MATIU 22
22
Nuntu mporapa posusa mpopawawa
22:1-14
(Luk. 14:15-24)
1Seʼi woʼu nuntu mporapa ndapau i Yesu ri tau sondo, 2ndatoʼo, “Ane i Pue Ala moparenta katedikanakanya ewa nuntu mporapa seʼi; sambaʼa mokole anu mamposusaka pawawa ananya. 3Napokau mokole setu waʼa anamayununya njoʼu mampalele waʼa ntau anu roo ndagulele da maʼi ri posusa setu. Paikanya pura-pura tau anu roomo ndagulele setu bareʼe napokono rata. 4Ungka lairia napokau woʼu mokole setu waʼa anamayununya anu ntaninya. Natoʼoka tau seʼe, ‘Ndipetumbuka waʼa ntau anu roomo kugulele setu: Pangkoni pai panginu tokamo pura-pura. Roomo kuroro japi pai ana japiku anu maboko. Lenamo pura-pura. Ndikamaʼimo ri posusa mpopawawa!’ 5Paikanya pura-pura tau anu ndapeboo setu bereʼe anu malinga. Sambaʼa-sambaʼa malai ri potetalanya, reʼe anu malai ri jamaanya, reʼe anu malai mampasilolongani pobalu-balunya; 6pai anu saʼenya woʼu mancoko anamayunu i mokole setu nepa nabobaki pai napepate. 7Padonge i mokole powia ntau seʼe, maʼai kojo kajaʼa ndayanya. Nasongka waʼa ncurodadonya da mampepate waʼa ntau majaʼa setu, pai mantunju kota ntau seʼe. 8Roo setu napeboo i mokole waʼa anamayununya, natoʼoka, ‘Posusaku tokamo, paikanya waʼa ntau anu ndapeboo bereʼe anu mampokono maʼi. 9Aginya ndipalaimo ri jaya bangke, pai ndipeboomo tau gori-gori ngkasondonya naka maʼi ri popawawa seʼi.’ 10Malaimo waʼa anamayunu setu, naliwuki pura-pura jaya bangke, naparuru tau pura-pura anu napomberataka, tau majaʼa, tau madago ntano rantani bukemo linggona ri banua mposusa.
11Ungka lairia, mesua i mokole mampapowawo waʼa linggona. Nakita reʼe tau sambaʼa anu bareʼe mampake rengko mposusa. 12Meoasi i Mokole ri tau setu natoʼo, ‘Bale, ara wenu siko mesua ri kareʼe mposusa seʼi bareʼe mampake rengko mposusa?’ Bareʼe nakoto ntau setu mesono. 13#Mat. 8:12, 25:30, Luk. 13:28 Nasongka i mokole anamayununya natoʼo, ‘Ndipungu tau seʼi, nditendeka ri sambalikunya ri kawengi-wenginya. Njairia da kareʼe mpotumangi pai kapari.’ ” 14Ndapapusa i Yesu nuntu mporapa setu ewaseʼi, “Maria tau anu ndapeboo paikanya sakodija anu ndapilisi.”
Kono pabayari asele
22:15-22
(Mrk. 12:13-17, Luk. 20:20-26)
15Ungka lairia mogombo to Parisi mampepali jaya da napaleʼo ntau seʼe mampetisala i Yesu ri pancono-A waʼa pompeoasi. 16Napokau ntau seʼe waʼa anamayununya pai bara tesangkuja tau i Herode njoʼu mampeoasi ri Yesu, natoʼo, “Guru, kaincani Komi tau mayoa, pai menaa raya ntau madonge totoraka-Mi kono pepokono i mPue Ala, pai bareʼe ndisabeka parata ndaya ntau ntaninya, maka Komi bareʼe ndipilisi tau.
17Ua ewanceʼe da nditoʼoka kami ewambeʼi parata ndaya-Mi: Malulu songka agamata bara maya kita da mabayari asele ri Datu bara bareʼe?”
18Ndaincani i Yesu kajaʼa ntangara ndaya ntau seʼe, pai ndapantoʼo, “Ee komi waʼa ntau topokira-kira! Ara wenu painaka komi da mantolia Yaku? 19Koisa nditujuka Yaku mata doi anu ndipake da mabayari asele seʼe!”
Natonju ntau seʼe ri Sira sangkomba doi salaka. 20Ndapeoasi i Yesu ri tau seʼe ndatoʼo, “Teke pai toʼo incema anu lau ri mata doi seʼi?”
21Mesono tau seʼe, “Teke pai toʼo i Datu!”
Ndatoʼo i Yesu, “Ane ewanceʼe, waika i Datu anu i Datu, pai waika i Pue Ala anu i mPue Ala.”
22Padonge ntau seʼe totoraka setu, jingki raya ntau seʼe, liu-liu napalaika ntau seʼe i Yesu.
Kono pembangu ungka ri kapate
22:23-33
(Mrk. 12:18-27, Luk. 20:27-40)
23 #
Pwn. 23:8
Ri eo setu seʼe reʼe bara tesangkuja to Saduki mampomberataka Yesu. Tau seʼemo anu bareʼe maaya pembangu ntau mate. Meoasi tau seʼe ri Yesu, natoʼo, 24#Paw. 25:5 “Guru, malulu pompaguru i Nabi Musa, ane reʼe tau samboko mate langkainya pai bereʼe ananya, kasangkomponya tuama da mamporongo bemba setu pai ane reʼe ananya, da mewali ana ngkasangkomponya anu matemo. 25Reʼemo anu mewali ri oyo mami tau sangkompo papitu paka tuama, morongomo anu tukaka, mate bereʼe ananya. Mewali bemba ntukakanya setu naporongo ntuaʼinya. 26Ewanceʼemo pewalinya i karadua, i katatogo rantani rata ri kapapitu, pura-pura mate bereʼe mau sambaʼa anu reʼe ananya. 27Kapusanya matemo woʼu weʼa setu. 28Mewali, ri tempo mpembangu ntau mate, rongo incema weʼa setu? Maka tau papitu setu paka roomo napolangkai.”
29Mesono i Yesu ndatoʼo, “Maʼai kojo kasala mponawa-nawami, maka bareʼe ndirata ndaya bangani Ncura Magali, ewanceʼe seʼe bareʼe ndiincani kuasa mPue Ala! 30Maka ane tuwu muni tau mate, tau seʼe bareʼemo da morongo, paikanya tau seʼe da tuwumo ewa malaʼeka ri suruga. 31Ara bareʼepa ndibasa, ewambeʼi pantoʼo mPue Ala tau mate da ndapatuwu muni? Ndatoʼo mPue Ala, 32#Pa. 3:6 ‘Yakumo Pue Ala i Burahima, i Saki pai i Yako.’ Pue Ala banya Pue Ala ntau mate, paikanya Sira Pue Ala ntau tuwu!” 33Ri padonge ntau sondo totoraka i Yesu, jingki kojo raya ntau seʼe.
Songka anu bangke
22:34-40
(Mrk. 12:28-34, Luk. 10:25-28)
34Ri padonge waʼa nto Parisi waʼa nto Saduki ndapowia i Yesu, bareʼemo naincani ntau seʼe mompau; mompasambaka tau seʼe. 35#Luk. 10:25-28 Reʼe sambaʼa guru agama ri oyo ntau seʼe mompeoasi ri Yesu, tangara ndayanya da mantolia Sira. 36Natoʼo, “Guru,” “songka anu mbeʼinya anu bangke mpodago ri raya ncongka agama?”
37 #
Paw. 6:5
Mesono i Yesu ndatoʼo, “Potowemo i Pue Ala puemu ri kaliogu ndayamu, gori mpangkoto ntanoanamu, pai ri gori mponawa-nawamu. 38Inceʼimo songka anu bangke pai anu ri wawonya! 39#Tad. 19:18 Songka anu karadua siwia pai anu kaʼisa setu: Potowemo kasitaumu ewa pampotowemu koromu ngkaliomu. 40Pura-pura songka agama anu nawai i Musa pai pompaguru waʼa nabi, merontada ri songka anu radua seʼi.”
Kono Mokole Tadungkadago
22:41-46
(Mrk. 12:35-37, Luk. 20:41-44)
41Ntongo njaupa waʼa nto Parisi mompasambaka njairia, ndapeoasi i Yesu ri tau seʼe ndatoʼo, 42“Ewambeʼi parata ndayami kono Mokole Tadungkadago? Muli incema siʼa?” Mesono tau seʼe, “Muli i Daudi!”
43Ndapeoasi woʼu i Yesu, “Ane ewanceʼe, ara wenu Inosa mPue Ala mantotoraka i Daudi pai napangkoto mantoʼo Mokole Tadungkadago setu, ‘Pue’, maka natoʼo i Daudi,
44 #
Pol. 110:1
‘I Pue mantoʼoka Pueku;
potundamo ri tondo mokanaku,
rantani kupapeʼuru waʼa iwalimu ri siko.’ 45Mewali ane sako i Daudi mantoʼo Mokole Tadungkadago setu, ‘Pue’, ewambeʼi da pewalinya Siʼa muli i Daudi?”
46Bereʼe mau sambaʼa tau setu anu mangkoto mancono pompeoasi i Yesu. Montepuʼu ungka ri eo setu bareʼemo reʼe tau anu mantaha mampeoasi bara nunjaa-njaa ri Sira.
Currently Selected:
MATIU 22: LAIPMF
Highlight
Share
Compare
Copy
Want to have your highlights saved across all your devices? Sign up or sign in
