MATIU 23
23
Patiendo da naka mainga-inga mancuaraki waʼa guru agama pai waʼa nto Parisi
23:1-12
(Mrk. 12:38-39, Luk. 11:43,46, 20:45-46)
1Nepa ndatoʼo i Yesu ri tau sondo pai waʼa anaguru-A, 2“Waʼa guru agama pai waʼa nto Parisi marata kuasa mamposoki songka i Musa, 3Inceʼe puʼunya painaka da ndiaya pai da ndilulu pura-pura anu natotoraka ntau seʼe. Paikanya powia ntau seʼe neʼe ndilulu, maka nunjaa anu natotorakaka komi bareʼe nawianaka ntau seʼe. 4Tau seʼe mampepokauka anu mapari pai mampapakoyoka tau podede waʼa ncongka anu manee, paikanya tau seʼe bareʼe liu-liu natulungi tau anu mawianaka. 5#Mat. 6:1, Paw. 6:8, Pai. 15:38 Pura-pura anu nawianaka ntau seʼe, inceʼe podo napangkita ntau. Naʼoamo ntau seʼe mampake soʼo ntongo mpekakai anu mabini, napakarate wuaki jubanya! 6Pai ane mesua ri posusa napepali ntau seʼe potunda anu ri suara, ri waʼa banua mpekakai da motunda ri gadera anu meawa. 7Maʼai kojo napampodaraya ntau seʼe ane natabe ntau ri pasari pai da napeboo ntau ‘Guru!’ 8Paikanya komi neʼe ndipokono da napebooka ntau, ‘Guru’, maka Gurumi podo sambaʼaja, pai komi pura-pura tau sangkompo. 9Pai neʼe reʼe sambaʼa tau ri lino seʼi ndipebooka ‘Papa’, maka Papami podo sambaʼaja, inceʼemo Papa anu ri suruga. 10Pai neʼe ndipokono napebooka ntau ‘Topombawanaka’ maka topombawanakami podo sambaʼaja inceʼemo Mokole Tadungkadago anu ndajanji i mPue Ala. 11#Mat. 20:26-27, Mrk. 9:35, 10:43-44, Luk. 22:26 Tau anu bangke mpodago ri oyomi, inceʼe anu da mewali toporiokomi. 12#Luk. 14:11, 18:14 Tau anu mobangke-bangke da ndakodisi, pai tau anu mampakalauka koronya siʼa da ndatanderaka.”
I Yesu mamposari engko nto pokira-kira
23:13-28
(Mrk. 12:40, Luk. 11:39-42,44,52, 20:47)
13“Marugimo komi waʼa guru agama pai waʼa nto Parisi! Komi waʼa ntau anu topokira-kira. Komi anu mangaompo tau da mewali tau i mPue Ala. Komi ngkaliomi bareʼe ndipokono da mewali tau i mPue Ala, pai waʼa ntau anu da rayanya ndisalempori.
[14Marugimo komi waʼa guru agama pai waʼa nto Parisi! Komimo waʼa ntau topokira-kira. Komi anu mantengosi waʼa mbeʼa bemba ndirampa banuanya; da mangancambunika engkomi anu majaʼa setu ndipakarate pekakaimi; inceʼe puʼunya painaka da maʼai ngkanee hukumi!]
15Marugimo komi waʼa guru agama pai waʼa nto Parisi! Komimo waʼa ntau topokira-kira! Komi mosumomba ri kalawanya ri sambote ntasi, ndigolili sape lino da ndipaleʼo mampapesua tau ri agamami. Ane mesuamo ri agamami, tau setu ndipapewali tau bangani naraka, painaka kajaʼa ntau setu radua ngkani kaʼai ngkajaʼanya pai komi!
16Marugimo komi waʼa ntopombawanaka anu buta! Ndipaguruka tau ewanceʼi, ‘Ane tau montandokoro mamposabi Banua i mPue tau setu bareʼe tesoʼo ri pontandokoronya; paikanya ane siʼa montandokoro mamposabi wuyawa anu njau ri Banua i mPue, siʼa tesoʼo ri pontandokoronya setu.’ 17Komi waʼa ntau tengo pai buta! Anu mbeʼi masuli olinya, wuyawa bara Banua i mPue anu mampakagali wuyawa setu? 18Komi seʼe mampaguruka tau, ‘Ane sambaʼa tau montandokoro mamposabi lampaʼani mpaʼombasi panyomba, inceʼe bareʼe makuja, paikanya ane montandokoro mamposabi panyomba anu ndaʼombasi ri wawo lampaʼani, siʼa da nakoni ntandokoronya.’ 19Maʼai kojo kabutami! Anu mbeʼi bangke olinya, anu ndapanyombaka bara lampaʼani anu mampakagali anu ndapanyombaka setu? 20Inceʼe puʼunya, ane sambaʼa tau anu montandokoro mamposabi lampaʼani posokinya lampaʼani mpanyomba anu naposabi, tesuamo pai pura-pura panyomba anu ndasompeka ri wawonya. 21Pai ane sambaʼa tau montandokoro mamposabi Banua i mPue, posokinya siʼa montandokoro mamposabi Banua i mPue Ala, tesuamo pai Sira anu mangkareʼe Banua i mPue setu. 22#Yes. 66:1, Mat. 5:34 Pai ane tau sambaʼa montandokoro mamposabi Suruga posokinya siʼa montandokoro mamposabi gadera mpoparenta mPue Ala, tesua pai i Pue Ala anu motunda ri gadera mpoparenta setu.
23 #
Tad. 27:30
Marugimo komi waʼa guru agama pai waʼa nto Parisi! Komimo waʼa ntau topokira-kira, maka sampotila sampuyu ungka ri waʼa rampa ewa solasi, jinta pai kuya ndipanyombaka ri Pue. Ntanoka anu bangke mpodago ri waʼa ncongka agama, ewa: kayoa ndaya, puru ndaya pai pepoʼinaya inceʼe bareʼe ndiwianaka. Incetumo kamonconya anu sangaya-ngaya da ndiwianaka pura-puranya, ri kabareʼenya reʼe anu ntani-ntaninya woʼu ndalewa. 24Komimo waʼa ntopombawanaka anu buta! Yale ri raya anu da ndiinu nditapisi, ntanoka onta ndiomo!
25Marugimo komi waʼa guru agama pai waʼa nto Parisi! Komimo waʼa ntopokira-kira! Tabo mpanginu pai tabo mpangkoni mayali ndipawusoʼi wawonya, ntanoka rayanya keʼonu mpodago maka banganinya paka waʼa anu ntau ndirampa, pai kamangoa. 26Ee to Parisi anu buta! Ndiwusoʼimo pakayali raya waʼa ntabo pai waʼa mangkomi da naka wawonya da magali woʼu.
27 #
Pwn. 23:3
Marugimo komi waʼa guru agama pai waʼa nto Parisi! Komimo waʼa nto pokira-kira! Komi ewa dayo anu ndameseli, malori ndakita ri wawonya, paikanya ri rayanya buke-buke waʼa wuku anu oso. 28Ewanceʼemo woʼu komi. Ri wawonya ndakita madago ri tau; paikanya ri rayami buke pai waʼa mbamba pai nawa-nawa anu majaʼa.”
I Yesu mampakanoto huku waʼa guru agama pai waʼa nto Parisi
23:29-36
(Luk. 11:47-51)
29“Marugimo komi waʼa guru agama pai waʼa nto Parisi! Komimo waʼa ntopokira-kira! Ndipakalese mampowiaka waʼa nabi dayonya, tau anu mayoa rayanya ndipatundaka paʼesa anu madolidi. 30Nepa nditoʼo, ‘Ane rapanya reʼemo kami ri tempo ngkatuwu ntau piamo, kami bareʼe da kaposintuwui mampepate waʼa nabi setu!’ 31Mewali ndipangakuka ngkaliomi kakominya muli ntau anu mampepate waʼa nabi! 32Ane ewanceʼe, ndipowia mpaliumo pai ndisumparakamo waʼa ncalaa anu roo natepuʼu waʼa ngkaimi mampowia! 33Komi tau majaʼa pai muli waʼa ntau anu majaʼa! Ewambeʼi da ndipangkoto lapa ungka ri popahuku ri apu naraka? 34Ndipedongeka mpodago: Da kupokauka komi waʼa nabi, waʼa ntau loʼe, pai waʼa guru agama santila tau seʼe da ndipepate, pai santila ndipaku ri kaju. Reʼe anu da ndijeani ri raya banua mpekakai, santila anu ndiduduki ungka ri kota sambaʼa njoʼu ri kota anu ntaninya, pai ndiduduki mpaliu. 35Inceʼe puʼunya painaka komi da ndahuku ua mamponcuruka ndipampepate waʼa ntau anu bareʼe masala – montepuʼu ungka ri pampepate i Abeli anu bereʼe salanya, nakarataka ri pampepatemi i Sakaria ana i Berekia, anu ndipepate ri oyo Banua i mPue pai lampaʼani mpaʼombasi panyomba. 36Ndipoaya moncomo; pura-pura setu da ndapepalisi ri waʼa ntau anu tuwu salapi seʼi!”
Merata puru ndaya i Yesu mangkita kota Yerusale
23:37-39
(Luk. 13:34-35)
37“Oo, Yerusale, Yerusale! Waʼa nabi nupepate. Waʼa ncuro mPue Ala nuwunu mbatu rantani mate. Bara sangkuja ngkanimo da raya-Ku mampasingkandomu waʼa ntaumu ewa indo manu mantumodosi ananya ri ara mpaninya, paikanya bareʼe nupokono! 38Inceʼe puʼunya i Pue Ala bareʼemo ndapokono sangkani-ngkani pai komi. 39Da nupaincani: Montepuʼu wawaseʼi bareʼemo da nukita Yaku rantani nutoʼo, ‘Ndadoncomo Sira anu rata ri toʼo i mPue.’ ”
Currently Selected:
MATIU 23: LAIPMF
Highlight
Share
Compare
Copy
Want to have your highlights saved across all your devices? Sign up or sign in
