MATIU 7
7
Mangabotusi tau
7:1-6
(Luk. 6:37-38,41-42)
1“Neʼe mangabotusi tau ntaninya, da naka komi ngkaliomi woʼu bareʼe ndabotusi i mPue Ala. 2#Mrk. 4:24 Maka ewambeʼi ndipampetisala tau ntaninya, da ewanceʼe seʼe da ndapampetisala i mPue Ala komi. Maka podasi anu ndidasika tau ntaninya, inceʼe woʼu anu da ndadasika i mPue Ala komi. 3Ara wenu sanceso kaju ri raya mata ngkasangkompomi ndikita, ntanoka saowo kaju ri raya matami ngkaliomi bareʼe ndikita? 4Ewambeʼi da ndipangangkoto mantoʼoka kasangkompomi, ‘Maʼi kupayali kaju sanceso setu ungka ri matamu,’ ntanoka ri raya matami ngkaliomi njau kaju saowo bareʼe ndikita? 5Ee, toponggoli-nggoli! Yalimo riunya kaju saowo ungka ri matami ngkaliomi, nepa da yosa pangkitami pai ndileʼo mangayali sanceso kaju ungka ri mata ngkasangkompomi.
6Anu magali neʼe ndiwaika asu, da naka neʼe metorobaka asu najangku komi. Pai neʼe ndiwaika mbawu matia da naka neʼe podo nayojosi ngkabongo matia setu.”
Totoraka kono kapuru ndaya mPue Ala
7:7-12
(Luk. 11:9-13)
7“Ndiperapimo, da ndawaika komi. Ndipepalimo sangaya-ngaya da ndirata. Nditadengkosimo dampo mbombo, da ndalokaka komi. 8Maka tau anu mamperapi da ndawaika; pai tau anu mampepali da mangarata, pai tau anu mantadengkosi, dampo da ndalokaka. 9Ara reʼe ri oyomi, papa anu mawaika ananya watu, ane mamperapi roti? 10Bara nawaika ule ane naperapi wayawo? 11Ane sako komi tau majaʼa, ndiincani mawaika anami anu madago. Pagonya Papami ri suruga! Sira anu meruu woʼu da ndapawai anu madago ri tau anu mamperapi.
12 #
Luk. 6:31
Ndipowiamo ri tau ntaninya ewa anu ndipokono da napowiaka ntau ri komi. Inceʼemo uneki mpadika i Musa pai anu napaguru waʼa nabi.”
Boboka anu kopi
7:13-14
(Luk. 13:24)
13“Ndipesuamo mampoliu boboka anu kopi, maka boboka pai jaya anu da njoʼu ri naraka bangke pai mabini, pai maria tau anu mampokono malulu. 14Paikanya kopi-kopi boboka pai mapepu jaya anu da nalulu ntau da jela ri katuwu, pongoli tau anu da marata nceʼe!”
Puʼu ngkaju pai wuanya
7:15-20
(Luk. 6:43-44)
15“Ndipepeole mpodago waʼa nabi kambamba-mbamba. Tau seʼe da maʼi mampomberataka komi da mokira-kira ewa bimba, ntanoka raya ntau seʼe ewa sarigala anu masii. 16Da ndipatomata powianya da ndipaincani waʼa ntau setu. Taramanu bareʼe da mampowuaka jambu, pai konau bareʼe da mampowuaka wua ngkayuku. 17Puʼu ngkaju anu malimbokori da madago powuanya, pai puʼu ngkaju anu bareʼe malimbokori bareʼe woʼu da madago powuanya. 18Puʼu ngkaju anu malimbokori bareʼe da mampowuaka wua anu majaʼa, pai puʼu ngkaju anu bareʼe malimbokori bareʼe woʼu da mampowuaka wua anu madago. 19#Mat. 3:10, Luk. 3:9 Waʼa puʼu ngkaju anu bareʼe madago powuanya, da ndatowo pai da ndapanowa. 20#Mat. 12:33 Ewancetumo waʼa nabi kambamba-mbamba. Ri poengkonya da ndipaincani tau seʼe.”
Peluluta ri Pue neʼe podo ri nguju
7:21-23
(Luk. 13:25-27)
21“Banya pura-pura tau anu mampeboo yaku, ‘Pue, Pue,’ da mesua ri poparenta ncuruga, paikanya podo waʼa ntau anu mawianaka pepokono mPapaku ri suruga. 22Maka ri Eo Kiama, sondo tau anu da mantoʼoka yaku, ‘Pue, Pue, ara banya kami anu mampetumbu nuntu i mPue Ala mamposabi Toʼo-Mi? Ara banya kami anu marumba i majaʼa mamposabi Toʼomi, pai maria ngaya tanda ngkuasa anu katuju?’ 23#Pol. 6:9 Paikanya da mesono yaku, ‘Bareʼe kuincani komi! Ndipalai ungka ireʼi, komi waʼa ntau anu majaʼa powiami!’ ”
Topombangunaka banua anu loʼe pai topombangunaka banua anu tengo
7:24-27
(Luk. 6:47-49)
24“Mewali tau anu madonge pauku seʼi pai nalulu, siʼa siwiamo pai tau anu loʼe mangawangu banuanya ri wawo roka mbatu. 25Ri tempo mpouja narumpa ue mowo, bara nawui ncumbara banua setu, paikanya bareʼe madungka maka ndawangu ri roka mbatu.
26Paikanya tau anu madonge pauku seʼi pai bareʼe nalulu, siʼa siwiamo pai tau anu tengo mangawangu banuanya ri wawo ndangiʼi. 27Ri tempo mpouja narumpa ue mowo, bara nawui ncumbara banua setu painaka madungka pai malesa!”
Kuasa i Yesu
7:28-29
28 #
Mrk. 1:22, Luk. 4:32 Ri karoonya mompaguru i Yesu, jingki kojo raya ntau anu madonge pompaguru-A. 29Maka Sira mompaguru pai kuasa, banya ewa waʼa guru agama ntau seʼe.
Currently Selected:
MATIU 7: LAIPMF
Highlight
Share
Compare
Copy
Want to have your highlights saved across all your devices? Sign up or sign in
