MARAKUSI 10
10
Totoraka i Yesu kono pogaʼa
10:1-12
(Mat. 19:1-12, Luk. 16:18)
1Ungka lairia malai i Yesu, njoʼu ri tana Yudea pai ri tana anu ri sambote ngKoro Yarade. Jela woʼu waʼa ntau sondo mompasambaka malimbu-limbu Sira. Ndapaguru i Yesu tau seʼe ewa biasa.
2Ratamo woʼu bara tesangkuja to Parisi da mantolia i Yesu. Meoasi tau seʼe natoʼo, “Malulu songka agamata ara maya tau da mampogaʼaka rongonya?”
3Mesono i Yesu ndatoʼo, “Ewambeʼi songka anu nawaika komi i Musa?”
4 #
Paw. 24:1-4, Mat. 5:31 Mesono tau seʼe natoʼo, “Nawai i Musa tau da mampogaʼaka rongonya, podoia naʼuki riunya sura mpogaʼa.”
5Ndatoʼo i Yesu ri tau seʼe, “Songka setu naʼuki i Musa, maka komi waʼa ntau anu mapeni raya. 6#Pal. 1:27, 5:2 Paikanya ri pontepuʼunya, ri tempo pampapewali i mPue Ala tolino ndatoʼo, ‘i Pue Ala mampapewali tau seʼe tuama pai weʼa. 7#Pal. 2:24 Inceʼe puʼunya tuama da mampalaika inenya pai papanya pai da tuwu sangkani-ngkani pai rongonya, 8ua ewanceʼe tau radua mewali sambaʼa.’ Mewali tau seʼe banyamo radua paikanya sambaʼa-mbaʼamo. 9Inceʼe puʼunya nunjaa anu roomo ndapasambaʼa-mbaʼa i mPue Ala bareʼe maya nagaʼati ntolino.”
10Butu mesuamo tau seʼe ri raya banua, napeoasi woʼu waʼa anaguru-A ri Yesu kakononya inceʼe. 11#Mat. 5:32, 1 Kor. 7:10-11 Ndatoʼo i Yesu ri tau seʼe, “Isema anu mampogaʼaka rongonya pai mamporongo woʼu weʼa ntaninya tau setu mosalara ri rongonya anu kaʼisa. 12Ewanceʼe woʼu weʼa anu napogaʼaka langkainya setu, ane molangkai woʼu siʼa pai tuama ntaninya siʼa seʼe mosalara.”
I Yesu madonco waʼa ananggodi
10:13-16
(Mat. 19:13-15, Luk. 18:15-17)
13Reʼe waʼa ntau jela ri Yesu mangkeni waʼa ananggodi danaka ndajama pai ndadonco tau seʼe. Paikanya napokarau waʼa anaguru-A waʼa ntau setu. 14Majaʼa raya i Yesu mangkita anu mewali setu pai ndatoʼo ri waʼa anaguru-A, “Ndipapaliuka waʼa ananggodi setu maʼi ri Yaku! Neʼe ndipetangani tau seʼe, maka waʼa ntau ewanceʼemo anu da mewali tau i mPue Ala. 15#Mat. 18:3 Neʼe ndikalingani inceʼi! Tau anu bareʼe mancuara i Pue Ala ewa sambaʼa ananggodi bareʼe da mewali tau i mPue Ala.” 16Butu roo mompau ewanceʼe, ndasokowaka i Yesu waʼa ananggodi setu nepa ndadika pale-A ri wawo ntanoananya sambaʼa pai sambaʼa ndadonco tau seʼe.
Tau koreʼe
10:17-31
(Mat. 19:16-30, Luk. 18:18-30)
17Sindara i Yesu mampaliu woʼu pelinjaa, ratamo sambaʼa tau molonco-lonco madadu i Yesu. Mombukotu tau setu ri suara i Yesu, nepa meoasi natoʼo, “Guru anu madago, nunjaa da kupowia da kuparata katuwu anu bereʼe da reʼe kapusanya?”
18Meoasi i Yesu ndatoʼo, “Ara wenu pai nupantoʼo Yaku madago? Bereʼe anu madago waʼanyamo i Pue Ala ngkalio-A. 19#Pa. 20:12-16, Paw. 5:16-20 Nuincanimo waʼa ncongka i mPue Ala, ‘Neʼe mepepate, neʼe mosalara, neʼe melima, neʼe nusabi mbamba, neʼe metengosi, tubunaka papamu pai inemu.’ ”
20Natoʼo ntau setu, “Guru, pura-pura songka setu kululumo ungka ri kaʼananggodiku.”
21Mapuru raya i Yesu ri tau setu, ndapatomata mpodago nepa ndatoʼoka, “Jamo sangaya anu makura ri siko. Palaimo pobalu aga-agamu pura-pura olinya tilakamo waʼa ntau kaasi-asi, nepa da nurata aga-agamu ri suruga. Roo setu, maʼimo malulu Yaku.” 22Madonge pompau i Yesu ewanceʼe, teloo raya ntau setu manawa-nawa, malai siʼa ungka njairia masusa rayanya maka siʼa koreʼe kojo.
23Roo setu ndapapowawo i Yesu waʼa anaguru-A nepa ndatoʼoka tau seʼe, “Mapari kojo tau koreʼe da mewali tau i mPue Ala!”
24Jingki raya waʼa anagurua madonge pompau i Yesu setu. Paikanya ndatoʼo woʼu i Yesu, “Ee waʼa ana-Ku, mapari kojo tau da mewali tau i mPue Ala! 25Saru-sarupa sambaʼa onta mesua ri talinga njaru, painaka sambaʼa tau koreʼe mesua ri Lino Dawoʼu i mPue Ala!”
26Pau-A setu mampakajingki raya waʼa anaguru-A, painaka napombepeoasika, “Ane ewanceʼe isema anu mangkoto da tesorepaka?”
27Ndapapowawo i Yesu tau seʼe nepa ndasono, “Lawinya tolino reʼe anu bareʼe nakoto, paikanya i Pue Ala bereʼe anu bareʼe ndakoto.”
28Nepa natoʼo i mPeturu, “Ndipeolemo, kapalaikamo pura-puranya ua da malulu Komi.”
29Ndatoʼo i Yesu, “Monco Kutoʼoka komi, tau anu mampalaikamo somborinya, bara kasangkomponya tuama pai anu weʼa, bara inenya pai papanya, bara waʼa ananya, bara bondenya ua malulu Yaku pai ua Nuntu ngKatuwu ungka ri Pue Ala; 30tau setu da mantarima meruu ngkarianya pai anu napotumpu wawaseʼi. Siʼa da mangarata saatu ngkani peruu ngkarianya banuanya, kasangkomponya tuama pai weʼa, inenya, waʼa ananya, bondenya-ewanceʼe seʼe woʼu waʼa ngkapari. Pai ri tempo anu nepa da rata tau setu da mantarima katuwu anu bareʼe da reʼe kapusanya. 31#Mat. 20:16, Luk. 13:30 Paikanya maria tau anu tesindiu wawaseʼi da mewali anu teripuri, pai maria tau anu teripuri wawaseʼi da mewali anu tesindiu.”
Katatogo ngkaninya i Yesu mampau kono kapate-A
10:32-34
(Mat. 20:17-19, Luk. 18:31-34)
32Ntongo mpelinja i Yesu pai waʼa anaguru-A ndeku ri Yerusale. I Yesu ri suara. Ipu raya waʼa anaguru-A pura-pura. Pai waʼa ntau anu mantonda tau seʼe woʼu maeka rayanya. Ndapeboo ntepatani waʼa anaguru-A, nepa ndatoʼoka tau seʼe nunjaa anu da mewali ri woto ngkoro-A. 33Ndatoʼo, “Ndipedongeka, kita wawaseʼi ndongo mpelinja da ndeku ri Yerusale. Ndatiria i Ana Manusia da ndapepombaika ri waʼa ntadulako ntadu mpanyomba pai guru agama. Siʼa da ndapepate, pai Siʼa da ndapepombaika ri pale waʼa ntau anu banya to Yahudi. 34Da napasinggiri ntau seʼe Siʼa, da natupesi Siʼa, da najeani Siʼa pai mampaku Siʼa ri kaju ndapanggo. Paikanya ri katatogo ndemenya Siʼa da membangu.”
Perapi i Yakobu pai i Yohane
10:35-45
(Mat. 20:20-28)
35Jelamo i Yakobu pai i Yohane ana i Ncebedeu ri Yesu, natoʼoka Sira, “Guru, reʼe sangaya anu da kaperapi da Ndiwaika kami.”
36Meoasi i Yesu ndatoʼo, “Nunjaa anu da rayami da Kupowiaka komi?”
37Mesono tau seʼe, “Da raya mami motunda ri mokana pai kaii-Mi, ane motundamo Komi ri gadera mpoparenta-Mi anu meawa.”
38 #
Luk. 12:50
Ndatoʼo i Yesu ri tau seʼe, “Bareʼe ndiincani nunjaa anu ndiperapi. Ara da ndikoto mampanginu tabo mpanginu ngkapari anu da Kuinu pai mesua ri raya ngapa ngkapari anu da Kusuaki?”
39Mesono tau seʼe, “Kakoto!”
Ndatoʼo woʼu i Yesu ri tau seʼe, “Lawi komi seʼe da ndipanginu tabo mpanginu pejeani anu da Kuinu, pai da mesua woʼu ri raya ngapa ngkapari anu da Kusuaki. 40Paikanya kaʼisemanya anu da motunda ri tondo mokana pai mokaii-Ku inceʼe banya Yaku anu mampakanoto. I Pue Ala anu mampakanoto kaʼisemanya anu da motunda ri waʼa ngkareʼe setu.”
41Butu nadonge waʼa anaguru i Yesu anu sampuyu perapi setu, majaʼa raya ntau seʼe ri Yakobu pai i Yohane. 42#Luk. 22:25-26 Mewali ndapeboo i Yesu tau seʼe pura-pura nepa ndatoʼo, “Ndiincani waʼa nto poparenta anu bareʼe maincani i Pue Ala mamparini palilinya. Pai waʼa ntau bangke anu makuasa mabaruku tau seʼe. 43#Mat. 23:11, Mrk. 9:35, Luk. 22:26 Paikanya komi bareʼe maya ewanceʼe! Motada pai nceʼe, tau anu da rayanya mewali tau bangke ri oyomi, sangaya-ngaya da mewali toporiokomi. 44Pai tau anu da rayanya mewali tadulako ri oyomi, sangaya-ngaya da mewali anamayunumi. 45Maka i Ana Manusia woʼu banya jela da naka ndaporiokoi. Paikanya jela mamporiokoi pai mampepombaika inosanya tila ngkatesorepaka sondo tau.”
I Yesu mampakaʼosa i Batimeu anu buta
10:46-52
(Mat. 20:29-34, Luk. 18:35-43)
46Ratamo tau seʼe ri Yeriko. Ri tempo i Yesu pai waʼa anaguru-A pai tau sondo malai ungka ri kota setu, reʼe sambaʼa tau buta motunda-tunda merapi-rapi ri wiwi njaya. Batimeu toʼonya, ana i Ntimeu. 47Butu nadonge anu moliu setu i Yesu to Nasare, meboo-boo siʼa natoʼo, “Yesu ana i Daudi Ndipokapurumo yaku!”
48Waʼa ntau sondo mampokarau siʼa ndapokau da monjii. Paikanya jana pakarimbomo peboonya, “Ana i Daudi, ndipokapuru yaku!”
49Meʼonto i Yesu, ndatoʼo, “Ndipeboo tau setu!” Njoʼumo kojo tau seʼe mampeboo tau buta setu, Natoʼoka ntau seʼe, “Parodomo rayamu! Siko ndapeboo i Yesu, peokomo!”
50Meoko i buta napetasoka jubanya maliga-liga nadadu i Yesu.
51Meoasi i Yesu ri siʼa ndatoʼo, “Nunjaa anu da rayamu Kupowiaka siko?”
Mesono i buta, “Pue, da rayaku menaa mataku!”
52Ndatoʼo i Yesu, “Palaimo, ua peaya ndayamu ri Yaku pai nukaʼosa.”
Ri tempo setu seʼe liu-liu yosamo matanya, nalulumo i Yesu ri jaya.
Currently Selected:
MARAKUSI 10: LAIPMF
Highlight
Share
Copy
Want to have your highlights saved across all your devices? Sign up or sign in
