MARAKUSI 16

Pembangu i Yesu

16:1-8

(Mat. 28:1-8, Luk. 24:1-12, Yoh. 20:1-10)

1Butu liumo eo Umapo, njoʼumo i Maria Madalena, i Maria ine i Yakobu pai i Salome maoli waʼa rampa da ndalanaika wata ngkoro i Yesu. 2Mowuro-wuro mpodago nepa mebete pinca reme, ri eo kaʼisa ri minggu setu, malaimo tau seʼe njoʼu ri dayo. 3-4Ri yae njaya napombepeoasika ntau seʼe, “Isemamo anu mangkoto da mantulungi kita da mawaenggo watu palo dayo?” Maka watu setu bangke kojo. Paikanya karata ntau seʼe njairia, nakita watu setu tedulimo. 5Nepa mesua tau seʼe ri raya dayo setu. Ri rayanya tondo mokana, nakita ntau seʼe sambaʼa ngalitau anu mampake juba mabuya matunda-tunda, jingki raya ntau seʼe.

6Mompau ngalitau setu natoʼo, “Neʼe maeka! Kuincani komi mampepali i Yesu to Nasare anu roo ndapaku ri kaju ndapanggo. Sira bareʼemo reʼe ireʼi. Sira membangumo! Ndipeolemo, seʼi waka mpauli ntau seʼe Sira. 7#Mat. 26:32, Mrk. 14:28 Seʼi-seʼi ndipalaimo, ndiparatamo bambari seʼi ri waʼa anaguru-A, tesua i Peturu. Da nditoʼo, ‘Sira mampesindiukamo komi njoʼu ri Galilea. Njairia nepa da ndikita Sira, silulu pai anu roomo ndatoʼoka komi.’ ” 8Mesuwumo tau seʼe ungka raya dayo setu, nepa molonco ua jingki raya pai maeka. Bereʼe bara nunjaa-njaa anu natoʼo ntau seʼe ri tau ntaninya, ua maeka.

KAPUSA NUNTU NGKATUWU ANU NAʼUKI I MARAKUSI MALULU UKI ANU RIUNYA

I Yesu mampapamara koroa ri Maria Madalena

16:9-11

(Mat. 28:9-10, Yoh. 20:11-18)

9Butu membangumo i Yesu ungka ri kapate-A, mowuro-wuro ri eo minggu Sira riu-riunya mampapamara koro-A ri Maria Madalena. (Ungka ri Maria seʼimo ndapampapesuwu i Yesu papitu inosa majaʼa.) 10Malaimo i Maria Madalena mampetumbu anu mewali setu ri waʼa yunu i Yesu, anu ntongo moomboka pai motumangi. 11Paikanya padonge ntau seʼe i Yesu tuwu muni, pai i Maria mangkitamo Sira, bareʼe naaya ntau seʼe.

I Yesu mampapamara koro-A ri anaguru-A radua

16:12-13

(Luk. 24:13-35)

12Ungka lairia i Yesu mampapamara koro-A ri anaguru-A radua, anu ntaninya katepewalinya. Inceʼe tepewali sindara tau radua setu ntongo mpelinja njoʼu ri sambaʼa lipu. 13Mewali mewalili tau seʼe, napetumbu anu mewali setu ri waʼa yununya anu ntaninya. Paikanya bareʼe naaya ntau seʼe.

I Yesu mampapamara koro-A ri waʼa anaguru-A

16:14-18

(Mat. 28:16-20, Luk. 24:36-49, Yoh. 20:19-23, Pwn. 1:6-8)

14Ripurinya, i Yesu mampapamara koro-A ri sampuyu pai sambaʼa anaguru-A, ri sindara tau seʼe ntongo mpangkoni. Sira manceko tau seʼe, maka makura peaya ndaya ntau seʼe pai maʼai ngkapeni woʼo painaka bareʼe naaya waʼa ntau anu mangkitamo ngkalionya i Yesu tuwu. 15#Pwn. 1:8 Nepa ndatoʼo i Yesu ri tau seʼe, “Ndipalaimo ri sambawo lino pai ndipobambarikamo Nuntu ngKatuwu ungka ri Pue Ala ri pura-pura tolino. 16Tau anu bareʼe maaya da ndahuku. Paikanya tau anu maaya pai ndariu, da tesorepaka. 17Pai katongawanya katau seʼenya meaya, waʼa ntau setu da mangairi inosa majaʼa ri toʼo-Ku: tau seʼe da mompau mampobasaka waʼa basa anu bareʼe naincani ntau seʼe. 18Ane nakekeni ntau seʼe ule bara mainu rasu, bareʼe da napomarugi ntau seʼe. Ane nadonco ntau seʼe waʼa ntau majuʼa, waʼa ntau setu daʼosa.”

I Yesu ndaoretaka ndeki suruga

16:19-20

(Luk. 24:50-53, Pwn. 1:9-11)

19 # Pwn. 1:9-11 Roo mompau i Yesu ri tau seʼe, Sira ndaoretaka ndeki suruga. Ndatiria Sira moparenta sangkani-ngkani pai Pue Ala. 20Malaimo waʼa anaguru-A mampobambarika nuntu ungka Pue Ala ri mbeʼi-mbeʼi kanjoʼunya. Pai i Pue seʼe njoʼu motetala sangkani-ngkani pai tau seʼe, pai tongawa ri waʼa tanda ngkuasa kamonco nuntu anu napetumbu ntau seʼe.

KAPUSA UKI RIUNYA ANU NTANINYA

[9Waʼa mbeʼa setu njoʼu madadu i Peturu pai waʼa yununya, nepa napau ntau seʼe ri kaʼedenya pura-pura anu roo natoʼo ngalitau setu ri tau seʼe. 10Roo setu, i Yesu ngkalio-A mampoliu waʼa anaguru-A mampobambarika ungka ri pebetea rata ri kasoyoa nuntu anu magali pai bareʼe da reʼe kapusanya kono katesorepaka anu bareʼe da reʼe kapusanya.]

Currently Selected:

MARAKUSI 16: LAIPMF

Highlight

Copy