MARAKUSI 9

1Ndatoʼo i Yesu, “Da ndipaincani, ri oyomi seʼi reʼe anu bareʼepa da mate ri kabareʼepanya nakita i Pue Ala moparenta ri kuasa-A!”

I Yesu ndapapeawa

9:2-13

(Mat. 17:1-13, Luk. 9:28-36)

2 # 2 Ptr. 1:17-18 Aono ndeme ungka njairia, ndapoyunu i Yesu i Peturu, i Yakobu pai kasangkomponya i Yohane, mompatani ri buyu anu ndateka. Nakita ntau seʼe taʼa i Yesu tebalisaka. 3Rengko-A mabuya pai makilayamo. Bereʼe sambaʼa topobusu ri lino seʼi anu mangkoto da mampakabuya rengko anu ewanceʼe. 4Nakita anaguru tatogo setu i Yesu ntongo mompasimbaju pai Elia pai Musa. 5Natoʼo i mPeturu ri Yesu, “Guru, ara maʼai ngkadagosa ane tamaroo-roomo ireʼi. Moruana kawangunaka tatogo kema, sambaʼa da galami, sambaʼa da gala i Musa pai sambaʼa woʼu da gala i Elia.” 6Kamonconya bareʼe naineani i mPeturu nunjaa anu sangaya-ngaya da natoʼo, maka siʼa pai yununya radua ntongo ri raya ngkaekandaya anu maʼai.

7 # Mat. 3:17, Mrk. 1:11, Luk. 3:22 Roo setu, maʼi limu mangkulamuti tau seʼe, nepa nadonge oninganga ungka ri limu setu mantoʼo, “Seʼimo Anaku Anu Kupotowe, Ndipedongekamo Siʼa!” 8Ganggara napeole ntau seʼe sape-sape, bemoreʼe tau ntaninya nakita njairia sangkani pai tau seʼe, jamo i Yesu. 9Sindara mpobalungke ntau seʼe ungka ri wawo buyu setu, ndapatiendo i Yesu tau seʼe ndatoʼo, “Neʼe boi ndipau-pauka tau wuwunya anu ndikita ngena, ri kabareʼepanya i Ana Manusia ndapapembangu ungka ri kapate.”

10Naparindaya kojo ntau seʼe patiendo setu, paikanya napombepeoasika ntau seʼe, nunjaa tinako ndaya i Yesu ri pau-A anu mantoʼo, “Tuwu muni ungka ri kapate.” 11#Mal. 4:5, Mat. 11:14 Meoasi tau seʼe ri Sira, natoʼo, “Makuja waʼa guru agama mantoʼo i Elia sangaya-ngaya da jela riunya?”

12Mesono i Yesu ndatoʼo, “I Elia lawi da rata riunya da mampatoka pura-puranya. Paikanya ewambeʼimo kono i Ana Manusia? Nunjaa puʼunya painaka ri raya sura Magali ndaʼuki pau anu mantoʼo, Siʼa da mantodosaka kapari pai da napetikodi ntau? 13Paikanya Kutoʼoka komi i Elia lawi ratamo, paikanya siʼa napowia ntau ri gori mpepokononya, inceʼe singkono pai anu ndaʼuki ri Sura Magali kono siʼa.”

I Yesu mampakaʼosa ananggodi anu napesuaki inosa majaʼa

19:14-29

(Mat. 17:14-21, Luk. 9:37-43a)

14Karata i Yesu pai anaguru-A tatogo ri waʼa anaguru-A anu ntaninya, nakita ntau seʼe sondo tau tepasambaka njairia. Bara te sangkuja guru agama ntongo mombebali-bali pai waʼa anaguru i Yesu. 15Butu nakita waʼa ntau setu i Yesu, jingki raya ntau seʼe, nepa molonco njoʼu napago Sira. 16Meoasi i Yesu ri waʼa anaguru-A ndatoʼo, “Nunjaa anu ndipombebali pai waʼa guru agama setu?”

17Mesono tau sambaʼa ungka ri oyo ntau sondo setu, natoʼo, “Guru, yaku mangkeni anaku ri Komi, Siʼa bobo ua napesuaki inosa majaʼa. 18Ane tempo mperatanya, anaku setu nadungkalaka ri tana, nganganya mowura-wura, kakeʼi-keʼi ngisinya, koronya torokogangi. Roo kuperapi ri anaguru-Mi da mairi inosa majaʼa setu, paikanya bareʼe nakoto ntau seʼe mampowia.”

19Ndatoʼo i Yesu ri tau seʼe, “Maʼai gagamo komi seʼi! Monco kojo komi tau anu bareʼe meaya. Sangkuja ngkasae woʼu da karoo-rooku pai komi pai da mantuju pande ndaya-Ku ri komi? Keni maʼi ananggodi setu!” 20Nakeni ntau seʼe ananggodi setu ri Yesu.

Butu nakita inosa majaʼa setu i Yesu, nadungkalakamo ananggodi setu torokogangimo koronya, mowura-wuramo nganganya. 21Meoasi i Yesu ri papanya, “Sangkuja ngkasaemo kaʼewainceʼinya?”

Mesono papanya natoʼo, “Jaʼungka ri kakodi-kodinya!” 22“Maria ngkani anaku seʼi da napepate inosa majaʼa, nadungka ri apu, ri ue. Paikanya ane Komi ndikoto da mantulungi, da ndipokapurumo kami, pai nditulungi kami!”

23Mesono i Yesu ndatoʼo, “Ewambeʼi pantoʼomu? Ane Kukoto? Pura-pura Kukoto podoia tau meaya!”

24Liu-liu meboomo papa ananggodi setu natoʼo, “Pue, kuaya, paikanya peaya ndayaku makura. Nditulungi yaku ndipakagana peaya ndayaku!”

25Butu ndakita i Yesu mariamo tau rata malimbu Sira, ndapokaumo inosa majaʼa setu mesuwu, ndatoʼo, “Inosa bobo pai bongo Kupokau siko pesuwu ungka ri ananggodi seʼi, pai neʼe kojo boi wali mpesua!”

26Mekiu inosa majaʼa setu, napakatorokogangi koro ananggodi setu nepa napalaika. Nakita ntau seʼe ananggodi setu ewa tau anu matemo, painaka pura-pura tau mantoʼo, “Matemo siʼa!” 27Paikanya ndakekeni i Yesu palenya nepa ndawangu siʼa. Membangumo ananggodi setu.

28Ri kajelamo i Yesu ri banua, natimosuki waʼa anaguru-A Sira, mampeoasi, “Nunjaa puʼunya painaka kami bareʼe kakoto mairi inosa majaʼa setu?”

29Mesono i Yesu ndatoʼo, “I Majaʼa anu sangaya setu bareʼe ndakoto mairi pai anu ntaninya, podo pai pekakai.”

I Yesu mampau woʼu kono kapate-A

9:30-32

(Mat. 17:22-23, Luk. 9:43b-45)

30Ungka njairia malai i Yesu pai waʼa anaguru-A, mampaliu pelinjaa melempo tana Galilea. Bareʼe ndapokono i Yesu da naincani ntau ri mbeʼi kareʼe-A. 31Maka Sira ntongo mampaguru waʼa anaguru-A. Ewanceʼi pantoʼo Yesu, “I Ana Manusia da ndapepombaika ri kuasa ntolino, Siʼa da ndapepate, paikanya ri katatogo ndemenya Siʼa da membangu!”

32Bareʼe narata ndaya waʼa anaguru-A nunjaa posokinya anu ndapaguruka i Yesu tau seʼe. Paikanya maeka raya ntau seʼe da mampeoasi ri Sira.

Isema anu bangke mpodago?

9:33-37

(Mat. 18:1-5, Luk. 9:46-48)

33Ratamo tau seʼe ri Kapenau. Karata ntau seʼe ri banua, meoasi i Yesu ri waʼa anaguru-A, “Nunjaa anu ndipombebali-balika ri jaya ngena?”

34 # Luk. 22:24 Bereʼe anu mesono, maka ri jaya ngena tau seʼe mombebali-bali kono isema anu meruu ngkabangkenya. 35#Mat. 20:26-27, 23:11, Mrk. 10:43-44, Luk. 22:26 Motunda i Yesu nepa ndapeboo anaguru-A ndatoʼoka tau seʼe, “Tau anu da rayanya mewali lamoro kaʼisa, sangaya-ngaya sia da mewali lamoro kapusanya, pai da mamporiokoi pura-pura tau.” 36Roo setu ndatima i Yesu ananggodi anu kodi-kodipa sambaʼa, ndapapekakore ri suara ntau seʼe pura-pura, ndasokowaka i Yesu ananggodi setu nepa ndatoʼoka anaguru-A, 37#Mat. 10:40, Luk. 10:16, Yoh. 13:20 “Tau anu mancabe ananggodi anu ewanceʼe ua Yaku, posokinya mancabe Yaku. Pai tau anu mancabe Yaku, banya podo Yaku anu nasabu, paikanya mancabe woʼu Sira anu mampokau Yaku.”

Isema anu bareʼe maewa kita inceʼe sambira pai kita

9:38-41

(Luk. 9:49-50)

38Natoʼo i Yohane ri Yesu, “Guru reʼe kakita tau mairi i majaʼa ri toʼo-Mi, kapetangani tau setu maka siʼa banya yunuta.”

39Paikanya ndatoʼo i Yesu, “Neʼe ndipetangani siʼa, maka bedareʼe tau da mampowia tanda ngkuasa ri toʼo-Ku, anu da mampakajaʼa toʼoku. 40#Mat. 12:30, Luk. 11:23 Maka tau anu bareʼe maewa kita, posokinya sambira pai kita. 41#Mat. 10:42 Ndiendo-endoka! Tau anu mampapanginu komi ua kakominya anaguru i Mokole Tadungkadago, siʼa sangaya-ngaya da natarima saronya.”

Waʼa anu mampapopuʼu tau mampowia salaa

9:42-50

(Mat. 18:6-9, Luk. 17:1-2)

42“Bara isema anu mampapopuʼu sambaʼa ri oyo waʼa anu kodi-kodi seʼi painaka meuranaka ungka ri peaya ndayanya, moruana tau setu da ndaloeka watu mpangasa ri leʼenya nepa ndanawu ri tasi. 43#Mat. 5:30 Ane palemu puʼunya siko masala, tandomo palemu setu! Moruana siko tuwu pai Pue Ala mau podo sambali palemu painaka siko mopale mpotimali paikanya mesua ri naraka, inceʼemo kareʼe apu anu bareʼe mate-mate. [44Njairia kareʼe apu anu bareʼe mate-mate pai ule anu bareʼe mate-mate.] 45Pai ane witimu puʼunya siko masala tompomo witi setu. Moruana siko tuwu pai Pue Ala mau podo sambali witimu, painaka siko mowiti mpotimali paikanya da ndatendeka ri naraka. [46Njairia kareʼe apu pai ule anu bareʼe da mate-mate.] 47#Mat. 5:29 Ane matamu puʼunya siko masala, juʼimo matamu setu. Moruana siko da mesua ri Lino Dawoʼu i mPue Ala mau podo sambali matamu, painaka siko momata ruambali paikanya da ndatendeka ri naraka. 48#Yes. 66:24 Njairia kareʼe apu pai ule anu bedareʼe kamatenya.

49Sambaʼa-sambaʼa tau da ndapakagali ri apu, ewa panyomba da ndapakagalika bure. 50#Mat. 5:13, Luk. 14:34-35 Bure setu madago, paikanya ane bareʼemo masi, ara da ndakotopa mawali mpakamasi? Mewali, komi da mewali ewa bure ndikatuwumo sangkani-ngkani ri posintuwu.”

Currently Selected:

MARAKUSI 9: LAIPMF

Highlight

Copy