HOSEA 5
5
1Ndatoʼo i mPue, “Pedongeka ee waʼa ntadu mpanyomba! Pedongeka ee to Isaraeli, pedongeka ee waʼa ntau muli mokole! Popahuku ndapatudu ri komi. Maka kamonconya komi da mobotusi ri gori ngkamonconya, paikanya komi jamewalimo ewa patambo ri Misipa, ewa tolia ri Buyu Tabori, 2pai ewa wayau anu mayombu ri Sitimi. Inceʼe painaka da huku komi pura-pura! 3Kuincani pura-pura anu mangkono koromu, ee Isaraeli bareʼe da nukoto mancambunika bara nunjaa-njaa ri Yaku. Siko manyomba ri lamoa pai bareʼe todo ri Yaku. Inceʼe painaka waʼa ntaumu bareʼemo sintinaja manyomba ri Yaku.”
Patiendo kono panyomba ri lamoa
5:4-7
4Jaʼa anu nawianaka nto Isaraeli, inceʼe mampopuʼu tau seʼe bareʼe nakoto mewalili ri Pue Ala pue ntau seʼe. Tau seʼe nakowamo mpanyomba ri lamoa, painaka bareʼemo napedongeka ntau seʼe i Pue. 5Pobangke-bangke banca Isaraeli yosa kojo, pai mewali tanda kasala ntau seʼe. Sala ntau seʼe mampapopuʼu katosube pai kanawu ntau seʼe, pai banca Yahuda manawu sangkani-ngkani pai tau seʼe. 6Tau seʼe njoʼu mampepali i Pue mangangkeni bimba pai japi da ndapanyombaka, paikanya pura-pura setu bereʼe yowenya. Maka i Pue mampalaikamo tau seʼe, pai bareʼemo da nakoto ntau seʼe marata Sira. 7Tau seʼe bareʼe todo ri Pue; waʼa ana ntau seʼe banya ananya. Inceʼe painaka bareʼemo masae tau seʼe da ndagero sangkani-ngkani pai waʼa bonde ntau seʼe.
Poʼiwali ri oyo Yahuda pai Isaraeli
5:8-15
8Tawuisimo surupeta ri Gibea! Papowotumo petondoni da pombetoto ri Rama! Pebooka pekiu mpoʼiwali ri Beteli! Iomo to Benyami, ndikanjoʼumo mombetoto! 9Isaraeli da magero, maka ratamo eonya da ndapangahuku siʼa. Padongeka ee palili Isaraeli, inceʼe manoto da mewali.
10Ndatoʼo i mPue, “Marau rayaku ua waʼa ntadulako Yahuda mangaungku Isaraeli pai mangarampa tana. Inceʼe painaka Yaku da mampapapereka tau seʼe popahuku ewa ue mowo. 11Isaraeli ndajeani, bareʼemo reʼe tananya, maka siʼa mampakaroso da mamperapi petulungi ri anu kamonconya bareʼe nakoto mantulungi siʼa. 12Inceʼe puʼunya painaka Yaku magero banca Isaraeli, pai mangagero to Yahuda.
13Banca Isaraeli pai banca Yahuda naincani katedikanakanya anu majaʼa Isaraeli njoʼu ri Asuri merapi pompelae ungka ri datu bangke. Paikanya datu setu bareʼe nakoto mantulungi bara da mampakadago katedikanaka ntau seʼe. 14Ewa petarangkaku ncinga ewanceʼemo kupangaungku to Isaraeli pai Yahuda. Yaku ngkalioku anu da mangasempati tau seʼe, nepa Kupalaika. Ane tau seʼe kunoʼo kukeni mpalai, bereʼe mau sambaʼa tau anu mangkoto malapasaka tau seʼe.
15Waʼa ntau-Ku Kupalaika rantani ganamo kapari ua waʼa ncalaanya, nepa rata mampepali Yaku. Tuarapa ri raya ngkaparinya tau seʼe da mopari-mpari mampomberataka Yaku.”
Currently Selected:
HOSEA 5: LAIPMF
Highlight
Share
Compare
Copy
Want to have your highlights saved across all your devices? Sign up or sign in
