MARAKUSI 2

I Yesu mampakaʼosa sambaʼa tau pungku

2:1-12

(Mat. 9:1-8, Luk. 5:17-26)

1Bara sangkuja ndeme ungka lairia mewalili i Yesu ri Kapenau. Tebambarimo kandate-A ri banua. 2Singkandomumo tau maria mpodago. Gori ngkaria ntau bareʼemo reʼe kasoanya, sako ri wombo banua buke-buke tau. Montepuʼumo Sira mampetumbu Nuntu ungka ri Pue Ala ri tau seʼe. 3Ntongo mompau Sira, jelamo tau aopo mangkati tau pungku sambaʼa da nakenika i Yesu. 4Paikanya nakeni ngkasondo ntau, bareʼe naleʼo ntau seʼe mosu ri Sira. Mewali natembi ntau seʼe ata ri simpontu kalau i Yesu. Roo setu nauyu ntau seʼe tau pungku setu sangkani pai alinya. 5Pangkita i Yesu kabangke mpeaya ndaya ntau setu, ndatoʼoka tau pungku setu, “Ana-Ku, waʼa ncalaamu bareʼemo ndakitanaka!”

6Bara sangkuja guru agama anu njau motunda iretu montepuʼu mompepeoasi ri rayanya, 7“Makoje kojo tau setu mompau ewanceʼe! Siʼa mampetikodi i Pue Ala. Isema anu mangkoto bareʼe da mangkitanaka salaa, ane banya i Pue Ala ngkalio-A?”

8Ri tempo setu seʼe ndaincani i Yesu nawa-nawa ntau seʼe. Pai ndapantoʼo, “Makuja komi mompepeoasi ri rayami ewancetu? 9Mbeʼi anu maruu ngkasarunya: mangantoʼo, ‘Salaamu bareʼemo ndakitanaka bara mangantoʼo’, ‘Pembangumo, pasaʼa alimu pai pelinjamo’! 10Paikanya seʼi-seʼi da kutujuka komi kamonconya ri wawo lino seʼi i Ana Manusia makuasa bareʼe mangkitanaka salaa.” Nepa ndatoʼo i Yesu ri tau pungku setu, 11“Pembangumo, pasaʼa alimu, pai pewalilimo!”

12Meoko tau pungku setu, pai liu natima alinya, nepa mesuwu nalulu mata ntau seʼe pura-pura. Jingki raya waʼa ntau setu, naunde i Pue Ala. Natoʼo, “Bepareʼe pangkitata anu ewanceʼi!”

I Yesu mampeboo i Lewi

2:13-17

(Mat. 9:9-13, Luk. 5:27-32)

13Mewalili muni i Yesu ri wiwi nDano Galilea. Sondo tau anu madadu Sira, ndapaguru tau seʼe. 14Sindara mpelinja i Yesu iretu, ndakita sambaʼa toponduru asele toʼonya i Lewi ana i Alipiu, motunda-tunda ri kantoro ntoponduru asele. Ndatoʼo i Yesu ri siʼa, “Lulumo yaku!” Meoko i Lewi nalulumo i Yesu.

15Ntongo mpangkoni i Yesu ri banua i Lewi, jelamo toponduru asele maria pai waʼa ntau anu napobanciika ntau sondo, mangkoni sangkani-ngkani pai i Yesu pai waʼa anaguru-A. Maka maria ri oyo ntau seʼe malulu i Yesu. 16Reʼe bara tesangkuja guru agama ungka ri to Parisi mangkita pangkoni i Yesu sangkani-ngkani pai waʼa nto ponduru asele pai waʼa ntau anu ndatoʼo majaʼa setu. Mewali napeoasi ntau seʼe ri waʼa anaguru-A, natoʼo, “Ara wenu gurumi mangkoni sangkani-ngkani pai waʼa ntoponduru asele, pai waʼa ntau majaʼa setu?”

17Ndadonge i Yesu pompeoasi ntau seʼe, pai ndapasono, “Tau anu madonde bareʼe da mampepali sando, podo tau anu majuʼa. Kamaʼi-Ku banya da mampeboo tau anu maepe koronya madagomo paikanya tau anu ndatoʼo bareʼe madago.”

Kono popuasa

2:18-22

(Mat. 9:14-17, Luk. 5:33-39)

18Ri anu santempo anaguru i Yohane Topopariu pai waʼa nto Parisi ntongo mopuasa. Reʼe tau jela mampeoasi ri Yesu, “Ara wenu anaguru i Yohane Topopariu pai waʼa anaguru nto Parisi mopuasa, paikanya anaguru-Mi bareʼe?”

19Mesono i Yesu, “Ri posusa mpopawawa, ara bareʼe da ndapakoni waʼa linggona? Ane sangkani-ngkanipa pai tau seʼe tumpu ngkoro tuama, sangaya-ngaya da mangkoni. 20Paikanya reʼe temponya ane tumpu ngkoro tuama bemo lau ri oyo ntau seʼe. Ri tempo setu bareʼe da mangkoni tau seʼe.

21Bereʼe tau anu da mantamba baju anu marumo pai ayapa dawoʼu. Maka ayapa mpontamba setu da marangani kabangke ngkasianya. 22Ewanceʼe seʼe bereʼe tau anu mangantawa anggoro dawoʼu ri watutu pela anu matuʼa. Maka anggoro dawoʼu setu da mampapebote watutu setu. Kapusa-pusanya radua-duanya tetaji. Anggoro dawoʼu sangaya-ngaya da ndatawa ri watutu anu dawoʼu woʼu!”

Pompeoasi kono eo Umapo

2:23-28

(Mat. 12:1-8, Luk. 6:1-5)

23 # Paw. 23:25 Ri anu sandeme kono ri eo Umapo i Yesu pai waʼa anaguru-A moliu ri tongo bonde gandu, napurusi waʼa anaguru-A wua gandu. 24Natoʼo nto Parisi ri Yesu, “Ara wenu anaguru-Mi maewa songka agamata, mampowia anu kapali ri eo Umapo?”

25-26 # 1 Sem. 21:1-6 #Tad. 24:9 Mesono i Yesu ndatoʼo, “Bara bareʼepa ndibasa tuntuka anu napowia i Daudi, ri tempo katadu mpanyomba bangke i Abiata. Ri tempo i Daudi pai yununya da yoga, maka natambo mpangkoni. Mesua siʼa ri Banua i mPue, pai mangkoni roti anu roomo ndapanyombaka ri Pue Ala. Pai roti setu natilaka woʼu waʼa yununya. Kamonconya malulu agamata, podo waʼa ntadu mpanyomba anu maya mangkoni roti setu.”

27Ndatoʼo woʼu i Yesu, “Eo Umapo ndapareʼe gala ntolino; banya tolino ndapareʼe gala eo Umapo. 28Mewali, i Ana Manusia makuasa pai mangkuasani eo Umapo.”

Currently Selected:

MARAKUSI 2: LAIPMF

Highlight

Copy