MALEAKI 2
2
1Ndatoʼo i mPue Anu Makuasa ri waʼa ntadu mpanyomba, “Ewaseʼi songka-Ku anu rata ri komi: 2Nditubunakamo Yaku anu da ndipatongawa ri powiami. Ane bareʼe ndipokono mampedongeka pau-Ku, komi da Kutadeasi. Mpengaya-ngaya anu nditarima ewa sambaʼa rasi da kuwalisaka mewali tadeasi, maka komi bareʼe mampedongeka songka-Ku. 3Waʼa anami da Kuhuku pai liomi da kugereka taʼi mpinatuwu anu ndipanyombaka, pai komi da ndanoʼo ri pantaji taʼi mpinatuwu. 4#Pai. 3:11-13 Nepa da ndiincani songka seʼi roo kutoʼoka komi, da naka janji-Ku pai waʼa ntadu mpanyomba, muli i Lewi melinja mpaliu.
5 #
Pai. 25:12
Ri raya mpojanji setu Yaku mangajanjika tau seʼe katuwu anu uono pai lindo, pai tau seʼe kupokau mantubunaka Yaku. Ri tempo setu lawi natubunaka ntau seʼe Yaku pai napokaeka Yaku. 6Tau seʼe mampepaguruka anu monco banya anu sala. Tau seʼe mosu kojo pai Yaku, pai ri kamonconya malulu pepokono-Ku. Tau seʼe mantulungi sondo tau da naka bareʼemo mawianaka anu majaʼa. 7Lawi tetala waʼa ntadu mpanyomba da mampapeguruka anu monco kono Yaku Pue Anu Ndate ri Peawanya. Ri tau seʼe da pompeoasi waʼa ntau nunjaa pepokono-Ku, ua waʼa ntau seʼe setu pomokau-Ku.
8Paikanya seʼi-seʼi, komi waʼa ntadu mpanyomba, mebiamo ungka ri jaya anu monco. Waʼa mpopaguru anu ndipepaguruka mampapopuʼumo maria tau anu mowia sala. Komi majaʼatimo janji anu Kupareʼe pai komi. 9Inceʼe painaka Yaku woʼu da mampowia komi da napesaru-saru waʼa nto Isaraeli maka komi bareʼe mepoʼinaya ri pepokono-Ku pai komi mampaposisala tau ri pampagurumi waʼa ntau-Ku.”
Tau sondo bareʼe todo ri Pue Ala
2:10-16
10Ara banya kita mampotumpu papa anu sambaʼa-mbaʼa? Ara banya kita seʼi pura-pura ndapapewali i mPue Ala anu sambaʼa-mbaʼa? Ane ewanceʼe wenu painaka maewa janji anu ndapareʼe i mPue Ala pai tau piamota? 11Waʼa nto Yahuda malewamo janji i mPue Ala pai tau seʼe mawianakamo anu ndapokaeka ri Yerusale pai ri samalelenya. Tau seʼe mampakakarikamo Banu mPanyomba ri Pue anu ndapomawo, mamporongomo waʼa mbeʼa anu mampanyomba lamoa banca ntaninya. 12Tuarapa waʼa ntau anu mowia ewanceʼe ndarumba i mPue ungka waʼa nto Isaraeli. Mbolimo tau seʼe bareʼe sangkani-ngkani pai bancata mampanyombaka waʼa mpanyomba ri Pue Anu Makuasa.
13Pai seʼi woʼu powiamu anu ntaninya. Lampaʼani i mPue ndiriuka ue mata; komi motumangi pai mokukuou ua bareʼemo ndapokono i mPue mantarima waʼa mpanyombami. 14Da meoasi komi nditoʼo, iwenu painaka bareʼemo ndapokono i Sira mantarima. Maka ndaincani i mPue komi bareʼe todo ri weʼa anu ndiporongo ntongo ngkangurami. Weʼa setu ronda ngkoromi, paikanya komi bareʼe todo ri siʼa, seʼi roo ndijanji ri suara mPue Ala komi da todo ri Sira. 15Ara banya i Pue Ala Anu Sambaʼa-sambaʼa anu mampapewali komi sangkoro-ngkoro pai sintanoana pai weʼa setu? Nunjaa anu ndatinako ndaya i mPue kono inceʼe? Bareʼe ntaninya da naka komi marata waʼa ana mau da mewali tau i mPue Ala anu monco. Mewali da ndijaga koromi. Neʼe boi reʼe ri oyomi anu bareʼe todo ri rongonya. 16“Kupobanciika pogaʼa,” pantoʼo i mPue Ala pue nto Isaraeli. “Kupobanciika ane reʼe ri oyomi anu masii ri rongonya, Ndijagamo koromi pai neʼe kojo boi bareʼe todo ri rongomi.”
Eo mpobotusi mosumo
2:17–3:5
17Komi mampakalente raya i mPue Ala ua waʼ mpompaumi. Paikanya komi meoasi nditoʼo, “Ewambeʼi kami mampakalente raya i mPue?” Ri pangantoʼomi, “Pura-pura tau anu mowia jaʼa ndatoʼo i mPue madago pai Sira mampokono tau seʼe.” Bara ua pompeoasi, “Ri mbeʼi i Pue Ala anu ndatoʼo mayoa setu?”
Currently Selected:
MALEAKI 2: LAIPMF
Highlight
Share
Compare
Copy
Want to have your highlights saved across all your devices? Sign up or sign in
