MALEAKI 3
3
1 #
Mat. 11:10, Mrk. 1:2, Luk. 1:76, 7:27 Mesono i Pue Anu Makuasa ndatoʼo, “Yaku da mampokau pomokauku da mampatokaka Yaku jayaku. Bareʼe da ndisoro-soro tingkarasaka Yaku, Pue anu ndipepali, da rata ri Banua-Ku. Pomokau-Ku anu ndipomawu setu da rata mampebooka janji-Ku.”
2 #
Yo. 2:11, Pepat. 6:17 Paikanya isema anu da toa ri eo ngkarata i mPue mampapamara koro-A? Maka Sira da ewa apu mpande wuyawa, pai ewa sabu ntopobusu. 3Sira da mangabotusi, ewa tau mapakagali pai mampakalino salaka. Ewa sambaʼa pande wuyawa pai salaka, ewanceʼe pomokau i mPue da mampakalino waʼa ntadu mpanyomba, da naka tau seʼe mampanyombaka waʼa mpanyomba ri pawianaka anu ndapokono i mPue. 4Mewali da naka ewa ipiamo, i Pue mampokono waʼa mpanyomba anu ndapanyombaka waʼa nto Yahuda pai Yerusale ri Sira.
5Ndatoʼo i mPue Anu Makuasa, “Yaku da rata ri komi da mabotusi. Ganggara Yaku da mewali sabi ri waʼa ntopobalimata, waʼa ntoposalara, anu masabi mbamba, anu mantengosi gaji ntau anu ndasaro, anu majeani waʼa bemba pai waʼa anu ilu, pai tau mencua, pai ri pura-pura tau anu bareʼe mantubunaka Yaku.”
Pampanyombaka sampotila sampuyu
3:6-12
6“Yakumo i Pue, pai Yaku bereʼe kabalinya. Inceʼe painaka komi muli i Yako, bareʼe ndaʼopisaka. 7Ewa waʼa ntau piamomi owi, komi malewamo waʼa mpadikaku pai bareʼe todo mawianaka.
Ndipewalilimo ri Yaku, da naka Yaku woʼu mewalili ri komi. Paikanya komi meoasi nditoʼo, ‘Nunjaa anu da kawianaka da mewalili ri Komi?’ 8Seʼi-seʼi Yaku meoasi ri komi: Ara da ndikoto komi tolino mambambasi i Pue Ala? Manoto bareʼe! Paikanya komi mambambasi Yaku seʼe. Meoasi komi nditoʼo, ‘Ewambeʼi?’ Kusono: Ri pangabayarimi sampotila sampuyu pai pawai panyomba. 9Samalele banca mambambasi Yaku, inceʼe painaka komi pura-pura kono ntadeasi.
10 #
Tad. 27:30, Pai. 18:21-24, Paw. 12:6, 14:22-29, Neh. 13:12 Ndikenimo pura-pura anu sampotila sampuyu ri Banua-Ku, da naka reʼe pangkoni anu gana-gana njairia. Ndiʼujimo Yaku, nepa da ndikita, Yaku da mangaloka waʼa wombo ncuruga, da Kupabubuka komi mpengaya-ngaya anu madago gana-gana. 11Bareʼe da Kupapaliuka waʼa garupu ntana majaʼati bangani njamaami. Waʼa mpuʼu anggoromu da motinale wuanya. 12Painaka komi da natoʼo waʼa banca morasi, maka tanami mewali kareʼe anu meawa ndapeari.”
I Pue Ala majanji kapande ndayaa
3:13-18
13Ndatoʼo i mPue, “Waʼa mpaumu manoto mampetikodi Yaku.” “Paikanya komi meoasi nditoʼo, ‘Nunjaa anu katoʼo mangkono Komi?’ 14Komi mantoʼo, ‘Bereʼe yowenya manyomba ri Pue Ala. Nunjaa yowenya mawianaka tetala ri Pue Anu Makuasa bara da mantuju ri Sira tapamponcosoi salata? 15Takita ngkaliota waʼa ntau anu mobangke-bangke madago katuwunya. Tau anu majaʼa banya podo teranga-rangani kagana-gana ngkatuwunya, paikanya ane tau seʼe maʼuji kasabara mPue Ala ri pawianakanya jaʼa, bareʼe makuja-kuja tau seʼe.’ ”
16Nepa waʼa ntau anu mampokaeka i Pue, mompau sambaʼa pai sambaʼa. Ndadonge pai ndaincani i mPue nunjaa anu natoʼo ntau seʼe. Waʼa ntau anu mantubunaka Sira, da ndaʼuki toʼonya ri raya buku sambaʼa anu njau ri suaraa.
17Ndatoʼo i mPue Anu Makuasa, “Tau seʼe da mewali tau-Ku. Ri eo mponggaleku tau seʼe da mewali anaku anu Kupomawo. Yaku mampokapuru tau seʼe da ewa sambaʼa papa anu mampokapuru ana anu medonge ri siʼa. 18Waʼa ntau-Ku da mangkita woʼu posisalanya katedikanaka ntau madago pai tau majaʼa, anu mepoʼinaya ri Yaku pai anu bareʼe.”
Currently Selected:
MALEAKI 3: LAIPMF
Highlight
Share
Compare
Copy
Want to have your highlights saved across all your devices? Sign up or sign in
