anu ndateka lantinya. Napesaru-saru ntau seʼe waʼa bente, pai nabuyunakaka tana nepa nasuaki bente setu. 11Ewa pewui ngoyu palai waʼa ntau anu mampomaa-maaka rosonya ngkalionya setu.”
I Habaku meʼode woʼu ri Pue
1:12-17
12 Pue, ungka ipiamo komi inceʼe Pue Ala. Komi Pue Ala pueku anu magali pai bereʼe kapusanya. Pue, Pue Ala pueku pai petatondoku, banca Babeli ndipilisi pai ndipapewali makaliki da mangahuku kami. 13Paikanya ewambeʼi da karodo ndayami mangkita waʼa ntau majaʼa anu masigari setu? Ara banya maʼai ngkagali da mampeole kajaʼa? Ara banya da mabungkalesi sulemi mangkita kabareʼenya mayoa? Mewali, wenu komi jamonjii sindara tau meaya nalesaki ntau baleparu.
14Wenu painaka tolino ndipasiwia pai bau ri tasi, pai ewa garupu ntana anu bereʼe topombawanakanya? 15Banca Babeli mancoko waʼa ntau pai peka, waʼa ntau setu napasiwia pai bau. Waʼa ntau setu ndanoʼo ri raya waʼa jala, pai banca Babeli mosusa mampokawongko pandata ntau seʼe. 16Ungka lairia jala setu napanyomba ntau ntau seʼe, napanyombaka ntau seʼe panyomba, maka pai jala setu tau seʼe maratamo kegana-gana ri katuwunya.
17Ara da nawutu mpaliu ntau seʼe penainya pai mampepate waʼa banca, bereʼe puru ndayanya?
Currently Selected:
HABAKU 1: LAIPMF
Highlight
Share
Compare
Copy
Want to have your highlights saved across all your devices? Sign up or sign in
