HOSEA 8
8
I Pue mangahuku Isaraeli maka tau seʼe manyomba ri lamoa
8:1-14
1Ndatoʼo i mPue, “Papowotumo petondoni ngkareʼe iwali! Iwali maungku tana-Ku jamo ewa koaʼa mancangke sinokonya! Waʼa ntau-Ku malewamo janjiku pai tau seʼe, pai maewa waʼa pompaguru-Ku. 2Mau natoʼo ntau seʼe Yaku Pue Ala pue ntau seʼe, pai natoʼo katau seʼenya waʼa ntauku anu maincani Yaku, 3paikanya tau seʼe bareʼe napokono mantarima nunjaa anu madago. Inceʼe painaka tau seʼe da naduduki waʼa iwalinya.
4Waʼa ntau-Ku mampilisi mokole ri kabareʼepanya napeoasi riunya ri Yaku. Tau seʼe malanti tadulako ri kabareʼepanya kusintuwunaka. Tau seʼe mantima wuyawa pai salaka nepa napowia turuki lamoa anu da mampowuaka kagero ntau seʼe ngkalionya. 5Bareʼe kupokono mangkita japi wuyawa anu napanyomba ntau seʼe ri kota Samaria. Majaʼa kojo rayaku ri tau seʼe. Sangkuja ngkasae woʼu tau seʼe da mampakakarika koronya pai panyomba ri lamoa? 6Japi wuyawa anu ndapanyomba ri Samaria setu, inceʼe powia mpale waʼa mpande nto Isaraeli! Incetu banya Pue Ala, pai sangaya-ngaya da ndalesaki! 7Waʼa ntau-Ku mancawu ngoyu, inceʼe painaka tau seʼe da mangampota lompiu! Bonde gandu ntau seʼe bareʼe matasa, painaka bareʼe da reʼe pangkoni. Pai ane matasa yau gandu ri bonde ntau seʼe, podo da napapurasi waʼa banca ntaninya. 8Da ewa kura anu maposo, da ewanceʼemo Isaraeli bereʼe yowenya, pai mewalimo banca anu siwiamo pai waʼa banca ntaninya. 9Jamo ewa kalide maila anu masembi, ewanceʼe waʼa nto Isaraeli malulu pepokononya ngkalionya. Tau seʼe mampepali petulungi ungka ri Asuri, pai maoli pobale-bale pai waʼa banca ntaninya. 10Paikanya Yaku da mampasambaka pai mangahuku tau seʼe. Bareʼemo masae tau seʼe da meʼode-ode ua kaparinya, ane najeani i datu Asuri tau seʼe.
11Kako maria-ria lampaʼani nawangu nto Isaraeli da napampangakuka salaa, kako maria-ria woʼu kareʼe da pampowia ntau seʼe salaa! 12Maria kojo pompaguru anu kuʼukika tau seʼe, paikanya pura-pura setu bareʼe natarima ntau seʼe, maka nareke ntau seʼe bereʼe pokentanya pai tau seʼe. 13Napokono ntau seʼe mampanyombaka panyomba ri Yaku, pai mangkoni wayawo mpanyomba setu, paikanya Yaku Pue bareʼe Kupokawongko waʼa mpanyomba setu. Seʼi-seʼi Yaku mampepalisi salaa ntau seʼe pai mangahuku tau seʼe ua waʼa ncalaanya setu; Yaku da mampakatu muni tau seʼe ri rana Masiri!
14To Isaraeli mawangu waʼa langkanae paikanya nakalingani anu mampapewali tau seʼe. To Yahuda mangarangani waʼa ngkota anu ndabente, paikanya Yaku da mampatudu apu mangampanowa pura-pura waʼa langkanae pai waʼa ngkota ntau seʼe.”
Currently Selected:
HOSEA 8: LAIPMF
Highlight
Share
Compare
Copy
Want to have your highlights saved across all your devices? Sign up or sign in
