MARAKUSI 11
11
I Yesu ndabangkei ri pesua-A ri kota Yerusale
11:1-11
(Mat. 21:1-11, Luk. 19:28-40, Yoh. 12:12-19)
1Bareʼemo lawa ungka ri Yerusale, ratamo tau seʼe ri kota Bepage pai Betania ri apa Buyu ngKajulana, njairia ndapokau i Yesu anaguru-A radua mesindiu. 2Ndatoʼoka tau seʼe, “Ndikanjoʼumo ri lipu anu tasusuara sinjau.” Pesuami ri lipu sinjau, da ndikita sambaʼa ana ngkalide ndataka, anu bareʼepa reʼe napampelamba ntau. Ndilede wayaanya ndinoʼo ri maʼi. 3Pai ane reʼe tau meoasi ri komi, wenu painaka ndilede kalide setu, da nditoʼoka, “Da ndapelamba i mPue, pai daronga ndapapewalili muni.”
4Njoʼumo anaguru radua setu, narata sambaʼa ana ngkalide ndataka mosu ri boboka ri wiwi njaya. Nalede ntau seʼe wayaa ana ngkalide setu. 5Waʼa ntau anu mekakore njairia meoasi ri tau seʼe natoʼo, “Ee, nunjaa ndipowia? Wenu painaka ndilapa ana ngkalide setu?”
6Nasono ntau seʼe ewa pantotoraka i Yesu ri tau seʼe. Napapaliumo waʼa ntau setu pangkeni ntau seʼe kalide seʼe. 7Karata ntau seʼe ri Yesu, wutongo ngkalide setu nalampi ntau seʼe pai waʼa juba ntau seʼe, nepa melamba i Yesu. 8Maria tau anu mantalesaka juba ntau seʼe ri jaya, reʼe woʼu anu mantalesaka waʼa raʼa ngkaju anu natima ungka ri bonde. 9#Pol. 118:26 Waʼa ntau anu melinja ri suara pai anu ri taliku meboo-boo natoʼo,
10“Undemo i Pue Ala! Ndadoncomo Sira anu rata ri toʼo i mPue! Tuwu poparenta anu nepa da rata – poparenta ngkaita i Daudi! Undemo i Pue Ala Anu Ndate ri Peawanya!”
11Jelamo Sira ri kota Yerusale, mesua ri Banua i mPue. Njairia Ndapapowawo sape-sape. Paikanya ua mosu da mawengimo, malai Sira pai anaguru-A anu sampuyu pai radua, njoʼu ri lipu Betania.
I Yesu mantadeasi kaju ara
11:12-14
(Mat. 21:18-19)
12Bangke reme ntongo mpelinja tau seʼe ungka ri Betania, ndaepe i Yesu maoro. 13Ntongo lawa-lawapa ndakita kaju ara sampuʼu anu marombo iranya. Ineeʼe painaka njoʼu Sira mampeole bara reʼe wuanya, ndatimasuki da ndapampeole bara reʼe wuanya anu da ndakoni ndarata njairia. Kajela-A ri puʼunya bereʼe bara nunjaa-njaa ndarata njairia, podo iranya, maka lawi banyapa turo da mpowuanya. 14Nepa mompau i Yesu ri puʼu ara setu ndatoʼo, “Montepuʼu seʼi-seʼi bareʼemo reʼe mau sambaʼa tau anu da mangkoni woʼu wuamu!”
Nadonge waʼa anagurua pompau-A seʼe.
I Yesu mesua ri Banua i mPue
11:15-19
(Mat. 21:12-17, Luk. 19:45-48, Yoh. 2:13-22)
15Ungka lairia jela tau seʼe ri Yerusale, pai njoʼu woʼu i Yesu ri Banua i mPue. Njairia montepuʼu Sira mairi waʼa ntau anu mobalu-balu pai anu meoli njairia. Ndabalikoʼa waʼa meja ntopontolo doi pai waʼa bangku ntopobalu-balu tonci tokuku. 16Bareʼe ndawai mau sambaʼa tau melempo ri soma Banua i mPue setu mangkeni bara nunjaa ntano. 17#Yes. 56:7, Yer. 7:11 Nepa ndatotoraka i Yesu waʼa ntau anu njau njairia. Ndatoʼo, “Ri raya Ncura Magali ndaʼuki ewaseʼi: Ndatoʼo i mPue Ala, ‘Banua-Ku, da ndatoʼo kareʼe mpekakai tila waʼa banca? Paikanya ndipapewali kareʼe ntopojampa!’ ”
18Nadonge waʼa ntadulako ntadumpanyomba pai waʼa guru agama pompau-A setu. Painaka napepalimo ntau seʼe jaya da mampepate i Yesu. Paikanya napokaeka ntau seʼe Sira, maka pura-pura tau mangaunde pompaguru-A.
19Mosu da mawengimo, i Yesu pai waʼa anaguru-A malai ungka ri kota setu.
Puʼu ngkaju ara mangaumo, totoraka kono pekakai
11:20-26
(Mat. 21:20-22)
20Bangke reme mowuro-wuropa, sindara poliu ntau seʼe ri puʼu ara setu, nakita ntau seʼe puʼu ngkaju ara setu matemo rata-rata ri kalenya. 21Naendomo i mPeturu kono anu tepewali iwengi. Natoʼo i mPeturu ri Yesu, “Guru ndipeole! Puʼu ngkaju ara anu Nditadeasi matemo!”
22Mesono i Yesu ndatoʼo, “Ndiayamo i Pue Ala. 23#Mat. 17:20, 1 Kor. 13:2 Monco kojo ndikoto mantoʼoka buyu seʼi, ‘Peokotakamo pai penawumo ri tasi!’ Inceʼe da ndapowiaka komi podoia bareʼe kanuʼu-nuʼu rayami, pai ndiaya anu nditoʼo setu manoto da mewali. 24Ineeʼe painaka da ndiendomo inceʼi: Ane mekakai komi pai mamperapi bara nunjaa, ndiayamo i Pue Ala mawaikamo komi nunjaa anu ndiperapi, sangaya-ngaya da nditarima. 25#Mat. 6:14-15 Pai ane mekakai komi pai reʼe kodi ndayami ri sambaʼa tau, inceʼe riunya da neʼe ndikitanaka. Da naka Papami anu ri suruga woʼu bareʼe mangkitanaka waʼa ncalaami. [26Maka ane ndikitanaka kasala ntau ntaninya, Papami ri suruga woʼu da mangkitanaka waʼa ncalaami.]”
Pompeoasi kono kuasa i Yesu
11:27-33
(Mat. 21:23-27, Luk. 20:1-8)
27Mewalili muni tau seʼe njou ri Yerusale. Sindara melinja-linja i Yesu ri raya Banua i mPue, maʼimo tadu mpanyomba pai waʼa guru agama pai waʼa ntadulako nto Yahudi madadu Sira. 28Meoasi tau seʼe natoʼo, “Nunjaa nuporoso pai nupangkoto mampowia pura-puranya seʼi? Isema anu mawaika siko kuasa setu?”
29Mesono i Yesu ndatoʼoka tau seʼe, “Yaku woʼu reʼe anu da Kupeoasi ri komi, da ndisono nepa da Kutoʼoka komi pai kuasa incema Kupampowia pura-puranya seʼi. 30I Yohane mopariu pai kuasa incema, kuasa i mPue Ala bara kuasa ntolino?”
31Montepuʼu napombetoʼoka waʼa ntadulako ntadu mpanyomba pai waʼa ntopombawanaka nto Yahudi. Natoʼo ntau seʼe, “Ane tatoʼo, ‘Pai kuasa mPue Ala,’ da natoʼoka kita, ‘Wenu painaka bareʼe ndiaya i Yohane?’ 32Paikanya mapari woʼu da tamantoʼo, ‘Pai kuasa ntolino.’ ” Maka maeka raya ntau seʼe ri tau sondo, ua pura-pura tau mangaʼaku i Yohane sambaʼa nabi. 33Mewali mesono tau seʼe, “Bareʼe kaincani.”
Nepa ndatoʼo i Yesu ri tau seʼe, “Ane ewanceʼe, Yaku woʼu bareʼe da Kutoʼoka komi pai kuasa incema Kupawianaka pura-puranya seʼi.”
Currently Selected:
MARAKUSI 11: LAIPMF
Highlight
Share
Copy
Want to have your highlights saved across all your devices? Sign up or sign in
