MATIU 6
6
Patada kono kapande ndaya
6:1-4
1 #
Mat. 23:5
“Kupatiendo komi, neʼe ndipetujuka kadoyomi mawianaka songka agama ri suara ntau sondo podo da napangkita ntau. Maka ane ewanceʼe powiami, bareʼe da reʼe saromi ndawai mPapami ri suruga.
2Mewali, ane komi mawai kabuya ndayami ri tau kaasi-asi, neʼemo mampobambarika powiami setu, ewa poʼengko ntau anu mekiunde. Tau seʼe napokono mowia ewanceʼe ri raya banua mpekakai pai ri jaya bangke, da naka naunde ntau. Ndipaincani, tau seʼe roomo natarima saronya. 3Paikanya komi ane mawai kabuya ndayami, da ndiwai ngkaroo, naka neʼe reʼe tau anu maincani. 4Mbolimo powiami setu bereʼe tau anu maincani, waʼanya Papami anu ri suruga anu maincani, Sira anu mangkita powiami anu tesambuni setu da mawaika komi saromi.”
Patada kono pekakai
6:5-15
(Luk. 11:2-4)
5 #
Luk. 18:10-14
“Ane mekakai komi, neʼe ewa pekakai ntopokira-kira. Tau seʼe napokono mekakai mekakore ri raya banua mpanyomba pai ri porampu njaya da napangkita ntau. Da ndipaincani, tau seʼe roomo natarima saronya, maka nakita pai naundemo ntau pekakainya. 6Paikanya komi ane mekakai, ndipesuamo ri raya lincu pai ndidampo wombo, nepa mekakai ri Papami anu bareʼe ndikita mata. Maka Papami anu mangkita powiami anu tesambuni setu da mawaika komi saromi.
7Ane mekakai komi, neʼe moimba-imba ewa waʼa ntau anu bareʼe naincani i Pue. Nasarumaka ntau seʼe bara da ndapedongeka perapinya ua kamarate mpekakainya. 8Komi neʼe ewa tau seʼe. Maka Papami anu maincani nunjaa anu da ndipoyoweka ri kabareʼepanya ndiperapi. 9Mewali, ndipekakaimo ewaseʼi,
‘Papa mami ri suruga
Komimo Pue Ala nu sambaʼa-mbaʼa.
Mbolimo komi ndapanyomba pai ndatubunaka.
10Komimo mokole mami,
Mbolimo komi moparenta ri lino,
pai pepokonomi ndawianaka ewa ri suruga.
11Ndiwaika kami sandeme seʼi pangkoni
anu da kakoni.
12Neʼemo ndikitanaka kasalaa mami,
ewa kami bareʼemo mangkitanaka tau
anu masala ri kami.
13Neʼe ndipapaliu paya peaya mami ri sindara komi ri pompebutuka,
paikanya ndilapasaka kami ungka ri kuasa i Majaʼa.
[Maka Komimo Mokole anu makuasa pai meawa anu bareʼe da reʼe kapusanya. Ami.]’
14 #
Mrk. 11:25-26
Maka ane bareʼe ndikitanaka sala ntau anu masala ri komi, Papami ri suruga woʼu bareʼemo da mangkitanaka kasalami. 15Paikanya ane ndikitanaka kasala ntau ntaninya, Papami ri suruga woʼu da mangkitanaka kasalami.”
Patada kono popuasa
6:16-18
16“Ane mopuasa komi, neʼe momondo-mondo ewa waʼa ntau anu to pokira-kira. Nabalisaka ntau seʼe lionya, da napaincani ntau pura-pura katauseʼenya ntongo mopuasa. Neʼe ndikalingani, tau seʼe roomo mantarima saronya maka nakitamo ntau popuasanya. 17Paikanya komi ane mopuasa, ndipendoʼu pai da ndisara mpodago wuyuami, 18da naka neʼe naincani ntau kakominya mopuasa. Waʼanya Papami anu bareʼe ndikita mata anu da maincani, Sira anu mangkita powiami anu tesambuni setu, da mawaika komi saromi.”
Aga-aga ri suruga
6:19-21
(Luk. 12:33-34)
19 #
Yak. 5:2-3
“Neʼe ndipasambaka aga-agami ri lino, ri kareʼe ane da mangkoni pai kareʼe ntagara anu da mangkokoti pai ri kareʼe nto pelima anu da mampelima. 20Moruana, ndipasambakamo aga-agami ri suruga, njairia bereʼe ane pai tagara anu da majaʼati, pai bereʼe to pelima da mampelima. 21Maka ri mbeʼi kareʼe aga-agami, njairia seʼe woʼu petaka ndayami!”
Silo ngkoro
6:22-23
(Luk. 11:34-36)
22“Mata inceʼemo silo gala ngkoro. Ane malino matamu, yosa pai mareme sangkoromu. 23Paikanya ane bularu matamu, mawengi pai wani sangkoromu. Mewali ane silo ngkoromu bareʼe merara, manoro banya podo mawengi paikanya wani ngkiji!”
I Pue Ala pai aga-aga
6:24-34
(Luk. 16:13, 12:22-31)
24“Bereʼe mau sambaʼa tau mangkoto motetala ri radua tau mancongka; maka da meruu napampotowe anu sambaʼa painaka anu ntaninya, bara napaperuu pedongenya ri anu sambaʼa painaka anu ntaninya. Ewanceʼemo woʼu komi. Bareʼe da ndikoto motetala tila i mPue Ala pai tila aga-aga woʼu.
25Inceʼe puʼunya neʼe ndikalingani; neʼemo ndipoʼipu ndaya kono katuwumi, inceʼemo nunjaa anu da ndikomi pai ndiinu, bara nunjaa anu da ndiporengko. Ara banya katuwu meruu painaka pangkoni, pai koro meruu pai naka rengko? 26Peolemo tonci moyoko-yoko ri raoa. Tau seʼe bareʼe momuya pai bareʼe momota, pai bareʼe mompariala. Mau ewanceʼe ndaporewu mPapami ri suruga tau seʼe! Ara banya komi anu bangke peruu olinya painaka tonci? 27Isema ri oyomi anu ua kaʼipu ndayanya nakoto mampakarate tinuwunya mau podo sakodi?
28Wenu painaka komi mampoʼipu ndaya kono porengkomi? Peolemo waʼa ncese anu tuwu ri pada. Waʼa ncese setu bareʼe motetala pai bareʼe montanu; 29#1 Raj. 10:4-7, 2 Taw. 9:3-6 paikanya mau ewambeʼimo kakoreʼe i Mokole Salomo, bareʼe mampataka rengko anu siwia peawanya pai waʼa ncese setu! 30Ewo ri pada tuwu sandeme seʼi pai raneo pura ndatunju. Paikanya i Pue Ala mamparewani ewo setu gori mpeawanya. Pagonya komi! Paikanya bareʼe ntani ndiaya. 31Neʼemo ipu rayami pai ndipantoʼo, ‘Nunjaa anu da takoni bara nunjaa anu da tainu,’ bara ‘nunjaa da taporengko?’ 32Pura-pura setu bareʼe naowe-owe ntau anu bareʼe maincani Pue Ala mampepali. Ntanoka ndaincani mPapami anu ri suruga kapura-puranya setu da ndipoyoweka. 33Mewali, pari-parimo riunya da naka i Pue Ala moparenta ri raya ngkatuwumi pai wianakamo pepokono-A. Maka anu ntaninya pura-pura da ndawaika woʼu komi i mPue Ala. 34Inceʼe painaka, neʼemo ndipoʼipu kono kaʼiraneonya. Sandeme seʼi ganamo kaparinya, neʼemo ndarangani.”
Currently Selected:
MATIU 6: LAIPMF
Highlight
Share
Compare
Copy
Want to have your highlights saved across all your devices? Sign up or sign in
