MARAKUSI 12

Nuntu mporapa waʼa ntopotetala ri bonde anggoro

12:1-12

(Mat. 21:33-46, Luk. 20:9-19)

1 # Yes. 5:1-2 Ungka lairia ndatepuʼu i Yesu mampau nuntu mporapa ri waʼa ntadulako ntadumpanyomba, waʼa guru agama pai waʼa ntopombawanaka nto Yahudi setu. Ndatoʼo i Yesu, “Reʼemo sambaʼa tau mampomuya anggoro ri salimpu bonde anggoronya, nawaya ncape. Roo setu nakae wayau ndapadika parewa mpapaa anggoro, nepa nawangu sambaʼa kandepe mpojaga. Roo setu nepa napesaroka bonde anggoro setu ri bara tesangkuja topotetala, nepa malai siʼa ri tana ntaninya. 2Butu ratamo ri turonya pampupu wua anggoro, napokau ntau setu sambaʼa toporiokonya njoʼu ri waʼa ntopotetala ri bonde setu, da mantarima tilanya. 3Paikanya nasoko waʼa ntopotetala toporioko setu. Roo setu nabobaki ntau seʼe, nepa napokau siʼa mewalili soe-soe pale. 4Ungka lairia napokau woʼu ntumpu bonde setu sambaʼa toporiokonya anu ntaninya. Paikanya waʼa ntopotetala setu mabobaki woʼo ntoporioko setu, nepa nairi seʼi napepepara. 5Tumpu bonde setu mampokau woʼu sambaʼa toporiokonya anu ntaninya. Paikanya napepate ntau seʼe toporioko setu. Pai ewanceʼemo mpaliu pampowia ntau seʼe maria toporioko anu ntaninya woʼu: reʼe anu nawombo pai reʼe woʼu anu napepate. 6Seʼi seʼi isema woʼu anu da napokau ntumpu bonde setu? Jamo sambaʼa tau, inceʼemo ananya ngkalionya anu napotowe. Mewali kapusanya napokau ananya setu njoʼu ri waʼa ntopotetala setu. Nanawa-nawa, ‘Manoto anaku da natubunaka.’ 7Paikanya waʼa ntopotetala setu mompau sambaʼa pai sambaʼa natoʼo, ‘Seʼimo siʼa tumpu mpanta. Maʼi tapampepate siʼa, da naka kita mampotumpu pantanya!’ 8Nasoko ntau seʼe ana ntumpu bonde setu, nepa napepate. Wata ngkoronya natajika ntau seʼe ri sambaliku bonde setu.”

9Nepa meoasi i Yesu ndatoʼo, “Nunjaa anu da napowia ntumpu bonde setu? Manoto da rata siʼa mampepate waʼa ntopotetala setu, nepa da napepombaika bonde setu ri waʼa ntopotetala anu ntaninya. 10#Pol. 118:22-23 Sangaya-ngaya roomo ndibasa pau seʼi ri Sura Magali,

‘Watu anu bareʼe napake waʼa mpande

mewalimo watu nono ntongonya.

11Inceʼimo powia i mPue Ala

ara maʼaisa peawanya!’ ”

12Waʼa ntopombawanaka banca Yahudi anu mangadonge nuntu mporapa setu, mampari-mpari da mangancoko i Yesu, maka naincani ntau seʼe nuntu mporapa setu ndapatotoka i Yesu ri tau seʼe. Paikanya maeka raya ntau seʼe ri tau sondo. Mewali malai tau seʼe mampalaika i Yesu.

Kono pabayari asele

12:13-17

(Mat. 22:15-22, Luk. 20:20-26)

13Reʼe bara tesangkuja to Parisi pai bara tesangkuja tau i Herode, ndapokau da mantolia i Yesu pai waʼa mpompeoasi. 14Tau seʼe rata ri Yesu, mompeoasi natoʼo, “Guru, kaincani Komi tau mayoa pai bareʼe da mampedongeka parata ndaya ntau ntaninya. Komi mampaguru ri kayonto-yontonya pepokono mPue Ala ri tolino, maka Komi bareʼe mampilisi tau. Mewali, koisa Nditoʼoka kami, ‘Malulu ada agamata, bara maya mabayari asele ri Datu bara bareʼe? Bara sangaya-ngaya kita mabayari asele setu, bara bareʼe?’ ”

15Ndaincani i Yesu pokira-kira ntau seʼe. Mesono Sira ndatoʼo, “Nunjaa puʼunya painaka komi da mantolia Yaku? Koisa nditujuka Yaku sangkomba doi salaka.”

16Nepa nawai ntau seʼe ri Sira sangkomba doi salaka. Nepa meoasi i Yesu ndatoʼo, “Teke pai toʼo incema inceʼi?”

Mesono tau seʼe natoʼo, “Datu.”

17Ndatoʼo i Yesu, “Mewali, ane ewanceʼe. Waika i Datu nunjaa anu napotumpu i Datu, pai ri Pue Ala nunjaa anu ndapotumpu i mPue Ala.” Jingki raya ntau seʼe madonge pesono-A.

Kono pembangu ungka ri kapate

12:18-27

(Mat. 22:23-33, Luk. 20:27-40)

18 # Pwn. 23:8 Reʼe bara tesangkuja tau ungka ri to Saduki rata ri Yesu. (Tau seʼemo anu bareʼe mampomonco tau mate da wali mpembangu muni.) 19#Paw. 25:5 Natoʼo ntau seʼe ri Yesu, “Guru, I Musa maʼuki padika seʼi da tilata: ‘Ane sambaʼa tuama mate, pai siʼa bereʼe ananya, kasangkomponya sangaya-ngaya da mamporongo bembanya da naka reʼe muli ri tau anu matemo setu.’ 20Mewali reʼemo tau sangkompo papitu. Anu uyue morongo, pai mate bereʼe ananya. 21Ungka lairia anu karadua morongo pai bembanya, paikanya siʼa seʼe woʼu mate bereʼe ananya. Ewanceʼe seʼe pewalinya pai kasangkomponya anu katatogo, 22ewanceʼe mpaliu rantani rata ri anu kapapitu. Ripurinya matemo woʼu weʼa setu. 23Ri eo pembangu muni ntau mate, da rongo incema weʼa setu? Maka papitumo seʼe paka roo mamporongo siʼa!”

24Mesono i Yesu ndatoʼo, “Komi lingu kojo. Maka bareʼe ndirata ndaya bangani Ncura Magali ewanceʼe seʼe kuasa mPue Ala. 25Maka ane membangu muni waʼa ntau mate, tau seʼe bareʼe da morongo woʼu, paikanya tau seʼe da tuwu ewa kerubio ri suruga. 26#Pa. 3:6 Pai kono tau mate da ndapapembangu muni, ara bareʼepa ndibasa ri raya ncura i Musa kono yopo ngura anu mareka-reka setu? Njairia lau ndaʼuki i Pue Ala mompau ri Musa ndatoʼo, ‘Yakumo Pue Ala i Burahima, Pue Ala i Saki pai Pue Ala i Yako.’ 27Pue Ala setu banya Pue Ala ntau mate. Sira Pue Ala ntau tuwu. Komi lingu kojo!”

Songka anu bangke mpodago

12:28-34

(Mat. 22:34-40, Luk. 10:25-28)

28 # Luk. 10:25-28 Ratamo sambaʼa guru agama mampedongeka pompasimbaju i Yesu pai waʼa ntau ungka ri to Saduki setu. Nakitamo guru agama setu i Yesu roomo masono mpodago pompeoasi waʼa ntau setu. Meoasi woʼu siʼa ri Yesu natoʼo, “Songka anu mbeʼinya anu meruu ngkabangkenya ungka ri pura-pura songka?”

29 # Paw. 6:4-5 Mesono i Yesu ndatoʼo, “Songka anu kaʼisa inceʼemo: ‘Pedongeka, ee banca Isaraeli! Pue Ala pueta, i Pue setu sambaʼa-mbaʼa. 30Potowemo i Pue Ala puemu ri kaliogu ndayamu, gori mpangkoto ntanoanamu, gori mponawa-nawamu pai gori ngkarosomu.’ 31#Tad. 19:18 Songka anu karadua inceʼemo: ‘Potowemo kasitaumu, ewa pampotowemu koromu ngkaliomu.’ Bareʼemo reʼe songka anu ntaninya anu meruu ngkabangke ungka ri songka anu radua setu.”

32 # Paw. 4:35 Nepa mompau guru agama setu ri Yesu natoʼo, “Monco kojo Guru! Lawi monco nunjaa anu nditoʼo: i Puemo Pue Ala anu sambaʼa-mbaʼa, pai bareʼemo reʼe Pue Ala anu ntaninya. 33#Hos. 6:6 Pai tolino sangaya-ngaya da mampotowe Pue Ala ri kaliogu ndayanya, pai ri gori mponawa-nawanya, pai ri gori ngkarosonya. Pai siʼa woʼu sangaya-ngaya da mampotowe kasitaunya ewa koronya ngkalionya. Incetu meruu ngkadagonya painaka mampanyombaka panyomba anu ndaʼombasi pai waʼa mpanyomba ntaninya ri Pue Ala.”

34Ndakita i Yesu madago kojo pesono guru agama setu. Painaka mompau i Yesu ndatoʼoka siʼa, “Siko mosumo da mewali tau i mPue Ala.”

Roo setu, bareʼemo reʼe mau sambaʼa tau anu mantaha da mompeoasi ri Yesu.

Kono Mokole Tadungkadago

12:35-37a

(Mat. 22:41-46, Luk. 20:41-44)

35Sindara mompaguru ri raya Banua i mPue, meoasi i Yesu ndatoʼo, “Wenu painaka waʼa guru agama nakoto mantoʼo Mokole Tadungkadago setu muli i Daudi? 36#Pol. 110:1 Ntanoka i Daudi ngkalionya – ua pamponinika Inosa mPue Ala – mantoʼo,

‘I Pue mantoʼoka Pueku:

potundamo ri tondo mokana-Ku

rantani Kupapeʼuru waʼa iwalimu ri siko.’

37aMewali ane sako i Daudi mantoʼo Mokole Tadungkadago setu, ‘Pue’, ewambeʼi da pewalinya Siʼa muli i Daudi?”

Patiendo naka mainga-inga mancuaraki waʼa guru agama

12:37b-40

(Mat. 23:1-36, Luk. 20:45-47)

37bWaʼa ntau sondo anu njau ri Banua i mPue setu mawongko rayanya madonge pompaguru i Yesu. 38Ndatoʼo i Yesu ri tau seʼe, “Da mainga-ingamo mancuaraki waʼa guru agama. Napokono ntau seʼe melinja-linja mampake juba anu marate pai napokono ndatubunaka ri pasari. 39Ri banua mpekakai pai ri posusa napokono ntau seʼe motunda ri waʼa mpotunda anu meawa. 40Tau seʼe mantengosi waʼa mbeʼa bemba nepa narampa banuanya. Pai da mangkaʼuwi kajaʼa mpowia ntau seʼe setu, napakaʼai karate mpekakai ntau seʼe. Da manee huku ntau seʼe!”

Pombai mpanyomba sambaʼa weʼa bemba

12:41-44

(Luk. 21:1-4)

41Sindara mpotunda mombesuara pai peti mpanyomba ri raya Banua i mPue, ndapatomata i Yesu waʼa ntau anu mawunca doi ri raya mpeti setu. Maria tau koreʼe anu mawunca doi anu sondo; 42nepa rata woʼu sambaʼa bemba anu kaasi-asi. Siʼa mangawunca radua ngkomba doi tambaga inceʼemo doi kodi anu maʼai ngkasakodi olinya. 43Nepa ndapeboo i Yesu waʼa anaguru-A, ndatoʼoka tau seʼe, “Ndiparindayamo inceʼi: Bemba anu kaasi-asi setu mawuncamo ri raya mpeti setu anu meruu ungka ri pura-pura anu nawunca waʼa ntau ntaninya. 44Maka tau seʼe pura-pura mawai ungka ri peruu aga-aganya. Paikanya bemba setu mau maʼai ngkakaasi-asinya mawai pura-pura anu reʼe ri siʼa – pai inceʼemo anu da napake ri katuwunya.”

Currently Selected:

MARAKUSI 12: LAIPMF

Highlight

Copy