MARAKUSI 7

Ada ntau tuʼa

7:1-13

(Mat. 15:1-9)

1Santibura to Parisi pai bara sangkuja guru agama ungka ri Yerusale maʼi ri Yesu. 2Nakita ntau seʼe bara sangkuja anaguru i Yesu mangkoni seʼi bareʼe nawusoʼi palenya riunya malulu songka agama.

3Waʼa nto Parisi pai pura-pura waʼa nto Yahudi timama kojo palulunya ada ntuʼa ntau seʼe. Tau seʼe bareʼepa da mangkoni ane bareʼe nawusoʼi palenya malulu ada anu roo ndapakanoto. 4Nunjaa anu ndaoli ri pasari bareʼepa maya ndakoni ane bareʼepa ndawusoʼi riunya. Pai maria ada ntaninya ungka tau tuʼa ntau seʼe anu nakekeni maroso ntau seʼe; ewa kono ada pawusoʼi galasi, mangko, pai waʼa mparewa tambaga.

5Inceʼe puʼunya painaka mompeoasi waʼa guru agama setu ri Yesu, “Nunjaa puʼunya painaka anaguru-Mi bareʼe malulu ada ungka maʼi tau tuʼata? Ara wenu anaguru-Mi setu mangkonimo seʼi bareʼepa nawusoʼi palenya?”

6 # Yes. 29:13 Mesono i Yesu ndatoʼo, “Komi waʼa ntau kalopu-lopu! Moncomo kojo anu napowatika i Nabi Yesaya mangkono komi,

‘Ewaseʼi pantoʼo i mPue Ala,

Waʼa ntau setu podo ngujunya mampanyomba Yaku,

paikanya raya ntau seʼe lawa ungka ri Yaku.

7Bereʼe yowenya panyomba ntau seʼe ri Yaku,

maka tau seʼe mampepaguruka songka ntolino

ewa mampepaguruka songka-Ku!’

8Waʼa ncongka i mPue Ala bareʼe ndiwianaka, waʼa da ntolino anu maroso pangkekenimi.”

9Ndatoʼo woʼu i Yesu, “Loʼe kojo komi maewa songka mPue Ala da naka maroso ndipangkekeni anu ndipepaguruka. 10#Pa. 20:12, 21:17, Tad. 20:9, Paw. 5:16 Roomo naparata i Musa songka anu mantoʼo, ‘Tubunaka papamu pai inemu,’ pai ‘Bara isema anu mampepepara papanya pai inenya, siʼa da ndapepate.’ 11Paikanya ndipepaguruka: Ane natoʼo ntau ri tau tuʼanya, ‘Nunjaa anu da kuwaika papa pai ine, roomo kupanyombaka ri Pue Ala,’ 12komi malapasaka tau setu ungka ri kinoyonya da mampelae inenya pai papanya. 13Mewali ndipaguruka waʼa ntau malulu pompagurumi ngkaliomi, komi mampalisi nuntu i mPue Ala. Mariapa powia anu ewanceʼe ndiwianaka.”

Waʼa anu mampakakarika tau

7:14-23

(Mat. 15:10-20)

14Ndapeboo woʼu i Yesu waʼa ntau sondo setu nepa ndatoʼoka, “Ndipedongeka mpodago da naka ndirata ndaya! 15Bereʼe bara nunjaa anu ungka ri sambalikunya anu mesua ri raya ntau anu da mampaka karika, paikanya anu mesuwu ungka ri raya ntau inceʼe anu mampaka karika. [16Mewali, ane motalinga, ndipedongeka.]”

17Ri pampalaika i Yesu tau sondo setu mesuamo Sira pai waʼa anaguru-A ri raya banua, napeoasimo waʼa anaguru-A posoki nuntu mporapa setu. 18Ndatoʼo i Yesu ri tau seʼe, “Ara bareʼepa woʼu ndirata ndaya, banya anu mesua ri raya ntau anu mampakakarika?” 19Maka anu mesua setu bareʼe mampoliu raya, paikanya ngkompo nepa mesuwu muni, tangara ndaya i Yesu mantoʼo ewancetu, “Mampatongawa pangkoni pura-pura maya ndakoni.”

20Ndatoʼo woʼu i Yesu, “Anu mesuwu ungka ri raya ntau inceʼe anu mampakakarika. 21Maka ungka ri raya ntau peumbanya nawa-nawa anu majaʼa painaka napowia anu majaʼa, melima, mepepate, 22mosalara, mantengosi tau, manuntuki tau, bareʼe metubunaka, masina raya, bahoho, mekiunde pai mapeni raya, bareʼe masua waʼa mpatada. 23Pura-pura anu majaʼa setu meumba ungka ri raya, pai inceʼemo anu mampakakarika tau.”

Peaya ndaya sambaʼa weʼa

7:24-30

(Mat. 15:21-28)

24Ungka lairia, ndapalaikamo i Yesu kareʼe setu, pai njoʼu Sira ri daera anu mosu kota Tiru. Mesambuni Sira ri banua ntau sambaʼa maka bareʼe ndapokono da naincani ntau kanjau-A njairia, paikanya bareʼe ndaleʼo mesambuni. 25Reʼe sambaʼa weʼa anu napesuaki inosa majaʼa ananya anu weʼa, madonge kanjau i Yesu. Njoʼu siʼa ri Yesu mombukotu ri suara-A, 26mamperapi da naka ndarumba i Yesu inosa majaʼa ungka ri ananggodi weʼa setu. Weʼa setu banya to Yahudi, siʼa ndapoana ri tana Penesia ri Siria. 27Ndatoʼo i Yesu ri siʼa, “Waʼa ananggodi sangaya-ngaya da ndapakoni riunya. Bareʼe madago mantima pangkoni waʼa ananggodi ndatendeka asu.”

28Mesono weʼa setu, “Pue, waʼa asu ri ara meja seʼe nakoni waʼa wurerenya anu nanawusi waʼa ananggodi!”

29Nepa ndatoʼo i Yesu ri siʼa, “Ua ewanceʼe pantoʼomu, pewalilimo; inosa majaʼa mesuwumo ungka ri anamu!”

30Mewalili weʼa setu ri banuanya. Karatanya njairia nakita ananya moturu-turu ri kareʼe ngkayore, bareʼemo kojo reʼe inosa majaʼa ri raya ananggodi setu.

I Yesu mampakaʼosa tau bobo bongo

7:31-37

31Ungka lairia malai woʼu i Yesu ungka daera Tiru mampaliu pelinja-A njoʼu ri Rano Galilea. Mojaya ri Sidoni malulu jaya anu melempo ri Sampuyu Kota. 32Njairia, jela tau mangkeni ri Sira sambaʼa tau bobo pai bongo. Naperapi ntau seʼe da naka i Yesu madonco tau setu. 33Ndapoyunu i Yesu tau setu tepatani ungka ri tau sondo, ndasusuwaka i Yesu karama-A ri raya mpotimali-mali ntalinga ntau setu, nepa ndajama jila ntau setu. 34Roo setu metingara Sira ri yangi, nepa mengosabaka Sira ndatoʼoka tau setu, “Epata,” posokinya, “Telokamo!”

35Telokamo talinga ntau setu, pai malulumo jilanya, pai tepuʼumo madago pompaunya. 36Ndapetangani i Yesu tau seʼe pura-pura da mampasimbajuka tau anu mewali setu. Paikanya kakomaʼai-ai ndapampetangani i Yesu janaʼaiwaka ntau mampobambarika. 37Pai pura-pura tau anu madonge jingki rayanya. Natoʼo ntau seʼe, “Pura-pura anu ndapowia paka anu madago! Pai Sira mampakayosa talinga ntau bongo, pai mampapompau tau bobo!”

Currently Selected:

MARAKUSI 7: LAIPMF

Highlight

Copy