MATIU 9
9
I Yesu mampakaʼosa sambaʼa tau pungku
9:1-8
(Mrk. 2:1-12, Luk. 5:17-26)
1Ungka lairia meʼulaya i Yesu, ri raya duanga nepa mowote mewalili ri lipu mpeari-A. 2Njairia ratamo tau mangkeni ri Sira sambaʼa tau pungku anu moturu-turu ri ali. Pangkita i Yesu kabangke mpeaya ndaya waʼa ntau setu, ndatoʼoka tau pungku setu, “Pakaroso rayamu ana-Ku! Waʼa ncalaamu bareʼemo ndakitanaka.”
3Reʼe bara tesangkuja guru agama anu njau njairia, mantoʼo ri rayanya, “Tau seʼi mampetikodi i Pue Ala!”
4Ndaincani i Yesu ponawa-nawa ntau seʼe, inceʼe pai ndapantoʼo, “Iwenu painaka ewanceʼe kajaʼa mponawa-nawami? 5Mbeʼi anu meruu ngkasarunya: mangantoʼo, ‘Salaamu bareʼemo ndakitanaka,’ bara mangantoʼo, ‘Pembangumo pai pelinja’? 6Paikanya seʼi-seʼi da Kutujuka komi kamonconya, ri wawo lino seʼi i Ana Manusia makuasa bareʼe mangkitanaka salaa.” Nepa ndatoʼo i Yesu ri tau pungku setu, “Pembangu, pasaʼa alimu pai pewalilimo!”
7Membangu tau pungku setu, nepa malai mewalili ri banuanya. 8Pangkita ntau sondo anu mewali setu, maekamo raya ntau seʼe naunde i Pue Ala, maka i Pue Ala mawaimo kuasa anu ewanceʼe ri tolino.
I Yesu mampeboo i Matiu
9:9-13
(Mrk. 2:13-17, Luk. 5:27-32)
9Ungka lairia, ntongo mpelinja i Yesu ndakita sambaʼa to ponduru asele motunda-tunda ri kantoro mponduru asele, i Matiu toʼonya. Ndatoʼoka siʼa, “Maʼi, lulu yaku!” Meoko i Matiu nalulumo Sira. 10#Luk. 15:1-2 Ntongo mpangkoni i Yesu ri banua i Matiu, jelamo toponduru asele anu maria pai waʼa ntau anu napobanciika ntau sondo, mangkoni sangkani-ngkani pai i Yesu pai anaguru-A. 11Reʼe waʼa nto Parisi anu mangkita pewalinya setu. Meoasi tau seʼe ri anaguru i Yesu natoʼo, “Ara wenu gurumi mangkoni sangkani-ngkani pai toponduru asele pai waʼa ntau majaʼa?”
12Padonge i Yesu pompeoasi ntau seʼe ewanceʼe, ndatoʼo, “Tau anu madonde bareʼe da napepali sando, podo tau anu majuʼa da mampepali sando. 13#Mat. 12:7, Hos. 6:6 Koisa ndilele ndaya mpodago nunjaa posokinya pau Nuntu NgKatuwu anu ewaseʼi katetoʼonya: ‘Anu Kutunggai inceʼemo puru ndaya, banya pinatuwu anu ndapanyombaka’. Maka kamaʼi-Ku banya da mampeboo tau anu maepe koronya madagomo paikanya tau anu ndatoʼo bareʼe madago.”
Kono popuasa
9:14-17
(Mrk. 2:18-22, Luk. 5:33-39)
14Maʼimo anaguru i Yohane Topopariu madadu Sira mampeoasi, “Makuja kami pai waʼa nto Parisi mopuasa, paikanya anaguru-Mi bareʼe?”
15Mesono i Yesu ndatoʼo, “Ewambeʼi parata ndayami? Da sintempo ane waʼa linggona mpopawawa da masusa-susa rayanya, seʼi tumpu ngkoro tuama ntongo njaupa sangkani-ngkani pai tau seʼe? Inceʼe manoto bareʼe sintempo! Paikanya maʼipa temponya tumpu ngkoro tuama setu ndatima ungka ri oyo ntau seʼe. Ri tempo setu nepa da mopuasa tau seʼe.
16Bereʼe tau da mampontambaka ayapa anu dawoʼu ri baju anu marontomo, maka tambanya da maombitaka ayapa anu marontomo, painaka teranganimo kaʼai ngkasianya. 17Ewanceʼe seʼe bereʼe tau anu mangantawa anggoro dawoʼu ri raya mbatutu pela anu matuʼa. Maka watutu setu da mebote pai majaʼa, pai anggoronya tesebu. Anggoro dawoʼu sangaya-ngaya da ndatawa ri watutu anu dawoʼupa, da naka radua-duanya madago.”
Ana ntadulako banua mpekakai
Weʼa anu maisu juba i Yesu
9:18-26
(Mrk. 5:21-43, Luk. 8:40-56)
18Ntongo mompau-mpau pai anaguru i Yohane Topopariu, ratamo sambaʼa tadulako ri banua mpekakai, mombukotu ri suara i Yesu natoʼo, “Anaku anu weʼa nepa pura pinca inosanya. Ndikamaʼimo Pue ndijama sangaya-ngaya da tuwu muni siʼa.”
19Meoko i Yesu ndalulu tau setu sangkani-ngkani pai waʼa anaguru-A.
20-21Ri yae njaya reʼe sambaʼa weʼa anu sampuyu pai radua ntaʼumo kajuʼanya bareʼe oti-oti daa, natimosuki i Yesu ungka ri taliku. Natoʼo ri rayanya, “Mau podo joe juba-A kuisu, sangaya-ngaya daʼosa yaku!” Naisumo kojo joe juba i Yesu.
22Metorobaka i Yesu ndapatomata weʼa setu, ndatoʼo, “Pakaroso rayamu ana-Ku! Peaya ndayamu mampakaʼosamo siko!” Ri tempo setu seʼe osamo juʼa mbeʼa setu.
23Kajela i Yesu ri banua ntadulako banua mpekakai setu, ndakita i Yesu waʼa nto pongayu mpopalindo pai waʼa nto potumangi anu ndasaro, maʼai kakaliwongonya, 24ndatoʼo i Yesu ri tau seʼe, “Ndipesuwu komi pura-pura! Ananggodi setu bareʼe mate, siʼa podo yore.”
Napogeleka ntau seʼe i Yesu. 25Puramo mesuwu tau setu, nepa mesua i Yesu ri lincu ananggodi setu, ndakekeni palenya. Membangu ananggodi weʼa setu tuwu muni siʼa. 26Tolelemo bambarinya anu mewali setu ri samalele lemba setu.
I Yesu mampakaʼosa radua tau buta
9:27-31
27Palai i Yesu ungka njairia, ri yae njaya reʼe tau buta radua malulu Sira. Tau seʼe meboo-boo natoʼo, “Ana i Daudi ndipokapurumo kami!”
28Pesua i Yesu ri banua, jelamo tau buta radua setu madadu Sira. Meoasi i Yesu ri tau seʼe ndatoʼo, “Ara ndiaya pangkotoku da mampakaʼosa komi?”
Mesono tau seʼe, “Kaaya Pue!”
29Nepa ndajama mata ntau setu, ndatoʼo, “Ua peaya ndayami, da mewalimo ewa anu nditangara.” 30Liu-liu yosamo mata ntau seʼe. Roo setu ndatoʼoka tau seʼe yonto-yonto, da naka neʼe napauka tau anu mewali setu.
31Paikanya malaimo tau radua setu napobambarika toʼo i Yesu ri pura-pura lemba.
I Yesu mampakaʼosa tau bobo
9:32-34
32Ri palai ntau radua setu, jelamo nawawa ntau, sambaʼa tau anu bobo anu napesuaki inosa i majaʼa. 33Ndairi i Yesu inosa majaʼa ungka ri tau anu bobo setu, painaka sowa muni mompau. Maria tau anu njau njairia benge rayanya mangkita, pai napantoʼo, “Bareʼepa reʼe kapangkita pewalinya ewanceʼi ri oyo nto Isaraeli!”
34 #
Mat. 10:25, 12:24, Mrk. 3:22, Luk. 11:15 Paikanya natoʼo nto Parisi, “Tadulako i majaʼa anu mawaika siʼa kuasa painaka nakoto mairi i majaʼa.”
Mapuru raya i Yesu mangkita tau sondo
9:35-38
35 #
Mat. 4:23, Mrk. 1:39, Luk. 4:44 Ewaseʼemo i Yesu moliliwu ungka ri kota sambaʼa njoʼu ri kota sambaʼa, ungka ri lipu sambaʼa njoʼu ri lipu anu sambaʼa. Sira mompaguru ri waʼa banua mpekakai, pai mampobambarika Bambari ngKawongko ndaya kakononya ewambeʼi i Pue Ala moparenta ewa sambaʼa Mokole. Sira seʼe mampakaʼosa waʼa ntau anu majuʼa mpengaya-ngaya pai anu reʼe posarika ngkoronya. 36#Pai. 27:17, 1 Raj. 22:17, 2 Taw. 18:16, Yeh. 34:5, Sak. 10:2, Mrk. 6:34 Pangkita i Yesu tau sondo setu merata puru ndayaa, maka tau seʼe dindinganimo pai bareʼemo naincani da kanjoʼunya, ewa bimba anu bareʼemo reʼe topongkambinya. 37#Luk. 10:2 Nepa ndatoʼo i Yesu ri waʼa anaguru-A, “Maria anu da ndapota, paikanya tau anu da momota pongoli. 38Inceʼe painaka ndiperapimo ri tumpu njamaa da naka ndapokau tau maʼi momota.”
Currently Selected:
MATIU 9: LAIPMF
Highlight
Share
Compare
Copy
Want to have your highlights saved across all your devices? Sign up or sign in
