HOSEA 7
7
1Ndatoʼo i mPue, “Sangkani-sangkani da rayaku mampakaʼosa tau-Ku Isaraeli pai da mawali mpakadago tau seʼe, paikanya anu Kukita podo jaʼa pai salaa ntau seʼe. Tau seʼe mombembambasi, tau seʼe mampesuaki banua ntau da melima pai tau seʼe marampa aga-aga ntau ri jaya-jaya. 2Bareʼe liu-liu molimbayo ri nawa-nawa ntau seʼe, ka-Yakunya bareʼe da mangkalingani waʼa jaʼa ntau seʼe setu. Paikanya salaa ntau seʼe mangkumutimo tau seʼe painaka yosa-yosa kojo Kupangangkita.”
Gerombola ri langkanae
7:3-7
3Ndatoʼo i mPue, “Poʼakala pai waʼa mpowia ntau sondo anu majaʼa inceʼe anu pampakawongko raya i mokole pai waʼa ntopoparenta. 4Tau seʼe pura-pura toponggoli-nggoli pai bareʼe todo. Kasina ndaya ntau seʼe ewa apu anu ri raya ntondi anu bareʼe nakamberosi i ntopowia roti, ri kabareʼepanya toka adona anu da ndatunu. 5Ri eo mposusa i mokole, tau seʼe mampapanginuka anggoro i mokole pai waʼa mpegawainya rantani mayangu pai mawianakamo powia ngkatengo. Painaka i mokole modoro-doro sangkani-ngkani pai waʼa nto ponggoli-nggoli setu. 6Ewa apu anu ri raya balombo ewanceʼemo tinako ndaya anu majaʼa pai kajaʼa ndaya ntau seʼe kangiri-ngiri ri raya ntau seʼe sangkasae mbengi, pai ri mpowuro mewangiri mewali reka apu anu kanggelo-nggelo.
7Ri raya mpesongke ngkajaʼa ndaya ntau seʼe napepate waʼa ntadulako ntau seʼe. Mombembetonda waʼa mokole ntau seʼe ndapepate. Paikanya mau ewanceʼemo kaʼai ngkajaʼa ngkatedikanakanya, bereʼe mau sambaʼa tau anu mekakai merapi tulungi ri Yaku.”
Isaraeli pai waʼa banca
7:8-16
8Ndatoʼo i mPue, “Banca Isaraeli mompasambaʼa-mbaʼa pai banca anu mantolilimi tau seʼe. Painaka tau seʼe mewali ewa roti anu mataune. 9Bareʼe narata ndaya ntau seʼe, ua mopuʼu ri kasambaʼa-mbaʼa ntau seʼe pai waʼa banca ntaninya setu, katetaji roso ntau seʼe. Mosumo da potando tuntuka ntau seʼe, paikanya bareʼe naincani ntau seʼe. 10Pobangke-bangke nto Isaraeli yosa pai tongawa pai mewali tanda ngkamonco kasala ntau seʼe. Paikanya mau ewanceʼemo pewalinya pura-pura setu, bareʼepa woʼu napepali ntau seʼe Yaku bara mewalili ri Yaku, Pue Ala pue ntau seʼe. 11Isaraeli wainjoʼu waimaʼi ewa tonci putiʼa anu tengo. Riu-riunya waʼa ntaunya merapi tulungi ri Masiri, roo setu tau seʼe molonco ri Asuri! 12Paikanya sangkani-sangkani tau seʼe moliu Yaku da mantaʼa puka pai da mancoko tau seʼe ewa mampuyu tonci. Yaku da mangahuku tau seʼe ua waʼa jaʼa ntau seʼe Kuincanimo.
13Marugimo tau seʼe, maka tau seʼe mampalaikamo Yaku. Tau seʼe da magero maka tau seʼe maewamo Yaku. Da rayaku mancorepaka tau seʼe, paikanya panyomba ntau seʼe ri Yaku podo mbambanya. 14Tau seʼe bareʼe monco-monco kojo mekakai ri Yaku. Ane mekakai tau seʼe, tau seʼe medungkalaka ri kareʼe ngkayorenya, nepa mokukuou ewa powia waʼa ntau anu bareʼe meaya ri Yaku. Ane tau seʼe mekakai merapi gandu pai anggoro, nawelai ntau seʼe koronya ewa anu nawianaka waʼa ntau anu manyomba ri lamoa. Tau seʼe monco-monco kojo maewa Yaku! 15Seʼi Yakumo anu mampakabangke pai mampakaroso tau seʼe, paikanya tau seʼe mampowia gerombola maewa Yaku. 16Tau seʼe melulu mpaliu ri waʼa lamoa anu beliu-liu reʼe kuasanya. Tau seʼe bareʼe da ndasarumaka ewa gorosi anu bareʼemo mayumbe. Waʼa ntadulako ntau seʼe mompau ri pobangke-bangke, maka tau seʼe da mate ri mata mpenai, pai da napopogeleka waʼa nto Masiri.”
Currently Selected:
HOSEA 7: LAIPMF
Highlight
Share
Compare
Copy
Want to have your highlights saved across all your devices? Sign up or sign in
