MATIU 8
8
I Yesu mampakaʼosa tau ketangga
8:1-4
(Mrk. 1:40-45, Luk. 5:12-16)
1Pobalungke i Yesu ungka ri pongku ntana, maria kojo tau anu mangalulu Sira. 2Sindara setu jelamo sambaʼa tau ketangga mombukotu ri suara i Yesu, nepa mompau natoʼo, “Pue ane ndipokono, Ndikoto mampakaʼosa yaku.”
3Ndajama i Yesu tau setu, ndatoʼo, “Kupokono, Kaʼosamo!” Liu-liu payamo juʼanya. 4#Tad. 14:1-32 Nepa ndatoʼo i Yesu ri siʼa, “Pedongeka! Neʼe kojo boi reʼe tau nupauka. Paikanya kanjoʼumo ri tadu mpanyomba, pai pekiparesa koromu napampakanoto kaʼosamumo. Roo setu panyombakamo panyomba anu napesongkaka i Musa, da mewali petondoni ri waʼa ntau, kaʼosamumo kojo.”
I Yesu mampakaʼosa anamayunu i ntadulako ncurodado nto Roma
8:5-13
(Luk. 7:1-10)
5Pesua i Yesu ri Kapenau, reʼe sambaʼa tadulako ncurodado nto Roma mampomberataka Sira, maʼi merapi tulungi ri Sira, natoʼo, 6“Pue, ndate ri banuaku sambaʼa toporiokoku majuʼa maʼai. Mapari kojo naepe, matemo koronya.”
7Ndatoʼo i Yesu, “Yaku da ndeku mampakaʼosa siʼa.”
8Paikanya mesono tadulako ncurodado setu, natoʼo, “Neʼemo ndeku komi Pue.” “Maka yaku bareʼe sintinaja da mantarima Komi ri banuaku. Mau podo Nditoʼo ungka. Da osa toporiokoku setu. 9Maka yaku woʼu medonge ri songka ntau anu kuporiwawo pai reʼe waʼa ncurodado anu kuporiara sangaya-ngaya da medonge ri songkaku. Ane kupokau sambaʼa surodado, ‘Palai!’ da malai siʼa; pai ane kutoʼoka anu ntaninya, ‘Maʼi ireʼi!’ da maʼi siʼa. Pai ane kusongka anamayunuku, ‘Powia inceʼi!’ da napowia.”
10Padonge i Yesu pompau ntadulako ncurodado setu, jingki kojo raya-A; painaka ndatoʼoka waʼa ntau anu malulu Sira, “Monco Kutoʼoka komi, ri oyo nto Isaraeli bareʼepa reʼe Kupampomberataka peaya ndaya anu ewanceʼi kabangkenya. 11#Luk. 13:29 Monco Kutoʼoka komi! Maria tau da tepasambaka ungka ri pebetea pai ungka ri kasoyoa, anu da motunda molimbu mangkoni sangkani-ngkani pai i Burahima, i Saki pai i Yako ri Lino Dawoʼu i mPue Ala. 12#Mat. 22:13, 25:30, Luk. 13:28 Ntanoka tau anu kamonconya da mewali taliwanua ri Poparenta mPue Ala da ndatajika ri kawengi-wenginya ri sambalikunya. Njairiamo kareʼe ngkapari pai potumangi!” 13Nepa ndatoʼoka tadulako ncurodado setu, “Pewalilimo, ewa peaya ndayamu, da ewanceʼemo pewalinya.”
Ri tempo setu seʼe osamo kojo anamayununya.
Maria tau ndapakaʼosa i Yesu
8:14-17
(Mrk. 1:29-34, Luk. 4:38-41)
14Kajela i Yesu ri banua i mPeturu, ndakita manianya anu weʼa moturu-turu nawembe. 15Ndajama pale mbeʼa setu liu-liu osa juʼanya. Membangu siʼa napolinggona i Yesu.
16Ri kangkinowianya maria tau anu nakuasai inosa majaʼa nawawa ntau ri Yesu. Podo sanjumi pau ndatoʼo i Yesu mairi waʼa inosa anu majaʼa setu, liu-liu osa waʼa ntau setu; maria woʼu tau anu majuʼa ntaninya, ndapakaʼosa pura-pura. 17#Yes. 53:4 Pewalinya ewanceʼe kobanganimo wati i Nabi Yesaya anu mantoʼo, “Sira anu mangkoyo waʼa ngkaparita pai mampakaʼosa waʼa njuʼata.”
Waʼa ntau anu da malulu i Yesu
8:18-22
(Luk. 9:57-62)
18Pangkita i Yesu maria tau anu malimbu-limbu Sira, ndapokau anagurua da mampowoteka Sira ri sambote ndano. 19Bareʼepa tepalai, ratamo sambaʼa guru agama mantimosuki Sira natoʼo, “Guru, yaku kupokono da melulu ri komi mau ri mbeʼi-mbeʼi kanjoʼumi!”
20Mesono i Yesu ndatoʼo, “Sarigala reʼe wayaunya, pai tonci reʼe seanya, paikanya i Ana Manusia bereʼe kareʼe mpoturunya.”
21Reʼe sambaʼa anaguru-A metompa ri Sira, natoʼo, “Pue ndiwaimo riunya yaku mewalili da mangadayo papaku.”
22Paikanya mesono i Yesu ndatoʼo, “Lulumo yaku pai papaliu tau mate mangadayo tau matenya ngkalionya.”
I Yesu mampapeʼonto ngoyu marimbo
8:23-27
(Mrk. 4:35-41, Luk. 8:22-25)
23Meʼulayamo i Yesu pai waʼa anaguru-A ri duanga. 24Ntongo mpoduanga tingkarasaka mewuimo ngoyu marimbo painaka merimbomo ropo, pai duanga ntau seʼe natende-tende ndopo. Sindara setu i Yesu ntongo ngkayore ri raya duanga. 25Njoʼumo waʼa anaguru-A malike Sira natoʼo, “Pue! Ndipelae! Kita da malatu!”
26Membangu Sira ndatoʼoka anaguru-A, “Wenu painaka maeka rayami?” ‘Komi bareʼe ntani ndiaya Yaku!” Meoko Sira ndaseko ngoyu pai ropo, liu-liu meʼonto ngoyu mandamo ropo painaka lotomo rano.
27Jingki raya waʼa anaguru-A, natoʼo ntau seʼe, “Ara isema kojo Sira seʼi, sako ngoyu pai ropo medonge ri songka-A!”
I Yesu mampakaʼosa radua tau anu napesuaki inosa majaʼa
8:28-34
(Mrk. 5:1-20, Luk. 8:26-39)
28Towotemo i Yesu ri sambote ndano, ratamo Sira ri tana nto Gadara. Maʼimo tau wando radua mangadadu Sira. Maʼai kojo kasiinya tau radua setu painaka bareʼemo reʼe tau anu mantaha moliu njairia. 29Mesuwu tau radua setu ungka ri dayo, meboo-boo natoʼo, “Ee Ana mPue Ala, ara da nukuja kami, bara da Nujeani kami mau bareʼepa rata ri temponya?”
30Bareʼe lawa ungka njairia, njau wawu sadompu mampepali pangkoninya. 31Merapimo waʼa inosa majaʼa setu ri Yesu natoʼo, “Ane da Ndipapalai kami, Ndipokaumo da kapesua ri raya waʼa mbawu sinjau.”
32Ndatoʼo i Yesu, “Ndipalaimo!” Mesuwumo waʼa inosa majaʼa ungka ri tau radua setu nepa mesua ri raya waʼa mbawu. Painaka moloncomo waʼa mbawu setu mosompo ri yaa tudu ri rano mate malodongi.
33Moloncomo waʼa nto pojaga mbawu setu ndeku ri kota, napetumbumo pura-pura anu mewali setu, ewambeʼi katedikanaka mbawu pai katedikanaka ntau radua anu napesuaki inosa majaʼa setu. 34Inceʼe painaka mesuwumo pura-pura tau ri kota setu njoʼu mampomberataka i Yesu. Pangkita ntau seʼe i Yesu, merapi waʼa ntau setu ri Sira, da naka maliga-liga Sira malai ungka ri daera ntau seʼe.
Currently Selected:
MATIU 8: LAIPMF
Highlight
Share
Compare
Copy
Want to have your highlights saved across all your devices? Sign up or sign in
