MARAKUSI 1

Tuntu i Yohane Topopariu

1:1-8

(Mat. 3:1-12, Luk. 3:1-18, Yoh. 1:19-28)

1Seʼimo Nuntu ngKatuwu kono i Yesu Kerisitu, Ana i mPue Ala. 2#Mal. 3:1 Nuntu ngKatuwu setu ndatepuʼu ewa anu naʼuki i Nabi Yesaya, ewaseʼi,

“Ndatoʼo i mPue Ala seʼimo pomokau-Ku;

‘Siʼa Kupokau damamporiuka siko,

da naka siʼa mampatokaka siko jaya-Mu.’

3 # Yes. 40:3 Reʼe tau meboo-boo ri pada bone,

‘Ndipatokakamo i Pue jaya-A;

ndipalenemo waʼa njaya anu da ndapoliu.’ ”

4Ewa anu teʼuki setu, ewanceʼemo woʼu karata i Yohane ri pada bone. Siʼa mangariu tau pai mampetumbu Nuntu ungka ri Pue Ala. “Komi sangaya-ngaya da majea ungka ri waʼa ncalaami pai sangaya-ngaya da ndariu, da naka bareʼe ndakitanaka i mPue Ala komi,” Ewanceʼe pantoʼo i Yohane. 5Pura-pura tau anu ungka ri tana Yudea pai ungka ri kota Yerusale njoʼu mampedongeka potuntu i Yohane. Napangakuka ntau seʼe waʼa ncalaanya, nepa nariu i Yohane tau seʼe ri Koro Yarade.

6 # 2 Raj. 1:8 Rengko i Yohane, ungka ri wuyu onta, soʼo ntongonya ungka ri pela, pangkoninya bombeu pai juyu uani. 7Napobambarika ewaseʼi, “Tau anu da rata mantonda yaku sangka bangkenya painaka yaku. Sako metutu malede wayaa ntalupa-A yaku seʼi bareʼe sintinaja. 8Yaku mariu komi pai ue, paikanya Sira da mariuka komi Inosa mPue Ala.”

I Yohane mariu i Yesu

1:9-11

(Mat. 3:13-17, Luk. 3:21-22)

9Sindara setu jelamo i Yesu ungka ri lipu Nasare ri tana Galilea, pai i Yohane mariu Sira ri koro Yarade. 10Jabutu mesore Sira ungka ri koronya setu, ndakitasaka teloka yangi pai Inosa mPue Ala metudu ri wawo ntanoana-a, ewa petopa ntonci putiʼa. 11#Pal. 22:2, Pol. 2:7, Yes. 42:1, Mat. 3:17, 12:18, Mrk. 9:7, Luk. 3:22 Nepa ndadonge oni nganga i mPue Ala mantoʼo, “Sikomo Ana-Ku anu Kupotowe. Siko mampakawongko raya-Ku!”

I Yesu nakelo i Majaʼa

1:12-13

(Mat. 4:1-11, Luk. 4:1-13)

12Jaroo pinca ndariu i Yesu ndaponinikamo Inosa mPue Ala, Sira njoʼu ri pada bone. 13Opompuyu ndeme Sira maroo-roo njairia, napebutuka i Majaʼa. Njairia Sira mogalo-galo pai waʼa mpinatuwu anu maila, pai waʼa kerubio mamporiokoi Sira.

I Yesu mampeboo aopo topebau

1:14-20

(Mat. 4:12-22, Luk. 4:14-15, 5:1-11)

14Butu ndatarunggumo i Yohane, malaimo i Yesu njoʼu ri Galilea, pai mampobambarika Nuntu ngKatuwu ungka ri Pue Ala njairia. 15#Mat. 3:2 Ndatoʼo, “I Pue Ala da ronga montepuʼu moparenta. Ndikajeamo ungka ri waʼa ncalaami, pai da ndiayamo Nuntu ngKatuwu anu ungka ri Pue Ala!”

16Sindara i Yesu melinja ri wingke nDano Galilea, ndakita topebau radua, inceʼemo i Simo pai tuaʼinya i Andaria. Tau seʼe ntongo majala bau ri rano setu. 17Ndatoʼo i Yesu ri tau seʼe, “Ndilulumo Yaku, komi da Kupaguru majala tau.” 18Liu napalaika ntau seʼe jalanya nalulumo i Yesu.

19Melinja mpaliu i Yesu, pai ndakita woʼu radua tau sangkompo anu ntaninya, inceʼemo i Yakobu pai i Yohane, waʼa ana i Ncebedeu. Tau seʼe lau ri raya duanga, ntongo mampakoroka jalanya. 20Liu ndapeboo i Yesu tau seʼe. Napalaika ntau seʼe papanya sangkani-ngkani pai waʼa ntau ndagaji ri raya duanga. Malaimo tau seʼe malulu i Yesu.

Tau anu napesuaki inosa majaʼa

1:21-28

(Luk. 4:31-37)

21Yesu pai waʼa anaguru-A jela ri kota Kapenau. Kono ri eo Umapo, mesuamo i Yesu ri banua mpekakai nepa montepuʼu mompaguru. 22#Mat. 7:28-29 Jingki raya waʼa ntau madonge pompaguru-A, maka Sira mompaguru pai kuasa, banya ewa waʼa guru agama ntau seʼe.

23Ri tempo setu sambaʼa tau anu napesuaki inosa majaʼa mesua ri banua mpekakai, pai meboo natoʼo, 24“Ee Yesu to Nasare, ara da ndikuja kami? Komi maʼi da mangagero kami? Kuincani kaʼisemanya Komi; komimo suro anu magali ungka ri Pue Ala!”

25Ndapokarau i Yesu inosa majaʼa setu, ndatoʼo “Ponjii!” “Pesuwumo ungka ri tau seʼi!”

26Inceʼe painaka inosa majaʼa setu marompo-rompotaka gori ngkarimbonya tau setu, nepa mesuwu ungka ri tau setu seʼi mekiu. 27Jingki kojo raya ntau pura-pura, painaka napombepeoasika natoʼo, “Ara nunjaa anu mewali seʼi? Sambaʼa pompaguru anu dawoʼu! Mampoliu roso pai kuasa ndapokau waʼa inosa majaʼa mesuwu, pai tau seʼe medonge ri Sira!”

28Painaka maliga kojo katebambari i Yesu ri samalele ntana Galilea.

Maria tau ndapakaʼosa i Yesu

1:29-34

(Mat. 8:14-17, Luk. 4:38-41)

29Ndapalaika i Yesu pai waʼa anaguru-A, banua mpekakai setu, njoʼu ri banua i Ncimo pai Andaria. I Yakobu pai i Yohane njoʼu woʼu sangkani-ngkani pai tau seʼe. 30Mania i mPeturu anu weʼa ntongo nawembe ri paturua. Ri pesua i Yesu pai waʼa anaguru-A ri banua setu, napetumbumo ntau ri Sira kanjaunya tau majuʼa setu. 31Ungka njairia ndadadu i Yesu mania i Ncimo anu weʼa, ndakekeni palenya nepa ndawangu. Payamo wembenya, nepa napasilolongani pampolinggona tau seʼe.

32Ngkinowia, butu soyomo reme ratamo waʼa ntau mawawa pura-pura tau anu majuʼa pai anu napesuaki inosa majaʼa, ri Yesu. 33Singkandomu pura-pura tau ri kota ri suara banua setu. 34Ndapakaʼosa i Yesu maria tau anu maepe mpengaya-ngaya juʼa, mairi woʼu waʼa inosa majaʼa. Bareʼe ndawai waʼa inosa majaʼa da mompau, maka waʼa anu majaʼa naincani ntau seʼe kaʼisemanya Sira.

I Yesu motuntu ri Galilea

1:35-39

(Luk. 4:42-44)

35Bangke reme ntongo masasayamapa membangumo i Yesu, malai Sira ungka ri banua. Sira njoʼu ri sambaliku ngkota ri kabareʼenya reʼe tau, mekakai njairia. 36Paikanya i Simo pai waʼa yununya malai mampepali Sira. 37Butu narata ntau seʼe Sira natoʼo, “Pura-pura tau ntongo mampepali Komi.”

38Paikanya mesono i Yesu ndatoʼo, “Maʼimo tapampaliu pelinjata ri waʼa ngkota anu ntaninya ri sampotengi ngkota seʼi. Yaku da motuntu njairia, maka inceʼemo tangara ndaya ngkamaʼiku.”

39 # Mat. 4:23, 9:35 Inceʼe puʼunya painaka i Yesu njoʼu ri pura-pura kota juku-juku Galilea, motuntu ri waʼa banua mpekakai pai mairi waʼa inosa majaʼa.

I Yesu mampakaʼosa sambaʼa tau ketangga

1:40-45

(Mat. 8:1-4, Luk. 5:12-16)

40Sambaʼa tau ketangga jela ri Yesu. Mombukotu siʼa nepa natoʼo, “Pue ane ndipokono, Ndikoto mampakaʼosa yaku.”

41Mapuru raya i Yesu ri tau setu. Mewali ndajama tau ketangga setu ndatoʼo, “Kupokono, kaʼosamo!” 42Ri tempo setu seʼe liu payamo juʼanya. Osamo siʼa. 43Nepa ndapokau i Yesu tau setu malai, pai ndapatiendo siʼa ndatoʼoka ewaseʼi, 44#Tad. 14:1-32 “Jaga, neʼe kojo boi reʼe tau nupauka, paikanya kanjoʼumo ri tadu mpanyomba, pai pekiparesa koromu napampakanoto kaʼosamumo. Pai ua kaʼosamu setu, panyombakamo panyomba malulu anu napesongkaka i Musa, da mewali petondoni ri waʼa ntau kaʼosamumo kojo.”

45Paikanya malaimo tau setu, napobambarika mpaliu anu mewali setu ri mbeʼi-mbeʼi, painaka bareʼemo ndaleʼo i Yesu mesua ri kota ane nakita-kita ntau. Maroo-roomo Sira ri sambaliku ngkota ri kabareʼenya reʼe tau. Mau ewanceʼe bereʼe karapanya ungka ri mbeʼi-mbeʼi tau madadu Sira.

Currently Selected:

MARAKUSI 1: LAIPMF

Highlight

Copy