MARAKUSI 3

Tau anu kape palenya sambali

3:1-6

(Mat. 12:9-14, Luk. 6:6-11)

1Mewalili muni i Yesu ri Banua i mPue. Njairia ndarata tau sambaʼa anu kape palenya sambali. 2Njaumo woʼu njairia waʼa ntau anu mampepali da kasala i Yesu, da naka reʼe jaya mampogiluka Sira. Natunda-tundani mpaliu ntau seʼe boi reʼe tau majuʼa anu ndapakaʼosa i Yesu ri eo Umapo. 3Ndaseko i Yesu tau anu kape palenya sambali setu ndatoʼo, “Maʼimo ireʼi pekakore ri suara.” 4Nepa ndapeoasi ri waʼa ntau anu njau njairia, “Malulu agama, nunjaa anu maya da ndawianaka ri eo Umapo? Mampowia anu madago bara mampowia anu majaʼa? Masorepaka tau bara mepepate?”

Monjii tau seʼe. 5Majaʼa raya i Yesu ndapapowawo pura-pura, paikanya mapari woʼu raya-A mangkita kapeni ndaya ntau seʼe. Nepa ndatoʼoka tau anu kape palenya sambali, “Laenakamo palemu.” Nalaenaka kojo palenya, liu-liu osamo. 6Mesuwumo waʼa nto Parisi ungka ri Banua i mPue setu, napareʼe pogombo pai bara tesangkuja tau i Herode, da mampepate i Yesu.

Tau sondo ri wingke ndano

3:7-12

7Malaimo i Yesu pai waʼa anaguru-A njoʼu ri Rano Galilea. Maria kojo tau anu ungka ri Galilea malulu i Yesu. Maria woʼu tau anu rata ungka ri tana Yudea, 8pai ungka ri Yerusale, ungka ri Idumea pai ungka ri tondo pebetea ngKoro Yarade, pai ungka ri sampotengi ngkota Tiru pai Sidoni. Waʼa ntau seʼe rata ri Yesu maka nadonge ntau seʼe waʼa anu ndapowia. 9#Mrk. 4:1, Luk. 5:1-3 Maʼai kojo kasondo ntau setu, painaka ndapokau i Yesu waʼa anaguru-A da mampatokaka Sira duanga, maka boi najujuli ntau sondo setu Sira. 10Maria tau majuʼa ndapakaʼosa, painaka mombembejujuli waʼa ntau majuʼa da mantimosuki Sira, da napaleʼo majama Sira. 11Pai waʼa ntau anu napesuaki inosa majaʼa, ane nakita ntau seʼe Sira, liu-liu mombukotu ri suara-A, seʼi meboo natoʼo, “Komimo Ana i mPue Ala!” 12Paikanya ndapetangani kojo i Yesu waʼa inosa majaʼa setu da mampobambarika kaʼisemanya Sira.

I Yesu mampilisi anagurua sampuyu pai radua

3:13-19

(Mat. 10:1-4, Luk. 6:12-16)

13Ungka lairia mandakemo i Yesu ri pongku ntana, ndasalemo waʼa ntau anu da ndapilisi. Ratamo kojo waʼa ntau setu, 14nepa ndapilisi ri oyo ntau seʼe sampuyu pai radua tau. Ndatoʼo, “Yaku mampilisi komi, da naka komi sangkani-ngkani pai Yaku, komi da Kupokau mampobambarika Nuntu ngKatuwu anu ungka ri Pue Ala, 15pai komi da mangarata kuasa mangarumba waʼa inosa majaʼa.”

16Seʼimo toʼo ntau anu sampuyu pai radua setu: I Simo (anu ndapapotoʼoka woʼu i Peturu), 17i Yakobu pai kasangkomponya i Yohane, inceʼe waʼa ana i Ncebedeu (tau seʼe ndalantika i Boanege, posokinya “ana gundu”), 18i Andaria, i Pilipu, i Batolomeu, i Matiu, i Toma, i Yakobu ana i Alipiu, i Tadeu, i Simo Pomakoje, 19pai i Yudasi to Karioti anu mampobalu i Yesu.

I Yesu pai i Belesebu

3:20-30

(Mat. 12:22-32, Luk. 11:14-23, 12:10)

20Ungka lairia i Yesu mewalili ri banua. Ratamo woʼu waʼa ntau sondo tepasambaka, painaka bereʼe tempo i Yesu pai waʼa anagurua da mangkoni. 21Butu ndadonge inea pai kasangkompo waʼa anu mewali setu, njoʼumo tau seʼe mantima Sira, maka natoʼo ntau “Sira wandomo!”

22 # Mat. 9:34, 10:25 Natoʼo waʼa guru agama anu ungka ri Yerusale, “Tau setu napesuaki i Belesebu!” Tadulako inosa majaʼa setu mawaika siʼa kuasa mairi waʼa inosa majaʼa.

23Ndapeboo i Yesu waʼa ntau sondo setu, nepa ndatuntuka tau seʼe bara sangkuja nuntu mporapa. “Ewambeʼi da pewalinya inosa majaʼa mairi inosa majaʼa?” 24“Rapanya sambaʼa negara waʼa ntaunya bareʼemo sambaʼa-mbaʼa pai moʼiwalimo, manoto negara setu da magero. 25Pai ane tau sancombori bereʼe kasambaʼa-mbaʼa, manoto sombori setu da magero. 26Pai ane ri raya mpoparenta i Majaʼa mewali katebureka pai poʼiwali, poparenta setu bareʼe da masae manoto da magero.

27Bereʼe tau anu mangkoto mampesuaki banua ntau anu maroso da marampa aga-aganya, ane bareʼe napungu riunya tau maroso setu. Roo setu nepa naleʼo marampa aga-aganya.

28Da ndipaincani! Ane reʼe tau anu mampowia salaa pai mampasowa pau mpetikodi sia bareʼe da ndakita naka. 29#Luk. 12:10 Paikanya ane siʼa mampetikodi Inosa mPue Ala siʼa da ndakitanaka salaanya. Maka salaa mampetikodi setu inceʼemo salaa anu bedareʼe kapusanya.” (30Pai ndapantoʼo i Yesu ewanceʼe, maka reʼe tau mantoʼo i Yesu napesuaki inosa majaʼa.)

Ine pai kasangkompo i Yesu

3:31-35

(Mat. 12:46-50, Luk. 8:19-21)

31Roo setu jelamo Ine pai kasangkompo i Yesu. Tau seʼe mopea ri sambalikunya, nepa napokau ntau seʼe tau ntaninya da mampeboo i Yesu. 32Sindara setu maria tau motunda-tunda mantolilimi i Yesu. Natoʼo ntau seʼe ri Sira, “Guru, njau ine pai waʼa ngkasangkompo-Mi ri sambalikunya tau seʼe mampepali Komi.”

33Ndasono i Yesu ndatoʼo, “Isema ine-Ku? Isema kasangkompo-Ku?” 34Roo setu ndapapowawo i Yesu tau seʼe pura-pura anu njau motunda sangkani-ngkani pai Sira, ndatoʼo, “Seʼimo ine pai waʼa kasangkompo-Ku! 35Tau anu mawianaka pepokono i mPue Ala, inceʼemo kasangkompo-Ku anu tuama pai kasangkompo-Ku anu weʼa, pai ine-Ku.”

Currently Selected:

MARAKUSI 3: LAIPMF

Highlight

Copy