HOSEA 9
9
Popahuku tila Isaraeli ndabaanakamo
9:1-9
1Ee banca Isaraeli, neʼemo ndiposusaka waʼa eo bangkemi ewa waʼa banca ntaninya Komi mampalaikamo Pue Ala puemi pai bareʼe todo ri Sira. Ri sambaka-sambaka kareʼe mpoii gandu. Komi mampobalu koromi ewa weʼa anu bareʼe tumoro ri lamoa Baali, pai ndipokawongko mantarima gandu ewa saro nu lamoa setu ri komi! 2Paikanya bareʼemo masae komi da mampomakura gandu sangkani pai lana saitu, pai anggoro seʼe da pura. 3Komi, ee banca Isaraeli, bareʼe da maroo-roo mpaliu ri tana anu ndawaika komi i mPue. Komi sangaya-ngaya da mewalili ri Masiri, pai sangaya-ngaya da mangkoni pangkoni anu kapali ri Asuri. 4Ri waʼa ngkareʼe setu bareʼemo da ndileʼo mampasambaka anggoro pai panyomba pinatuwu da mampakawongko raya i mPue. Pangkonimi da mampapopuʼu waʼa ntau anu mangkoni da mewali karika daʼewa pangkoni anu ndakoni ri tempo mpopadayo. Pangkoni setu moyowe da mampakabosu kompomi; mau sakodi bareʼe da ndakeni ri Banua i mPue ndapanyombaka njairia. 5Ri waʼa eo bangke agama da ndapantubunaka i Pue, komi bareʼe da ndileʼo mawianaka bara nunjaa-njaa da mangabangkei eo setu. 6Ane ratamo kapari, pai komi ndakeni ri tana ntaninya, pai anu totaʼa ri oyomi da napasambaka nto Masiri da naka ndapepate nepa ndadayo ri Mempisi! Ewo pai rui da tuwu mangkaʼuwi maka ngkareʼe banuami pai waʼa aga-aga salakamu anu masuli olinya.
7Ratamo tempo popahuku, tempo pampesawaki waʼa mpowia. Isaraeli da mangaepe!
Da nditoʼo, “Nabi anu nakuasai inosa seʼi tengo kojo! Wando siʼa!” Komi mompau ewanceʼe maka maʼai ndipampobanciika Yaku pai maʼai ngkabangke salaami. 8I Pue Ala mampokau yaku ewa sambaʼa nabi da mampatiendo komi waʼa ntaua, paikanya rimbeʼi ntano kanjoʼuku, komi mampari-mpari mantolia yaku ewa tonci. Ri tana anu i Pue Ala tumpunya, komi waʼa nabi napoʼiwalika ntau sondo. 9#Tdu. 19:1-30 Maʼai ngkajaʼa kojo powiami ewa anu reʼemo napawianaka ntau ri Gibea. I Pue Ala da mampepalisi kasalami, pai mangahuku komi ua salaami.
Salaa Isaraeli pai silinya
9:10-14
10 #
Pai. 25:1-5
Ndatoʼo i mPue, “Ri uyu-uyu kuparata Isaraeli, mawongko rayaku ewa tau anu marata wua anggoro ri pada bone. Ri uyu-uyu kupangkita tau piamomi, mawongko rayaku ewa tau anu mangkita uyumbua puʼu ngkaju ara. Paikanya, ri tempo ngkanjoʼu ntau seʼe ri Buyu Peori, natepuʼumo ntau seʼe manyomba ri Baali, painaka mewali karika tau seʼe ewa lamoa anu napomawo ntau seʼe setu. 11Peawa Isaraeli da paya moyoko ewa tonci bareʼe dareʼe anu mongkeni, pai bareʼe da reʼe waʼa ananggodi anu ndapoana. 12Paikanya mau reʼe ananggodi anu ndapoana pai ndapatuwu tau seʼe da Kutima; bereʼe mau sambaʼa anu da kupatuwu. Marugimo komi, ee Isaraeli, ane Yaku mampalaika komi!”
13 Pue, kukita waʼa ana ntau seʼe ndaduduki pai ndapepate. 14Nunjaamo anu da kuperapi ri komi tila waʼa ntau setu? Ndipapewalimo waʼa mbeʼa ntau seʼe tamana! Ndipowiamo tau seʼe bareʼe naleʼo mampsusu ongaa ntau seʼe!
I Pue mangahuku Isaraeli
9:15-16
15Ndatoʼo i mPue, “Pura-pura jaʼa ntau seʼe montepuʼu ungka ri Giligali. Njairiamo pontepuʼunya kupampobanciika tau seʼe. Ua powia ntau seʼe anu majaʼa, Yaku da mangairi tau seʼe ungka ri tana-Ku seʼi. Yaku bareʼemo da mampotowe tau seʼe; pura-pura tadulako ntau seʼe maewamo Yaku. 16To Isaraeli da Kuhuku, Tau seʼe pinamuya anu bareʼe mowua, pai anu mangaumo kalenya. Tau seʼe bareʼe mampotumpu ana; pai mau rapanya reʼe ana ntau seʼe, waʼa ananya anu napotowe setu da kupepate.”
Nabi mompau kono Isaraeli
9:17–10:8
17I Pue Ala anu kuporiokoi setu bareʼe da mantarima waʼa ntau-A, maka tau seʼe bareʼe mampedongeka Sira. Tau seʼe da teyoro-yoro ri oyo waʼa banca.
Currently Selected:
HOSEA 9: LAIPMF
Highlight
Share
Compare
Copy
Want to have your highlights saved across all your devices? Sign up or sign in
